Police nupuite motor hman tih kha...

Thiam vang ni loin a ṭul vang zawkin Police nupuiten police motor an lo hmang ve fo mai hi ka rawn sawi ve teh ang.

Mizoram hi kan hotuten state ralmuang ber kan ni an ti dum dum ṭhin kha a nia, chutih laia kan police lal nupuiten 'POLICE' tih intar motor kher an hmang ka hmu fo mai hian a dik lo a, kan ram economy a ei hek lutuk a, dan an bawhchhe bawk a ni.

Mizoram hi mipui nawlpui hriat lohin kan lo ralmuang ta lo viau a, kan police lal nupuite hi police motor-a an chuan loh chuan an him lo a nih erawh chuan rawn sawi ula, security lam thil ngaihtuah ṭhat ni rawh se.

Chuti ni lova an pasal Police lalte motor hi an nupui fanauten an duhna apianga an lo hmang ve ngawt a, an intih hmuh ni te hian a lang tawh lehnghal a, hei hi kan tih tawp vat ngam a ngai.

State ralmuang berah in lak ropui nana police officer nupuiten an pasalte motor an lek chhuak fo a nih chuan dikna ngaih pawimawh avanga MLA hial te pawh paihthla ngam MNF sorkar hian police officer nupuite dan bawhchhe zing lutuk hi titawp ve se, ram economy chhe lutuk tih ziaawm nan tal pawh a va ṭha dawn em...

Police nupuite hi ka thik lo, kan economy a ṭhat hunah duh leh an nupuite chuan motor chu hmang se ka sawi buai lo ang. Mahse tunah leiba hlira kan khat chunga hetianga police motor hman fo hi a dik lo, sim vat a ngai. Kan ram hi hausa in intodelh ni se ka sawisel lo ang, mahse sum kan harsa ti reng chung si hian a thei hi chuan sawrkar thau hi an la sawk nasa viau a nih hi.

Changkanna leh ropui kan hmuh dan pawh hi thlak a van ngai tawh em aw. Police officer nupui nih vanga sorkar motor duh duhnaa lo hman ve ngawt mai te hi dan bawhchhia kan nih laiin intihtheih nan mi tam tak hian an la hmang zawk mah ni hian a hriat.

Police Station tam takin petrol neih loh vanga case an umzui theih loh laia Police officer nupui Police motora an chuang hmuh fo hi a dik thei lo a ni. Kan police lal nupuite hian an pasalte nihna hmachhuanin sorkar motor an lo hmang fo hi a hmu fuh chuan social media leh chanchinah te post zel ila, en liam mai mai tawh lo ang u.

Police tih intar motor naupang sikul hruai te, bazar kawtah ding reng mai te ka hmu ṭhin, Birthday lawmnaa keng ngam te pawh zu han awm a, a zahtheih loh thlak angreng ka tia! Tum khat phei chu ṭhianho picnic na tur thlahin police lal fate police motor ah an rawn chuang ka hmu a, an driver khan nilengin police lal fate picnic kha a nghak ni maw?

Tun hnaiah Mizo­ram hi a bikin lirthei document felfai lo pawisa chawitirna dan leh road tax lakna tur te, sorkar revenue a lo pun theihna tur lamah Supreme court order zawm ṭha state, central sorkar duhdan ang kal thei state kan ni hial mai.

Kan duhnaah chuan central thu thlengin kan zawm ṭha viau. Mizorama police motor a nihna tur ni loa hman hi titawp ang u.

- Remremi Fanai