DRY DAY SAWIZAUNA
Dry Day tih hi Mizo ṭawng chuan, ‘hulhar ni’ zu laka fihhlimna ni tiin sawi ila a dik mai awm e.
Mizoram sorkara Department pawimawh tak Excise & Narcotic Commissioner chuan Kristian te kutpui, ni pawimawh zual, Kristmas leh Kumthar vuakvetah belhkhawma ni 8 lai Dry Day-ah a puang a, hei hian a tum bulpui ber nia lang chu ram pum huapa hun serh lawmawm leh, sakhuana pawhin urhsun tak leh thinlung fima hman ho tura a duh, hun reilote chhung tal hi chuan zu avanga buaina chi hrang hrang lo awm thei laka kan invawn thianghlim a, chhangchhe lo taka kan awmho theih a duh vanga thuneihna hmanga thupek khauh tak tihchhuah a ni tiin sawi ila a sual lovang.
Concerned Minister leh C.M. pawhin an amen zawng tak a ni bawk ang. Mipui lam pawh lung lova lak tum aiin lawm zawk kan tam rinawm.
Nitin dry day nih hun ka nghakhlel. Kan Zoram sorkarin zu chhiah tam tham a it avanga zu zawrh leh zu in phalna dan thar a siam taka mi tam takin thihna leh chhiatna an tawh dan te chu sawi thui ngai lovin kan hre ṭheuh awm e.
Chutiang thil duhawm lo tak chuan kan hunpui laite hian hnuhma pawi tak tak a hnutchhiah ṭhin avangin chumi hre reng chuan kan sorkara thuneitute chuan, "Zu hi hnam hmelma a nihzia chawlhkar khat tal chu i han lan chiantir ve teh ang aw" an ti ve a ni a. Ti ti mai ni lovin, sorkar thupek ngat, ziakin hmuh tur awm a, a lawmawm hle. Mahse kan ‘dry day’ hlu tak hi kei chuan Kristmas leh Kumthar vuakvet ni 8 chhung chauh hi ram leh hnam siam ṭha tura kan kawng zawh atan chuan tawi lutukin ka hria a, dry day a tawp thuai ang a, 'wet day' zu zawrh leh zu in, zuruih leh a kaihhnawih zawng zawng a lo inṭan leh ang a. Zu in loha pa fel leh mi ṭangkai em em te kha zu a ruih chuan mi chanve ah an chang leh ang a, in chhungkaw mamawh leina tur sum ṭhahnem tham tak a tlakral ang a, zu zawrhna lamah a liam leh zut zut ang.
Chumi sawhkhawka mi ṭhenkhat insual leh inthat ta mai te, kawngchhiat vang pawh ni si lova, kawng thlanga tlan liam ta maite leh zu over dose tuar lova thi ta mai te, zu re-action avanga buaina sosang tawk pawl awm zel tur avanga sorkar luhai tur hi kei chuan ka hmachhawn ngam lova, ka thiam lo bawk.
Chuvangin, sorkar laipuiin zu zuar tura Zoram min nawr lui a nih loh phawt chuan kan dry day hi exten-in kum khat chhung dry day-ah puang thei kan ni tih hi i pawm ṭheuh ang u.
- Upa Pangthuama