THLASIK KRISMAS

"Zing takah han tho ila - thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui hle..."

Pawltlâk thla a nih tawh hian chuan, kawngpui kamah leh tuikhur kam velah Lailen leh Pitte ten varṭianah an mawng an rawn su det det a, hmuh an nuam a ni. Han hawi vel ila, chiang taka hmuh mai theih turin 'krismas par' ka in bul maiah hmuh tur a lo awm bawk nen; suihlung hi a leng vawng vawng țhin lah tak a.

Hán zin chhuak ila, kawngpui kamah japanhlo pâr, tlangsam pâr, builukham pâr leh tlaizawng pâr te hmuh tur a tam hle mai a. Mit ina a tlin tawk vel leka thlawhhma huan siam te ina an thlai chin 'Anthur pâr' te lamin hmuh an va nuam em. Kan thlira kan thlir leh ṭhin a nih ber hi maw....

Hmun khawi emaw lunlai leh bazar hmunah te chuan, a khat mawi tawkin a pianna lam hla an rawn zaitir lehin, hetiang hla te hian min rawn awi nung leh a.

"Kan nghah krismas lâwmna ni kâwl a êng țan ta,

Rinna mit in van lal naupiang kan thlir..."

A khat mawi tawkin Siampuii Sailo, Lalsangzuali Sailo (L) leh T. Lalengzaua hla te an play chhawk hi a ni ber a. Aw! hunpui a ni miau a, engkim mai hian masi boruak hi a ti masi bik hi a ni dah roh va. Khawi emaw lai-ah Krismas Pâr hmuh tur a awm fur mai bawk a, thlirnin a har țhin ngawt mai.

Ni e. Masi a ni miau a, kristian te hunpui a nih takah chuan, fam ngaih lusún khawhar chhúngte tan tak te hian nia tawrh har zual dawn chu ni. Nikum maia ú-ama an fakpui te, chhungkua-a inhmangaih leh inthlahlel tak maia cheng/leng dún țhin te an kim tawh ngai lohna tur leiah hian, țahna hian bu a va khuar hnem ngai em ve aw, tih vawng vawng chang ka va ngah em!

Kan țahna mittui tal hian min chhandamtu lunglai fan se la, vân khawpui ațang hian min rawn hnem se, tih hi mal tin sawmtu chung Pathian hnena ka țawngțaina a ni fo va.

Hunpui a nih ang ngeiin krismas-ah hian zawng, chhúng tinte kan engkim leh kan theihna sang ber țheuhin kan in buatsaih a. Kan phak tawk ṭheuhin masi hi zawng chhungkaw tin te hian kan hmuak a ni ber a. Kan hmalam hun kal zel tur kan thlir dan erawh a inchen in a inang mawlh si lo. Chu chu a ni hunpui masi chu...

"Lal pian hun pangpâr a vul leh ta,

Thinlai mu hnu lunglen a kai tho ve;

Vân hnuai mi hril Bethlehem

tlang chungah,

Rinin thlain mi an thlâwk kai..."

He hunpuiah hian zawng lunglên, khawharna leh țahnate hian chhúngtinte min vel țapin, kan hmangaih kal tate ngaih a nâ vawng vawng țhin. Ral khat, ram hla taka bethlehem tlàngpui rinna mita han thlir chan te hian, tlaini tla lenkâwl a êng no riai a, lungtileng tawk chauhin boruak thlifim thaw heuh heuh leh chhum lei bawk vak vel cham delte chuan lunghnur takin, saron pâr tlâna chhûngkimte-a kan lendún hun tur min va ngaihzual tir em...

"Lung duh an liam ta a,

An sulhnu lei awm harah hian;

Fam ngaih tin kim dawnin,

Tapin tlai ni ka leng,

ka riang lua e-Lalpa.

Vanduai min awmpui la,

I ram thianghlim thleng ni mah se;

Lei mihring chhung hianin,

ka ngai thiam lo,

Ka lal lung hnem tuar har

min dawn pui rawh."

Favang boruak nuam a lo ral a, zing ni chhuak a lo êng sen phut a, lailen leh pitte te an lo țum a - builukham pâr, midum pâr, tlaizawng pâr, janpanhlo pâr leh tlangsâm pâr te an lo lang a. Zing takah han tho ila - thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui hle mai a, tlâng tinah mit tlin tawk turin buh a vu tuk mai a, buh seng turin nu leh pate chuan lo lam an kan a, an hlim teh asin.

Heng hunah te hlei hlei hian, bethlehem rim te hi a nâ zual bik hian a hriat a, kan hlimpui-in kan tleipui zawk zaw mah a. Aw! thlasik khel lova kan ngah, krismas hun hlimawm herchhuahpuitu - Thlasik Krismas!

[He thuziak hi ka țhianpa C. Lalduhawma leh kan nau, Nc Lalchhuanawma (of Lawngtlai)-te kumin November thlaa chatuan khawvar hun nghak a, vânram nuama krismas min hmansan ta te ka hriatreng nan leh khawhar chhúngte zawng zawng tan lo ni se.]

- LH.Hauheng, Nghilhloh Rûn