LGBTQI-in kan ram a run mek

Urban Deve­lop­ment and Poverty Alleviation (UDPA) department chuan sorkar laipui aṭanga thu an hmuh angin, December 6, 2022 khan lesbian, gay, bisexual, transgender, queer, intersex (LGBTQI)-te tana in (shelter) sakna tur tender a tichhuak a ni.

LGBTQI (neih inang inkawp, adt.)-te chenna tur sak tur thawm a rik rual hian Mizoram dung leh vangah he thil thlawp lo tu au rawl a chhuak ve nghal a, kan ngo lian berte zinga mi Central YMA chuan a rangthei ang bera hmala nghalin, chief minister hnenah LGBTQI-te tana in (shelter) sak tum chu kaltlangpui lo turin an ngen hnuah sorkar chuan a sut leh a ni.

Engtih aṭanga in nge neih inang inkawp, adt.-te hi kan buaipui ṭan chu sawi a harsa tawh hle a, mahse hetia han ngaihtuah mai chuan Bible-a kan hmuh hi ka hriat hlat theih ber chu a ni mai awm e. Tun hnaia neih inang inkawp, adt.-te hi lo awm thut an ni lo a, hmanlai ata tawh an lo awm ve ṭhin tawh tih Bible aṭang pawn a lang chiang.

Rinlawk ang ngeiin engtik niah emaw chuan kan ramin LGBTQI-te chungchang hi a la rawn ngaihtuah ang tih hi vawiin ni chuan a lo thleng dik ta. Kan hriat angin Mizoram sorkar chu sorkar laipui ringa nunga ni a, kawng tam takah a thupek te zawm a ngaih chang a awm. Mahse India danpuiin state list min siamsak a, hemi behchhan hian keimahni state pawh kawng tam taka mahni inrelbawlna rel ve thei turin leh eng emaw chena dan insiam ve thei turin he India danpui hian min phalsak tih kha kan theihnghilh loh a ṭha ang.

Kum 2011 Census-ah khan Mizorama kristian awmzat chu 87.16% a ni a, kum 2001 census-ah khan kan tlahniam hret a, 86.97% kan ni. Record a landan chuan kum 1951 census khan Mizoram kristian awmzat chu a tam ber ṭum niin, 90.5% a ni. Mahse census neih apiangin a tlahniam chho ve zel thung.

Mizoramah kristian kan tlem cho zel a, biakin thar hawn belh erawh a awm chho zel. Inkhawm a tam em em a, kar tluan deuhthawa inkhawmna a awm.

Kristian koh­hran hrang hrang leh kristian pawl (ministry) hrang hrang a awm a, rawngbawltu pastor, pro pastor, evan, speaker etc... tam tak an awm bawk.

Mahse vawiin nia kan Mizoram result chu "Mizo­ramah Kristian kan tlem telh telh tih hi pawm ngam tur a ni."

- Dr Lalremruata