CORRUPTION HI

Mizoramin kan buaipui ber pakhat chu corruption hi a ni ta. Kan development kawng tibuai fotu chu corruption a ni a. Project ropui tak tak a huna zawh theih lohtirtu chu corruption a ni a. A nih tur ang nihtir thei lotu pawh corruption a ni a. Vawiin thlenga kan zin kawng chhiatna chhan pawh corruption a ni.

Veng chhunga mihring inrinhlelhna leh inngaih­san lohna thlentu pawh corruption hi a ni a. Mi lian tam tak mipuiin kan zah tur anga kan zahlohna chhan pawh corruption bawk hi a ni.

A dik tak chuan kan sawrkar kan zah em em tur pawh kan sawi chhiat a, kan hotute kan ankhum tawn tawn ngamna chhan pawh hi corruption bawk hi a la ni ta zel a.

Corruption hi mi zahawm turte zahawm lova siamtu a ni a. Mi fel pui pui confidence nei lo deuhva siam a, an rilru tihahtu, an hausakna chunga hlim thei reng reng lova siamtu a ni. Mahni an inhriat kiau avangin an zak ru a, mi laka inthlahrunna an nei a, an addict tawh avangin remchang a awm chuan an ti leh mai țhin si a. Nuam an ti pawh a ni tawh lo, corruption-in a phuar laklawh tawh a ni zawk.

Officer lian eiru tam țhenkhatte phei chu an nun a khawihbuaisak a, thinchhiatah te a tlak a, țul uk lovah an hote an vin phah fo. Pathian ram thilpeka an pek țeuh dawn chuan, miin an hlawh bi an hriatsak kurin an hre bawk si a. Inthenfaina an zawnga faina kawng a awm si lo. Veng chhungah pawh an hausak ang huin khawtlang thil pawimawhah an che chhuak ngam lo. Heti khawpa min tiretheitu corruption hi tlansan ngam ava țha em ve aw.

Kan ram kohhran lian berin Synod khawmpuiah corruption do an tithlu hi a lawmawm hle mai. A do dan tura an ruahmanna te lo thlir ila, kohhran dangte tan pawh a țangkai hle dawn a ni.

Synod khawmpuiin corruption do a pass hian kohhran a enkhum hauhvin ka ring lo va. Rorelna chu Pathian chhungteah hian țan a hun tawh si a, tih ang khan, (1 Petera 4:17). A dik tak chuan sawrkara eiru kan tih zawng zawng hi eng kohhran berah emaw member an ni vek. Chuvangin kan dona hmun tur pawimawh tak chu kohhran hi a ni.

Kohhran hian Pathian thu kan zir dan kawng hi kan bih chian a hun khawp mai. Krista thisen avanga chhandam kan nih hnua ringtute nunphung pawimawhna lam kan uar a țul hle.

Tin, sual zawng zawng hi ringtute tan chuan Pathian laka sualna a ni vek tih kan hriat a pawimawh hle a ni. Corruption titute hian an hriat tur pawimawh tak chu, a thiltih hian amah chauh a nghawng lo va, a chhungte a nghawng a, ram kalsiam a nghawng a, sual lian tak a ni tih hi a ni.

Corruption kan dona hmun tur pawimawh tak chu chhungkua hi a ni bawk. Chhung inkhawmah corruption eng chi pawh hi Pathian pawisawina a ni tih kan zirho țhin te, kan sawi țhin te a pawimawh hle. Kan chhungkuaah sawrkar sum khawih emaw, contract hna thawk emaw, supply emaw, sawrkar hna thawk hrim hrim emaw pawh an awm chuan kut thianghlim an vawn reng theihna tura kan țawngțaisak țhin a țha khawp ang.

Chhungkuaa sawi hova, sum thianghlim lo lakluh chu kan chhungkaw timangtu tur, zahna thlentu tur leh Pathian hremna thlentu tur a nihzia kan sawi nawn fo a pawimawh hle.

- Commissioner Lalkiamlova