RAU LEH RAU LO THLIAR HRANNA–A KAMKEUNA (Sacred-secular dichotomy)

Thuhma

Ka hriatthiam ve dan chuan, kan ram dam loh chhan nia ka puh ber chu ‘rau leh rau lo’ kan thliar hran dan fuh tawk loh avang hi a ni ta berin ka hria a. Heti lam hawi zawng hian ka rilru leh ngaihtuahna, tha leh zung ka seng hnem ve ta viau a. Chumi chungchang chu ka rawn ziak dawn a ni.

Rau leh rau lo thliar hranna chu eng nge?

Hmanlai Greek sakhuana lamah pawh Plato ngaihdan (philosophy) avangin rau leh rau lo chungchang hi thil hlui a lo ni miah lo mai a. Plato khan thil hrim hrim hi thlarau leh khawvel thil ang zawngin a ṭhen hrang a. Thlarau lam thilah chuan van lam thil te, danglam ve ngai lo thil te, chatuan daih tur ang chi te, adt., a dah a. Khawvel lam thil erawh chuan lei lam thil te, hun a danglam ang zela danglam ṭhin te, ral leh mai tur (chatuan daih lo) thil te, adt., a huam thung a. Hei hian a hun lai leh a hnu zela sakhuana kal dan a hril thui hle a ni.

Thlarau lam thil, van lam hawi thilte chauh rau ngawih ngawih bika ngaihna leh khawvel thil, lei lam thil leh a kaihnawihte rau miah lo anga ngaihna hi a sapṭawnga sacred secular dichotomy kan tih chu a ni ta a ni. Chumi awmzia chu thlarau thil leh khawvel thil hi thil inang lo, thil hrang hmehbel theih loh, Chhim leh Hmar anga thil hrang hlak anga ngaihna a ni tihna a nih chu. Mizo ṭawngin ‘rau leh rau lo thliar hranna’ tiin ziak ta ila. Hriatthiam a har em? Tun lai hun anga kan sawi dawn chuan Kohhran leh a kaihhnawih thil chauh rau anga ngaihna leh a bak zawnga kan thiltih khawvel thil anga ngaihna hi a ni e, kan ti thei ang. Miin Bible study neih te, inkhawm te, hla zir te, ldt., chu a hmu rau em em thei a, mahse office hnathawh te, YMA kaihnawih thil te, politics thil te, zirna (education) te, adt., erawh a hmu khawvel tlat thung thei a ni. He buaina hi kan ram ṭhanmawhbawk niin ka hre ve tlat a. Chuvangin he buaina hi kan hriat chian ka duh a ni.

Han sawi thui hlek ila

Christian historian lar tak – Eusebius chuan Kohhran hmasate khan mihring khawsak phung kha thlarau nun (perfect life) leh khawvel nun (permitted life) angin an ṭhen hrang niin a ziak a. Thlarau nun an tih chuan kohhran leh a kaihnawih thil a kawk a, a bak zawng, kohhran pawna thil tih zawng zawng chuan khawvel thil a kawk thung a ni. Thomas Aquinas-a erawh kha chuan thlarau thil leh khawvel thil a pawimawh ve ve a ni tiin a tlangaupui nasa hle a, a pawm zau viau bawk. Tlem han sawi hlek ila. A ngaihdan pakhatah chuan, khawvel thil nia kan sawi (natural world) hmangte hian Pathian hi a inpuangchhuak niin a ngai a. Chumi awmzia chu thing leh mau, tlang leh mual, tui leh mei, adt., hi Pathian thilsiam vek a ni a. Chumi avang chuan Pathian thilsiamte va hriat chianna (zir chianna) chuan Pathian hriat chian lehzualna a pe niin a pawm a ni. A ril khawp mai! Kan man em aw? Miin khuarel (natural law) chanchin azir hian Pathian nena inpawlna (fellowship) thuk tak an nei thei a ti tihna a nih chu. Chumi awmzia chu science lam hawi zirna miin khawvel thil anga ngaihna kha Aquinas ngaihdanah chuan a ni hauh lo tihna a ni a, a lo rau ve em em tho tihna a ni. A ril khawp mai!

