BETHLEHEM I PAN ANG
Tun hma kan nau-pan lai chuan, han ti ve khanglang ila, Krismas hi kan Hunpui neih chhun a ni a, a lo thleng tur hi kan lo urlawk nasa ṭhin a, ei tur ṭha te leh kawrmawi neih loh hlauvin, kan neih theihna turin kan lo inbuatsaih lawk nasa ṭhin.
Chutiang ang taka kan lo urlawkna chu Krismas lo thleng tur min nghahhleth tirtu a ni a. Rilru kan pekna leh kan inbuatsaihna ber Krismas a lo thlen pawhin hlim takin kan hmang ṭhin. Chung hunlai chuan lo neih bak tih tur dang a awm lova, pawltlak hunah buh te in lamah kan thiar zo tawh a, tih tur dang rilru kaptu kan nei tawh lo. Krismas hun a lo hnaih tawh chuan, Lal thar lo piang tur chuan kan rilru leh kan nun dan zawng zawng a lamah min hip khawm a, chutih hunah meuh chuan mi zawng zawngin Krismas hun chu lungrual leh hlim takin kan hmang tlang ṭhin.
Tunah chuan khatiang ang hun awl
ṭha leh ngaihtuahna zalen kha kan nei ta lova, kan nunah tihtur thar leh ṭha nitin a lo thleng zut zut mai te chuan kan nun nileng zankhuain a hnuk buai ta a, kumtir aṭangin kum tawp thlengin hunawl kan nei thei ta lo. Krismas lo thleng tur atan inpuahchahna hun awl nei thei lovin, kan buaina ang angin kan hmachhawn ta zel mai.
Kan nunah duhamna leh mahni inhaivur duhna awm tlat chuan kan nitin nun a tibuai telh telh a, Krismas lo thleng tur atan pawh inpuahchahna rilru zalen leh nun zalen kan nei hman ta lo.
Krismas ni tak chu ni khat chhung a ni mai a, mahse, Krismas min hman nawm tirtu leh a tiropuitu chu, a hma ni daih aṭanga kan lo inpuahchahna kha a ni. Chhandamtu a pian hun hma daih aṭanga Zawlneite hnena hrilhlawkna lo thleng te leh Mari leh Josefa hnena Vantirhkohte thu rawn thlente khan Krismas ni chu a ti ropui a, chumi avanga Mari thinlung hlanna chuan kan thinlung a kik hawng a, Ranthlenga puan nem chauh a belhna hmunah ngei chuan min hruai thleng leh ṭhin.
Thinlung thianghlim lo leh rilru a khawvel thil ngaihtuah buai nuaih chunga Lal thar chibai kan bukna chuan kan thinlung a chhun tuiral thei lo. Chuvangin, Krismas hlimawm tak a lo thlen theih nan Remna Lal thianghlim ber lo piang tura chu thinlung a lamah hawnin lo hmuak ila, kan rilru a vei kan neih te paih bovin, a hnen lamah kan mit leh beng te len leh ila, kan theihna zawng zawnga kan thlen theih nan i inbuatsaih leh ang u.
Lal thar lo piang a chu lawmin, mite tan kan hun leh taksate kan hman lai hian keimahni thinlung zawk hi kan hlan ve em? tiin kan in enfiah a ṭul khawp mai. Berampu leh mifingte angin Lal thar lo pianga chu, khawvel thiltihte kalsanin, a hmaah ṭhingṭhiin chibai i buk ve ang.
- H. Neihchungnunga, Durtlang North