WORLD CUP FINAL THLIRLETNA

Argentina chu World Cup 2022 Champion an ni ta. Kum 36 hnuah an champion leh thei ta hlauh mai. Argentina leh an fan zawng zawngte kan lawmpui em em a che u.

World Cup 2022 Champion Team captain Lionel Messi a ropui hle. Maradona nge ropui Messi tih chu nakina ṭhangtharte inhnialna tur a la ni ngei ang.

Lionel Messi hi a lawm­puiawm tak zet a, kumin World Cup-ah khan a thiamzia leh talent a neih ṭhatzia a pho lang chiang hle. World Champion ni tura hun a duh reizia leh a hautakzia a ngaihtuah letin champion an nih hnu hian a mu nui ver ver ṭhin ngeiin a rinawm. A lawmpuiawm em em e.

Rafael Nadal chu Roger Federer aiin Grand Slam-ah Champion hnemin Olympic (Tennis) ah hial champion mahse mi tam tak chuan Federer an dah chungnung zawk tho. Chutiangin Messi hian lawmman ropui dawng hnem zawk mahse Portugal ram pumpui leh Real Madrid fans tam tak chuan Cristiano Ronaldo an dah hniam phal bikin a rinawm lo. Chu chuan mihring kan thuhmun vek lohzia a hril thui viau awm e.

Khawvela football thiam ber pawl Ronaldinho bawl chhaih kual vel kan hmu hman te, Messi leh Ronaldo vanglaia an ropuizia mit ngeia hriatpuitu kan ni te hi vanneihna chi khat a ni hrim hrim.

Federer leh Nadal thiamzia leh chhuanawmzia kan hmu te, Hamilton leh Schumacher te car khalh thiamzia kan mit ngeia kan hmu ve leh an hun laia kan lo nung ve hi insawitheihna tham a ni ngei ang, khuareiah.

A tawp nan World Cup Final match a zawnga ropui ber pawl ni pha hial tur, 2022 World Cup final-a champion team Argentina, team captain Messi leh Argentina fan zawng zawngte kan lawm­pui em em a che u.

- Lalhminghlua NKB