KUMSUL VEI LEH SIKNI ENG

1. Kumpuisul lam ang lo her changin,

Sikni engmawi a rawn thlen leh ta;

Zingtian lenkawl leh ram loh lentu,

Thingsiri zartin an mawi mang e.

Thlir ve ru, khawvel mawina hi,

Nungcha rawl leh partin hian,

Siamtu fakin zia an thar;

Hringmi leng hian dawn thiam ve maw.

Pu K.C.Lalvunga’n he hla Shillong tlanga lehkha a zirlaia a phuah “KHAWVEL MAWINA” tih hi December thla han chuankai tawh hi chuan ngaih bik sawi tur hre lo tan pawh, he hla hi chhiarin han sa ila, lung a leng a, naupangte kan nih aṭanga kan hun kal tawh te min hriat chhuahtir ṭhin. High School kal laia MZP chanchinbu thlatin chhuak chhiar kan nghahhlelh ṭhinzia tak te kha aw! Kumtluana hun inher kan tawn ṭhin “Zoram nipui” tih leh “Kan nun khuarei an chang tur chu” tih article Pu Thuamluaia ziah te, “Fur khaw hnawm” (Mang N Mang) Pu Hauthuama ziah te leh Pu K.C. Lalvunga’n “Thal favang” tih an ziah te ngaihnawm leh ṭha kan tih ṭhinzia tak te kha aw!

Zan mut hmun thlengin ka ngaihtuah a. Zing takah ka tho a, thingpui in paha chanchinbu chhiarin in chungah ka chhova. Zing ni chhuakin ral leh lam Luangmual leh Zonuam tlang a rawn chhun en mawizia leh in chung zawla ka thlai chinte zan daifimin a tlak, zing ni chhuakin a chhun tlet sep sep te chu a mawiin rilru a tihlim a.

Zan lama World Cup inkhel hmuhnawm tak France leh Poland khel te chu ka ṭan zawk Poland an chak lo mai ang tih hlau deuh roha ka mutsan tak zing lamah a high-light ka en mai ang ka tih pawh chu theihnghilhin, chu thlasik zing nichhuak eng mawi tak chuan Panlai hun aṭanga hun kal tawh te min ngaihtuah zui tir ta daih a.

Kum pawh a liam tam tawh tehreng nen, kan khua Chalrang khua Primary School kan kal ṭantirh lai hun te min hriat chhuah tir a. Kan sikul tlang lungpui school naupang kan ṭhahnem deuh vanga school chhunga leng ve lo ‘A’ pawl leh ‘B’ pawl ten A AW B kan ziah thiam ṭanna lungpuite leh a kawtzawl serthlum kung leh a sira lenhmui rah duh tak te, a hmin hun kan nghahhlelh ṭhinzia te. Nipui chawlha veichem bil tak mai, fawng keh ak chunga dai vel aidusentil leh tumbu khaileng khawrha kan vah nilen ṭhin leh, Chalrang lui leh Sakei- thing-ham lui zawha nghalim mit lawk te te mana nghakuai kan chiah ṭhinlai hunte ka ngaihtuah a.

Furpui khawhnawm a reh tan a Favang rim a nam. Zing takah nu te thawhrualin kan tho a, kawr pawh ha tha hman meuh loin Sephung kawlai tura tuthlawh bil tak hum a, Kumpinu lungdawh leh lungpui chawlhhmun pheia kan kal ṭhin te, sephung hum tun chungin kan haw a, school tlai hlauin hmanhmawh takin kut pawh silfai hman mang hlei loin, kawr hma phel lehlamah kan tat fai thuak thuak a, chaw kan kil ve leh chawt ṭhin te.

Zing taka zawngṭah bilhbawlawk tla chhar tuma Topui a Pu Thangtlaia huan kan thlen thlak hma ṭhinzia leh a par tuvu kan chhar ṭuma kan lawmzia tak te kha aw! School kal loh ni chuan saihlum tam tawk akin sava kan veh ṭhin a, kan veh loh ṭumin nilengin Kawn zawlah kan infiam ṭhin.

Chhun rilṭam te hian in lamah kan tlan haw vang vang a, chawṭhing bel kan hawng a, buhtleiin kan hawlhphel a, chawtlang lian tawk kan lek chhuak a, a chungah chi kan chhipchhuan a, chawtlang keih mawlh mawlh chungin ṭhiante kan fin leh a. Arpui no hruai leh uicho in min umzui duah duah changte zuk awm a.

December thla han chuankai zet hi chuan, boruak thiang leh zing nichhuak leh tlai ni tla tur mawizia a rawn keng a. Kum sang tam tak aṭang leh ka hriat phak kum 80 aṭanga vawiin thleng hian, kumsul vei leh sikni eng mawi hi a pangngaiin a pangngai zel dawn; mihring leh nungcha te erawh kan liam zel. Mahni hunlai ṭheuhah eng angin nge kan ngaih a, hun kan hman thlir kir ila, an lung a leng ve ngei ang le.

Tunlai ṭhangthar mobile age - Whatsaap, Facebook leh Youtube khawih reng mai tan chuan, kum 70 hmalam kan nunzia kan han tarlan thuak thuakte hi mak tiin an hrethiam kher lo ang le. Mahse, Kumsul vei leh Sikni eng hi chuan tawpni leh chuaini a nei lo ang. Mahni hun ṭheuhah Siamtu thilsiam leh hun hi amah fak nan leh chawimawi nana hmang chungin, he hla hi i sa zui ang aw...

2. Tleitir sakhmelin a cho lo che,

Partin mawina pawh i zar anni;

Sappui thiltin tuahrem thiam pawh hian,

Nang anga rawng mawi an ban ngai lo,

Aw khawvel mawina sikni eng,

Ka fak seng lawng che lungmawl an,

Nang hi i ni ve ang Remna,

Lalpa pawh khan a rawn pan.

3. Thinlai a fan nunhlui mualliam hnu,

Thinlai darthlalang an a lo lang;

Suihlunglen in khuatin hawi ila,

Chuan ka nuam lentu zo thing tin hi.

Sirva len thiam nun inthlengin,

Khawvel taksa lungkham pelin,

Chuan ka nuam ramloh lentu,

Zingtian sikni eng mawi lawmin.

- Lalhmangaiha Sailo Holy Cross Bakery