Inthlan kum kan lo thleng ta

Kum 2023 a lo in her chhuak ta ruai ruai mai le. He kum hi tute emaw tan chuan sorkar siam kum a ni dawn tlat mai. MNF vek hi an la sorkar leh thei.

Sorkar lai MNF hi tlain sorkar thar pawh a piang thei. Kum 2023 kan hman zawh meuh chuan chu chu a chiang tawh ang. Mizoram mipuiin vote kan thlak kum a lo in her chhuak ta. Keini ang Politics lama ak zat hnih hnuai lam hian tute nge tling dawn tih hi kan hrethiam phak lo.

Kum 2018 inthlan dawn khan Congress Party kha an tlak theih reng reng ring lo ka nih avangin ka chhut thiam lo chhiava tih hi tun hnu hian ka in hre chiang a ni. NLUP-ah cheng nuai 1 an sem pap pap a, Congress Minister te khan langsar taka sawisel ang chi hming chhiatna kha an neih pawh kan hre lova, an han tla chiang laileng bawk si a ni.

An hotupa Pu Hawla meuh pawh bial hnihah a tla a ni tih kan la hria ang a, kha result kha keia hisap piah lam thil a ni.

MNF khan sor­karna an chan phak rinna pakhatmah ka nei lova, chu ai chuan Zoram People's Movement (ZPM) an tih khan min barakhaih nasa zawk daih.

Pawl thar deuha kan ngaih, ZPM khan MLA an nei ve a nih pawhin pahnih khat bak an neih theih ka rin loh chhiava nen khan an hming pawh kan la hriat ngai loh te thleng thlengin Aizawl khawpui khan an lo thlang tling si a, Politics hi chu sap ṭawnga unpredictable tih hian a hrilh fiah kim ber a nih hi.

Awle, chuti chuan kum 2023 ah kan lo chuang kai ta vang mai a. Tun aṭangin sorkarna siam theitu tur party i inrin siak chho mai mai teh ang u. Kan ram hruaitu atan kum 5 roreltu tur kan thlang dawn a ni si a.

Kum 5 chu a fuh chuan kan ram rethei tak hian a ṭhat pui dawn a ni. Kum 5 chhung roreltu chhe tak kan thlang thei tel bawk a ni. Chu chu mipui vote thlaktu turte hian hre rengin vote thlak ila.

Tute nge tling dawn hre ve uk lo mah ila, hriat a chakawm avang hian kum tluanin titi tui berah kan nei ngei ngei ang tih chu a chiang chho a ni.