Krismas - Ṭahna Kutpui
Hlimna ni ropui - ṭahna kutpui han tih chu, ‘a kalh thlu thing zawn’ hle a. Mahse, Solomona chuan, "Nuihnaah pawh rilru lungngaihna a awm," a lo tih angin, hlimna kutpui Krismas-ah meuh pawh ṭahna a lo awm tlat mai.
Lei sual thimah Lal Isua a lo kal dawn khan van mipuiten, "Lalpa, hetah tlansa tam tak i nei, i tan a tawk lo vem ni?" tiin, "Van mipuiten ui mah se, an dang zo lo ve”. “A ngaiin van khua a reh zo ta, ṭapin lei an thlir a; Chatuan arsi pawhin a um zel a, A pianna Bethlehem tlang a rawn thlen ta". Suakliana leh Patea thlirna tlang aṭang chuan van khua leh tui chu ṭahna khawpuiah changin, an da ve der mai niin a lang. Mitthi ruang vui tur thlanmual thlenga kan thlah ang hian chatuan arsi pawhin Lal Isua hi Bethlehem tlang thleng rawkin a rawn thlah a ni.
"Kaisar lal lai ni tla zam vel hnuaiah ka Lal nau ang ṭap e," tih hla ang chiah khan bawng in tlawm zar hnuaiah hringnun bul ṭan nan nausen riangvaia chu a lo aw-ngek ve ta a ni. Chutia van-lal-nau mittui meuh lo farna hmun chu Patea’n a ngaisang hle a, "I chun leh zua kara sen lai nau ang i ṭahna hmun tual ka ngai," tiin a lo chham chhuak a. Chu chu duh tawk mai lovin, "Ṭapin ka rawn zawng zel ang che, Ka Lal pianna lei hmun tlawm ber chu," tiin Chhandamtu leh misual ṭapa an intawhna chu hlain a lo phuah chhuak ta a ni.
Van Beramno Rom member-ah, chhiarpui khalh chiaha a lo piang (pem) kher kher chu Idumai Keipui koham chuan a huphurh hle a. Ama fapa meuh pawh zuah lova seh hlumtu chuan Pathian Beramno chu seh a tum a. A hap ṭhelh a, Bethlehem khua leh a chhehvel zawng zawnga mipa naupang kum hnih achin hnuai lam chu a seh hlum ta vek a. Ṭap te, mitthi ngaia chiau vawng vawng thawm te a lo khat zo ta a nih kha.
Krismas a lo thlen apiang hian Kristiante kan ṭap ṭhin, "Par ang an lawm hnu he ni ropui lo thlen hian, Chhung kim dar ang len lai kha ngai zualin, Ṭapin luaithlipui an nul ngei ang," Rokunga’n a lo ti mathlawn lovin, chhung kima Krismas hmang thei lo - lusun chhungte zawng zawng chu kan ṭap ṭhin a ni.
Ṭhalai rual nuam umten accident an tawh avangin hliam tuarte an ṭap a; thi chhungte kan ṭap bawk. Mobile phone zuna uai te, ruk leh rawk tur zawnga kutkem zuara vak ṭhin te, zu leh ruihhlo chen a, mipat hmeichhiatna khurbinga lutho hringtu nu leh pate kan ṭap bawk. Kan ran vulhte tan lungngaih hapta a ni bawk.
Boralte zawnga chhandam tura Lal Isua a lo pianna hian sual inhriatna na tak a thlen avangin kan ṭap a. Nausen chu ṭapin kan zawng a, kan hmuh meuh chuan lawmin kan ṭap leh a. Thlarau bo lainatna avangin kan ṭap a, phurna leh a phaw vuaka hlimhlawp bawlhote veina avangin kan ṭap bawk. Thilsiamte pawh rum leh nau vei na tuarin an ṭap a, thlarau pawhin rum (ṭap) sawi hleih theih lohvin min lo ṭawngṭaisak ṭhin a ni.
Chuvang chuan, Krismas hi ṭahna kutpui a lo ni ta a ni!
- Hrangluaia