CM Zoramthanga Ropuina Quovadis - Rosangzela, VH, Ph: 8974138026

Sual hi a tehfung a inang lo viau mai a, sualah pawh a langsar leh thup theih a awm a, hmelṭha tehfung pawh a inang lo khawp mai a; khaw khat hmelṭha pawh râl leh lamah chuan a chuti falua lo va. Thil hi kan teh dan azirin kan hmu ropuiin kan hmu ropui lo ve mai mai ve bawk a, a tehtu rilru put hmang kha a pawimawh lai chu a ni mai. Kohhran hruaitu tualchhunga thlarau mi riaua kan hriat pawh hi Zoram pelh meuh chuan thlarau mi niin kan hre leh lem hlei lo va. Han sawi zui ta zel ila, hmanni chu kan dawrah "Hruaitu Arsi" tih chanchinbu November issue chu an rawn dah ngawt mai a, chutia thu chhiar tur awm ta reng chu tiin ka chhiar a. Chu chanchinbu chuan min tithinur ta tlat mai a, insawh chawrh chawrh pahin ka chhiar zo chu a ni mai; chu chanchinbu chu kan political party hlun tak MNF General Hqrs lam aṭanga rawn publish a ni a.

A phek hnihnaah chuan, "Pu Zoramthanga Ropuina" tih artikul kan hmu a, a ziaktu hian Pu Zorama a ngaisang tak zet a ni tih pawh a chiang hle a ni. A hmasain Pu Zoramthanga chu vaibelchhia hmuam kan tih mai, tuna kan Mizoram pa ber chan chang Chief Minister a ni a, MNF party ah pawh President a ni a. Party mi leh sa tan chuan amah fak mai loh chu tihtur dang awm hek lo le. Heta Pu Zorama ropuina tia an tarlan pawh hi an teh dan a ni mai a; mahse, tehna mawlmang leh chhuanawm loh tak niin ka hria. Pu Zoramthanga ropuina tih hi point 6 zet tarlan a ni a, Pu Laldenga (L) in a rinzia chu tiin bul ṭan a ni a. Congress party a hawlh phel hneh hle tiin tun hma deuha thil thleng, Pu J. Lalsangzuala (L) leh a hoten party an chhuahsan dan te, tun hnua Congress party palian pahnih Pu R. Lalzirliana leh Pu Lalrinliana Sailo te MNF party-a a suan luh thute chu ropui ti takin an tarlang a. PC Party aṭanga Pu Lalhmingthanga (L) leh party hruaitu dang MNF party–a a lawmluh mup mup thute chhuanawm tiin an tarlang leh a. Chu mai a ni lo, tun hma MNU President Pu Lalduhoma MNF Party-a a lawmluh thute, MJD party President Pu Lalthankunga (L) leh a hote MNF Party-a a hruai luh dan te; Champhai biala a záwna term nga MLA atana an thlantlin thute tarlan a ni a. Kum 1962-a kum 17 mi lek a nih laia Champhai Vengthlang Middle Sikul a din thu leh Headmaster naupang ber record a siam thute uar takin an tarlang bawk a. Ka sawi ang khian he fakna thu hi MNF chanchinbua chhuak a ni a, editorial board tan chuan Pu ber fak mai loh chu tih theih dang awm hek lo, an demawm loh, party worker-te tihtur a ni.

Hetiang hi kan ram CM ropuina kan teh dan a nih chuan kan ram kalsiam chu hmasawn turin ka ngai lo. State dang CM kan sawi chamchi ṭhin, Vibrant Gujarat kan tih laia Gujarat CM Modi-a ropuina an teh dante kha, economy nghawng dawt khawpa hna a thawh dan chu tehfung a ni. A hunlai khan Bihar CM Nitish Kumar nen khaikhinin an ropuina an insawisiak a, chu'ng an ropuina tehfung chu ram hmasawnna lam hawi vek a ni. Hun liam tawh mah ni se, kan ṭhenawm Tripura CM Manik Sarkar ropuina tehfungte kha a ropui asin, an state kawngpui ṭhatziate kha hrilhfak a ni. Sawi tur ava tam em! Mi ram CM ropuina chu an ram sum leh pai dehchhuahah a innghat a ni, keini zawng kan CM ropuina kan teh dan chu a hoin a zahthlak. Kan tunlai khawvel hmasawnna leh mihring intlansiakna kawng (track) ah hian Party dang aṭangin chumi khami a lawmlut tih vel mai mai kan buaipui chhung chuan engmah beisei tur a awm lo. Kalphung thar tia au ZPM lam pawh lawmluh hi ropuina kailawnah an hmang ṭan niin a lang, a va beidawnthlak em!

Delhi CM Kejriwal tih ang khu kan CM hian ti ve se la ropui kan ti ang, dam chuan hun rei lo teah kan inthlang dawn, Political Party te lo inbih chiang rawh u. CM ropui neih kan duh ve tawh, party dang keu phel thiam tih te, party dang hruaitu lawk lawmlut thei tihte hi kan mamawh lo. Mi tak, patling, kan ram hian a mamawh a ni. Inkhualtelem ang maia kum tam min sukpuitute hi kiang tawh se la, a tak rama min hruai thleng thei CM kan mamawh a ni. Pu Hawla’n, “Cheng khat pawh ka eiru lo," a tih ṭulh ṭulh kha a ropui teh chiam lo, eiru tura CM ni miau hek lo. A eiru lo tak tak pawhin kan ring chuang lo. Kan Minister-ten ka eiru lo an tih hian zak tur an ni, eng vangin nge an eiruk ang? An eiruk loh hi an ropuina a ni lo, eiru tura thlan an ni lo. Ka minister chhungin ram hmasawnna ruhrel heti zat hi ka thawk puitling ti se Ropui kan ti ang. CM-in a unaute pawisa nuai tam tak a account ah a kawl miau chuan ram ropui kan chuangkai lo vang.

Mipui hi I harh ang u, kum 2023-ah chuan ram hruaitu turin mi tak I thlang tawh ang u. Chumi khami a lawmlut tih mai mai hi kan chhang kham tawh, mi ram hmasawnna kan sawi, kan inhriatsiak hi bansan ila, kan ram hruaitute hi I nawr tawm tawk tawk ang u. INC in Pu Sawta an vawrh a, ZPM in Pu Duhoma an vawrh a, MNF in a ngai bawk an vawrh a, duhthlanna chu mipui kutah a awm. Dawt sawi mai mai tur ni lo, ram mipui bum mai mai tur ni lo, vai sumdawng thurualpui mai mai tur ni lo, mipui sum chheprel tur ni lo, Mizopa mi dik kan thlang chhuak ngei ngei tur a ni. Zofate chhanchhuahna camping an nei zo a, kum 2023-ah Zofate chhanchhuahna inthlanpui kan buaipui ang chu, party atchilhte lo inthiarfihlim ngam rawh u. Mizoram hi tute emaw suahsual rawngbawlna hmunah kan chantir tur a ni tawh lo.

- Rosangzela, VH, Ph: 8974138026