Hun a lo kal zel a, kohhran chu a lo lian zel a, a ropui ta em em a. Chumi avang chuan thil tam takah tihsual leh tlin lohna a nei lian viau a. Chu chu rau leh rau lo thliar hranna, thlarau leh khawvel thil thliar hranna avanga lo chhuak nia ngaidan tam tak a awm a. A nih theihna chhan pawh tam tak a awm a ni. A chhan chu kohhran kha a lian tulh tulh a, a hausa tulh tulh a, sakhaw puithiam leh lalte kha an nuamsa em em a ni. Chutih lai mek chuan mi nawlpuite erawh an rethei a, an khawsak a harsa em em a, buaina kha a chhuak deuh reng a ni. Sakhuana chuan intluktlanna te, zalenna te, leh nun dan tha (moral values) tam tak, mihring khawsak phung pangngaiah a hlamchhiah niin an ngai tlat a ni. Thiamna leh finna (enlightenment) a lo pun tak tak hnu phei chuan mi fing pui puiin sakhuana an kalpui dan chu an sawisel ta luai luai mai a. Sakhuana chuan mihring nunphungah thil ṭha a thlen lo niin an hmu a ni.

Science lamah hmasawnna a thlen tak tak hnu, Industrial Revolution a thlen hnu phei chuan mihring nunphung a tiawlsam ta em em a. Mi harsa leh berh zawkte an lo dingchhuak ve thei ta a. Chu chuan intluktlanna, mihirng hlutna awmzia a hrilhfiah lehzual niin miin an ngai a. Sakhuanain a lo rah beh tawhna aṭanga chhanchhuah niin an ngai tlat a ni. Mi fing pui puiin sakhua an sawiselna chu Kristianna huanga mithiamte’n an theih ang angin an chhang let ve a. Kristianna chu nun dan ṭha te, intluktlanna te, thil ṭha tih leh a dangte nen an han suihfin ta a. Kristianna chuan hmuh theih loh thil, vanram thil chauh ni lo, he lei, khawvela mihring nun awmze nei zawk kan neih theihna tura pawimawh leh ṭangkai a ni tel a ni tiin an hrilhfiah nasa a ni. Heti zawnga sakhuana an hrilhfiah khan mi fing pui puite khan sakhuana chu thil ṭha thlentu, ṭangkai em em a ni tih an pawm ve an beisei a ni. Hei hian thlarau thil leh khawvel thil thliarhranna bang chu a lo su pawp nasa viau a ni.

Amaherawhchu, thlarau leh khawvel thil inang ve ve anga sawina chuan sakhaw lam thil ngaihpawimawh lohna a thlen nasa viau mai a. Chumi avang chuan khi laia Enlightenment hunlaia kohhran lama mithiamte’n mifingho an hrilhfiah dan khi fuh tawk lo niin an hria a. Chutah chuan Protestant zinga theologian lar leh ropui em em – Schleimiermacher a lo lang ta a. Ani chuan Plato leh Kant te ngaihdan (philosophy) zulzuiin kristianna chu kan rilru leh ngaihtuahnaa Pathian awmpuina (relationship) kan chan theihna hi a ni tiin a hrilhfiah ve leh a. Kan hrethiam em aw? A awlsam zawngin, Kristianna chu rimawi kan ngaihthlaka kan danglam (feel) ṭhin anga Pathian awmpuina chan hi a ni tihna a nih chu. Hei hian, abik takin evangelical protestant zingah nghawng a nei nasa em em a. A ram ang zawng chuan America lamah heti ang lam zawng hian a thawk nasa em em a. Chumi avang chuan Kohhran leh a kaihnawih thil chauh ngaih thlarauna a lo lian ta em a ni.

Tlipna

Kan thupui thlan hi a zau em em a. Han ziah ve hrim hrim pawh a huphurhawm viau mai! Tuna kan ziah hi chu a kamkeuna chauh a la ni a. Remchang hmasa berah, thlarau leh khawvel thil thliar hranna avanga kohhran, politics, sorkarna, zirna, adt., ah harsatna kan tawh dan ziah leh kan tum dawn nia. Engpawhnise, a hnam anga kan dinchhuah a, raltiang ram kan kai ve theihna turin kan rilru leh ngaihtuahna, kan theihna kan sengho zel dawn nia.

‘I ram leh hnam a ral chuan nang leh i chhungte in him bik lo vang’.

- Dr. Krista Roluahpuia IIT Gandhinagar