A lo kal a, a haw leh ringawt!

Kan nghahhlelh em em India rama Prime Minister awm tawh zinga thawm na ber pawl, pawisa tithi thei khawpa thiltithei Narendra Modi chuan Mizoram a rawn tlawh ta a, India rama state pakhat ve riang ruang chu darkar khat 'lai' hun min pe thei.

Thusawi thiam hmingthang a ni a, a thusawi pawh a ngaihnawm. Keini Hindi hrethiam ve lo pawhin a sawi ṭha thawkhat ang tih chu kan ring thiam nghal mai a, a aw pek a dik a, mipui a hip a, kan thlir dauh dauh mai a ni - Pu Modi meuh chu...!

Mi ṭhenkhatin Mizo hming a lam chhuakte leh a thusawia figure tam tak a sawi chat chat thei kha a ropuizia belhchhahna angah kan ngai a, kha kha sawi nep tumna lam ni lovin a thusawi lai khan teleprompter a inchhawp tih chu lehkhathiam chin chuan kan hre tel tho awm e.

Teleprompter-ah khan a PR team lamin a thusawi tur kha an lo feed char char a, a sir tawn tawnah khan a awm a, thu a sawi rual khan a en thei vek a, engkim kha plan sa a ni a, "Kan Mizo politician te ang lo takin thil a hria," kan han ti hmanhmawh kha chu Mizo mipui nawlpui hian pubpic speech lian thamah teleprompter an hmang ṭhin tih kan la hre lo tih a tilang.

Tichuan, thu ngaih­nawm tak tak a sawi a, Mizote pawh min fak thiam hle. Kan ziak leh chhiar thiam dante leh kan football hmasawnnate pawh a rawn sawi chat chat a, Mizorama remna leh muanna hlutzia a sawi a, Tuirial mai ni lo lui dang khuah a nih chuan Mizoram chu kawlphetha lama intodelh tur a nih thute a sawi a, Mizo tan chuan thil lawmawm tak niin ka lo hria.

Mau chungchang a sawi pawh kha thil lian thamah ka ngai a, mau thawn chhuak tura harsatna kan neih ṭhin chu Cabinet Meeting-in a lo rel tawh angin harsatna a awm tawh dawn lo. Hei hi Cabinet meeting thuchhuak a nih i hre reng ang u.

Tin, Central sor­karin India hmar­chhak puala sum an dah tam tham tak a rawn puang bawk a, a lawmawm khawp mai. Heng te hi cabinet lamin hmarchhak puala an dah a ni a, Meghalaya inthlan atana BJP tana Modi campaign lamah pawh hei hian nghawng nei turah mi ṭhenkhat chuan an ngai a ni.

Kan thupuiah khian lut dawn ta ila. Mizoram tan eng mah hnutchhiah a neiin ka hre lo. PM thiltithei leh ropui, BJP-in pathian biaka an biak, MNF-in 'kohhran hlauh vanga inveng tak' chunga an tlawn em em, Congress-in a hlauha an hlauh chuan Mizoram a lo lut a, Tuirial HEP siam peih sa a rawn hawng a, Krismas bazar tur veivak a rawn tihbuai hnuah a haw leh ta mai a ni.

Prime Minister meuh zin chuan state tan eng emaw han thlauh ve se ka lo tih tehlul nen, Congress sorkarna state lamah thil tih a duh vak lo pawh a ni mai thei a, mi tam takin mi thiltithei bik nia an ngaiha an dah san em em Prime Minister chu a lo zin a, tun hmaa PM lo zin dang­te ang bawkin a haw ve leh ta nul nul mai.

- K Zoramsanga (Sangtea)