2022 thil thleng ṭhenkhatte

Mizoram Elec­toral Roll 2022 chu January 15 khan tlangzarh a ni a, Mizoramah voter 8,33,426 an awmin, draft roll-a voter 8,16,137 aiin 17,289 (2.07%)-in a tam zawk.

Kum 2022-23 atana Mizoram budget ruahman chu cheng vbc. 14,008.15 a ni. Supplementary Demand for Grants cheng vbc. 2,161.47 chu pawm (pass) zui a ni a, Supplementary Demand pawm a nih hma hian rorel lai member-te leh eptu member-te chu an inhnial.

April 2021 - March 2022 chhung khan Mizoramah thisen unit 28,191 pek a ni a, kum 2021-22 chhunga thisen pek hi kum hmasaa pek zat aiin unit 1,533-in a tam zawk.

Covid-19 avanga hun eng emaw chen sikul kal theih a nih loh hnuah April 5 aṭangin kum 2022-2023 academic session atan sikul kal ṭan a ni.

Mizo Academy of Letters (MAL) chuan kum 2021 chhunga Mizo ṭawnga leh­khabu chhuak ṭha ber, Book of the Year 2021 atan Lalhruaitluanga Chawngte ziah, 'Hnam ropuite u, tho r'u le' tih an thlang.

Mizoram Legisla­tive Assembly a din hnuah kum 50 chhungin MLA mi 232 an awm tawh. April 2022 aṭangin Mizorama kawlphetha hman man chu 6.78% a tihpun a ni a, Power tarrif thar hi April 1, 2022 aṭangin electric bill chhût tur a ni a, kum 2022-23 chhung hman tur a ni.

Mizorama dil lian ber, Pala Dîl (Palak Dîl) leh a chhehvel chu khaw­vela wetland hum­halh leh enkawl bik, Ramsar Site-ah Convention on Wetlands chuan a puang.

Commonwealth Games, 2022-ah Jeremy Lalrinnunga (Weightlifting) chuan gold medal a la a, Lalremsiami Hmar (Hockey) chuan bronze medal a la thung.

Mizoram (Liquor Prohibition) Act, 2019 (MLP Act) hnuaia rules chu September 7, 2022 khan hman ṭan niin, Excise duty (chhiah) lâk zat tur chu litre khatah Rs 10 zel lâk a ni dawn.

Bairabi-Sairang inkar rél kawng chu 80% thawh zawh tawh a ni a, December 2023-ah hawn tum a ni. Transport-in lirthei khalhtute tan November 1, 2022 aṭang khan online hmangin learner license dilna a kalpui.

Mizoramah kum 2005 aṭanga kumin March thla thleng khan HIV vei mi 25,982 hmuh chhuah a ni tawh a; HIV/AIDS vangin mi 3,506 an thi tawh. HIV+ve hmuh tawh zinga 65% vel chu mipat hmeichhiatna hman aṭanga kái an ni.

Mizo Academy of Letters (MAL) chuan thu leh hla lama thawh hlâwk chawi­mawina Academy Award 2022 chu L Keivom (L) hnenah an hlân. Vanglaini chanchinbu buat­saih Mizo Award 2022 chu Mizo­rama zirna sáng hma­sawnna tura thawh hlâwk Dr Tawn­enga, Mission Veng hnenah hlân a ni.

- CR Puitea