Krismas vuakvêtin lung a tilêng

Kum za liam taa Mizote sakhua, ramhuai hnêna kan inthawi ṭhinna chu Kristianna meichherin a rawn umbo ta a. Tûnah chuan kan hun ropui leh Mizo hnam lungrualna ber chu Krismas huna Lal lo piang Isua krista lawmna leh hemi puala Amah fakna leh chawimawina neia Kohhran Programme hlim taka kan hman ṭhin hi a ni ta a ni.

“Judai ram Bethlehem-ah Lal thar a lo piang a” tih te hian lung a tilêng hle ṭhîn. Bethlehem bawng inah Lal Isua a lo piang a. Isua Krista lo pian dâwnah chuan a nu Mari rai ṭeuh tawh leh a pasal Josepha te chuan Isua lo pian dâwn zânah, zin kawng thui tak zawhin Bethlehem an pan a. Hotel (khualbûk) leh thlenna tûr reng reng a lo full vek tawh avângin bawng inah Isua chu a lo piang ta a ni

Min chhandam tûra Pathian fapa mihringa lo chang Isua krista thu hretute chuan he chhandamna lâwmawmzia hi thu in an hril sêng lo a ni. Hmangaihnaa tihdam hna thawkin a nun pumpui chu Amah bêltu leh damna duhte tidam zêlin a hmawr bawk nân Amah ringtu zawng zawngte thlarau chhandam nân kraws-ah thiin a lo tuar a ni.

Isua Krista pian ni champhaphâk Krismas ni a lo thlen dâwn hian kan ngaihtuahna a buai ṭhin a. Krismas atâna kan inbuatsaihna hi Krismas vuakvêt kan ti a. Amah­erawhchu Krismas vuakvêt hi eng tik ni aṭanga in ṭan nge tih chu sawi dân kan nei miah thung si lo. Krismas vuakvêt a nih hi chuan a hunin min rawn nang nasa a, “Lal pian hun pangpar a vul leh ta” tiin kan lung a lêng hle ṭhîn a, Krismas hmang turin kan rilru a inbuatsaih nasa ṭhîn a ni. Hna thawka khaw danga awm te leh zirlaite pawh an khua a Krismas hmang tûra haw turin an inbuatsaih tawh ṭhîn.

Sawi tâk ang khan Krismas vuakvêt hian lung a tileng a, vâl upa pakhat chuan Krismas vuakvêt hi Krismas dâwna in ṭan a ni a ti a; a dik viau mai. Sâp ho khawthlang ram mite chuan Krismas vuakvêt kan tih hi “Advent Christmas Season” an ti a. Advent Christmas Season a in ṭan tawh chuan Krismas lo thleng tur atâna inbuatsaihnain an ngaihtuahna te an hmang tawh ṭhin a ni.

Advent Christmas season chu November ni 30 hnaih bertu Pathianni aṭanga inṭanin urlâwk ni 24 December (Christmas eve)-ah a tâwp a ni.

Advent Christmas Season hi Krismas ni aṭanga a hma Pathianni vawi 4-na aṭanga chhiar ṭanin Advent Christmas Season hi a inṭan tihna a ni a, kuminah chuan November 27 aṭangin a in ṭan. A tâwp ni chu December 24 a ni. Hei hi Mizoten Krismas vuakvêt kan tih hi a ni ve mai âwm e. Advent Christmas Season a kan hun hmanho ropui tak chu kan thawhpui leh zirpuite Krismas hmangho thei lo tûrte nên Advance Christmas celebration kan hmangho ṭhîn hi a ni a. Mizo ṭawng ang maiin Advance Christmas kan ti a, khawpuia awm thawkho leh zirhote pawh vêng inkarkik tak takte kan ni a, Krismas hman leh lawm lailâwkna Advance christmas hmanho hi nuam kan ti hle ṭhîn a nih hi.

Krismas hun hi kan nghâkhlel hle ṭhîn tak na a, a tak takah chuan Krismas ni thlen hma hi lung tilêngtu ber chu a ni zâwk mah. Hêng hun Advent Christmas Season (Krismas vuakvêtah) hian Krismas hla sak te leh ngaihthlâk te a nuam êm êm a. Krismas ni a lo thlen a, a hun kan hman zawh tawh phei chuan hêng lunglênna te hi zawi zawiin a lo kiam leh ṭhîn a nih hi.

Krismas vuakvêt kan lo hmang zo leh ta. Amah­erawhchu Lal Isua Krista hi ni tinin kan thinlungah lo thar zêl se. Amah faka chawimawiin kumtluanin ni tinin lal thar lo piang duhzâwng anga awmin Amah i chawimawi ṭhîn ang u.

- RC Zosângzuala, Vênghlui