Kamrul-a hi MNF tan Tlak chhan tham a tling...
Kum 2023 kan lo chuan kai rual hian kum tawpa MLA kan thlan tur rilru lamah a lo lang a. MNF hi tun hma anga Term hnih sorkar tur angin anni lam an in ngai a, Congress leh ZPM hian Term khat chiah sorkar turin an ring thung ang. Tun ṭum thuziakah hi chuan an tlak theih chhan tam tak zinga thil lian tak pakhat chiah i thur chhuak dawn ang hmiang:-
MNF sorkarin hnam dang Contractor chuam an nei tlat hi an tlakpui theih chu a ni. RTI Act hmanga dil chhuah document zozai en hian thil nih phung pangngai piah lamah Kamrula hming hian Mizoram mipui pawisa an khawih che vel niin a lang. Chief Minister hi a thu ber avangin Chief Minister leh PWD Minister ni kawp hi kan puh lo thei lova, Kamrul Laskar-an Mizorama contract hna lian a pumbilh nasa hi a phenah hian mihring dang hi an awm ngei ang tih a rinhlelhawm a ni.
Construction lama thiamna sang reng reng nei lo, engineer leh architect lam pawh ni si lo, management lam leh finance lam thiam ni chuang si lo, Vai rama Construction Company lian nei pawh ni loin hna lian a pum hmawm hmiah hmiah hi chu MNF Worker hlei hlei hian an ngaithei lo a. Vairama link nei ṭha Construction Company pawh ni lo Cachar District lam mi Vai pakhat hnena Mizoram hna lian pek fo hi Mizo mipui hian an ngaidam thei lo a nih chuan MNF hi an tlak palh chuan Kamrula hi an hre chhuak ngei ang.
Lengpui Airport lah chu hripui len lai pawhin Kamrul-a hian a sa mup mup a, a sa chim zui a. A mualpho hlim hlawl chu bân chu sawi loh MNF sorkar chuan Class I Contractor lamah an kaisan tir a, a hma zawnga vaibelchhe tel a khawih chet khan Class I Contractor pawh a lo ni bawk si lo.
Document lama a lan danin Airport sa turin February 2021 khan RCC Box Culvert siam hna cheng nuai 94.46 man pek a ni phawt a, April 24, 2021 ah Lengpui Airport cheiṭhat hna (Operational & Non-Operational) a hmu a, Airport hna ringawt hi cheng nuai 1959 man a ni.
September 20, 2021-ah ni khat thilthuah a rualin hna pathum a hmu leh ṭhawt an ti. A ruala a hna hmuhte chu Airport Internal Electrification cheng nuai 259.81, Centralised AC cheng nuai 414.46, Aviation Complex aṭanga Airport panna siam hna cheng nuai 91.71. Lengpui Airport ah ringawt thla 7 chhung lekin hna lian a vaiin cheng nuai 2819.44 zet a hmu a lo ni reng.
Kamrula contract thawh zawng zawng hi social media lama a lan dan chuan cheng nuai 11643.96 a tling - chu chu Mizoram Sorkar hnuaia Department 27 te Budget aiin a tam zawk an ti! Siaha District chhunga Siasi to Chakhang road siamna pawh kha MADC pe loin Kamrul-a bawkin nuai 4,000 man vel a chang an ti leh bawk.
MNF worker tam zawkin cheng nuai 1 man pawh hna an hmuh theih loh laia Class I Contractor a siam chawp berin hna a hmu thei zur zur hi Worker ngaih a ṭha tawh zozai lova, kum 2023 kum tawp Vote thlak dawnah hian Kamrul-a lam ṭanga vote thlak duh leh duh lo hi a MNF chhungah ngei ngei pawh an phir dawn niin an sawi.
Kamrula hi a mimal hian pa khawngaihthlak tak niin a lang tawh zawk a, a hminga pawisa che vel a tam si a, amah hian a pawisa hi a tel ve leh si lo a nih phei chuan a hmingchhiat a tuar ang a. MNF tana tlak phah vang vang tur khawpin an lo vûr tawh si nen, kum tawpah MNF hi an lo tla palh a nih chuan a Kamrula vang ni lovin Kamrula vulhtute vangah puh zawk tur a ni ang.
- Lalkailiana