Chhim Politics aṭangin BJP an invawrh ka ring

Mizoram Politics hi kan thlir kan thlir chuan tun lai hian nasa takin a insingsa a, BJP hian kua an hreuh anga MNF hi an tlak bakah Congress an vuak chhiat phah ka ring. ZPM hi party thar ngang an la ni a, hma an sawn hreta a rinawm rual hian sorkar tur chuan an la pa tuai si a, BJP hian thiam tak hian kil tin aṭangin kua an hreuh a, Dr K Beichhua hian BJP a zawm vaih chuan BJP len ṭanna tur a ni ang a, chumia a mawhphurtu chu MNF an ni ang.

Mizoram chhim lamah hian Autonomous District Council pathum - Lai, Mara leh Chakma District Council a awm tih kan hria a. Congress khan Minister hi an dah deuh ziah a, Dr BD Chakma an dah kha Chakma MBBS zir issue avangin ban a ni a, chu chu BJP lo din chhuahna chiah hi a ni a, Congress Minister kha lo la ni mai mai se ram tan a pawi lo zawk tur a ni sia le. Pu Ngunlianchunga kha Minister a ni a Congress hun lai kha chuan, tun hmain Pu Hiphei leh Pu S Hiato te pawh an lo pawimawh hle tawh a, tunah hian MNF hian Autonomous District Council huam chhung aṭangin Minister pakhatmah an dah lo a ni. Hei hian chhim lam ADC area chhungah MNF duh lohna a ti pung lo thei lo.

He huna thil hlauhawm tak awm chu Dr Beichhua hian BJP a zawm a nih vaih zawngin BJP hian Siaha District MLA seat pahnih hi an lak theih ngei a rinawm. Tuichawng bialah lah hian party dangin ṭik pawh an ti ngam tawh si lova, BJP belt hi kan zauh nasa dawn a ni. BJP hian thiam takin Union Minister an chah lut zung zung a, MNF hnathawh an rawn target chat chat ta mai a. An tum ang ngeiin Mamit District, Siaha District leh Lawngtlai District lam an pan zel a, heng Palak, Lawngtlai bial pahnih, Tuichawng, Mamit leh Dampa bial hi thapui thawhin an bei dawn tih a chiang. Pawisa an ngah dawn nasa si a, kum 2023 ah hian BJP hian MLA 4-5 an nei thei a, chuti a nih chuan sorkar siam dawnah hian kan duh leh duh loh ni lovin an thiamna zawng zawng nen ṭangin BJP telna sorkar leh BJP Minister pahnih tal hauhin bul an rawn ṭan ang a. A tira Manipur, Nagaland leh Arunachal Pradesh lama an rawn luh ve dek dek ang chiah khan lutin Mizoram hi min la hneh thei.

Kan Politician tuna Minister ngei ngei zingah pawh hian BJP lam pawisa leh thiltihtheihna hmanga thlem chhuah theih tura ralkhat rin hi pali panga ka hmu. BJP hian Hindu sakhuaa min leh an tum dawn lova, rawn Hindu chet vak pawh an tum dawn lo, tuna Kristian inti tam tak ai hian a lehlam tak chuan an ṭha zawk a, State danga an rorel dan en hian kan awt zawk chu a nih hi. Chuvangin, MADC chhunga MNF mi leh sa inbeihna hian tunah hian BJP kawng an sial a ni zawk lo maw le? Dr Beichhua hi Congress, BJP leh ZPM hian an sawm vek a rinawm a, veteran politician a ni chho ve tawh a, tun hmaa social worker thianghlim tak kha a nih tawh loh avangin kal hrehna a neih a rinawm lova, a lansarh theihna tur party a zawn ve mai a rinawm avangin a BJP nulh lo ang tih tunge sawi thei le?

Saiha Politics boruak hi MNF versus MNF a ni. Hei hi MNF chhung­kuaah an ching fel thei tawh si lova pakhat zawk zawk an nawr chhuah a ngai a, Dr Beichhua nge an duh Pu HC Lalmalsawma Zasai tih an thlang a, mipui ngah zawka an hriat chu MNF-in an thlang ta a, Minister zawk an ban ta a ni. Kan Chief Minister pawh hian fel takin a bantir chhan hi sawi mai se a ṭhat nen lehkha thawnin Minister hna chanpual a siam danglam duh thu a ziak a, an siam rem hnuin Dr Beichhua hna zawng kha Er Lalrinawma an pe a, chu chu hna chanpual siam danglam ni lovin pakhat bana pakhat kaisan tir a ni. Minister ni lai, tihsual leh pawi khawih neih vang pawh ni lova Saiha chhunga MNF boruak avanga an ban ta mai hi Dr Beichhua tan MNF zui zel chi a ni tawh si lova, khawi lam kawng nge a zawh dawn tak le?

Kum 2023 hi thlir ila Aizawlah hian MNF tan beisei tur a tlem tawh si a, tuna MLA 6 an neih zingah hian tling nawn an awm chuan thil mak a nih zawk hmel hial tawh a. MNF ṭhatna ṭhin Aizawl West II Bial pawh MNF Councillor an nghing der der an tih thawm te a awm a, suma vawm ngheh chi ni loin an sawi. Aizawl East I Bial lamah kum 2018 intiamna thusawi a darh thar avang leh beisei ang hmu lo an tam avangin a bialtu pawh tlan chhiat mai a ṭul an tih thu hriat a ni.

Aizawl East II hian AMC inthlan leh Lok Sabha inthlan vote bakah Local Council bye election hrang hrang ah MNF an sang hleithei lo. Aizawl South III hi mipui vir laklawh tawhin Congress hun laia an bialtu an nin khan hna a thawk hnem zawk tih hriaiin an MLA an sit ṭan tawh. Aizawl North III bialah hian MLA fel em em mai hnathawk miah si lo a awm a, tun hi a hun tawp a nih an ring. Lunglei lamah hripui len laia mipui tana ding ngam lo MLA ṭhiau an awm a, Lungleia Municipal Council a rik hnuah heng MLA bo te hi an rawn inlar leh ṭuam ṭuam a, mipui thinlungah an lut thuk thei tawh si lo a ni.

Congress hi han thlir ila, Pu Lalsawta hmanga an revival hi party chhung bak hi a kang kai hleithei lo. Pu Sawta hi party mipuiin an ring em em ringawt. Mipui hian vote an la châk lo tih a takin kan hmu a, Central lamah Congress an zuih tawlh tawlh si hi an harsatna a ni. ZPM hian mipui awih tur an duh chuan an MLA ṭhenkhat hi an chawlh tir a ngai a, sorkarna siama ram ropui min thlen tir thei turin tuin nge ring ang? Mipui nawlpui hian MNF leh Congress an nin tawh em avangin ZPM an vote sup sup theih dawn chuan vote chakawm deuh MLA candidate an neih a ngai a, ngun deuhin in en chiang ngam rawh se.

Hetiang boruak teh ṭeuh karah hian BJP hian MLA 4 or 5 an neih chuan Mizorama rorelna ṭhutthleng hi chan theih an inring ngei ang. MNF hian BJP ropuina kawng an sial sak thei tih an inhriat a ngai a, chhim mipui behchhana project an siam aṭanga sum lo kal hmanga chhim lama contract hrang hrang an inpek dan aṭang hian chhim mipuite hmangaih loa hriatna hi a lian tawh a ni. Mizo mipui hian Dr K Beichhua banna hi beng sika ngaihtuah a ngai a ni.

- Lalremruata