"Ka lo ṭawngṭaisak ang che..."

Vawi khat chu dam lo reng mai, damdàwi inah pawh awm zak zak tawh, rawn ṭha chhuak leh ta hi an inah kan léng a. A lo lãwm êm êm mai a.

Heti hian a lo sawi siam siam mai a. Min chibai pah chuan, In mi ṭawngṭaisak vàng liau liauin ka lo dam leh ta. Ka va lãwm tak êm! a ti a. Kei lah pek chuan, Ngáwi teh, min lo hre thiam la, i hming lama ka ṭawngṭaisak che pawh ka va hre lo êm áw! I lo dam leh hi a làwmawm; mahse, ka ṭawngṭaisak lo che a nia, ka ti a.

Mah rêng rêng se, ka lãwm hrim hrim, a ti a. Ka kalpuite chuan, khatia sawi kher a ngái em ni ṭawngṭaisak angin awm vè mai la... min ti a. He thu máwi tak hi Mizo Kristiante hian inhnemna thû atán, hawihhàwmna ṭawngkam atán te kan hmang thla zen ni berin a lang.

Dam lohna thilah, keimahni mimal thilah, politics thilah, chhúngkaw thilah, zirna hlawhtlinna atán, kan eizawnna atán leh thil dang dangah hian, min lo ṭawngṭaipui rawh u, tìin.

A lo dawngsawng­tûte lahin awlsam êm êmin, Ka lo ṭawngṭaisak ang che, tiin kan thlah mai zêl bawk a. Awlsam taka kan sawi mai ang hian a tak takah kan inṭawngṭaisak em tih hi ka ngaihtuah fo ṭhìn.

Mi tam tak chuan, ka lo ṭawngṭaisak ang che, kan tih hian kan ṭawngṭaisak ang. A tam zâwk hi chuan kan sawi chin chiah bâk kan tih a rinawm lo thung.

Thil hi awlsam takin kan sawi puat puat a, a taka kan tih loh, kan hlen chhuah lêm loh hi a va tam dáwn êm!

Politics tual záwlah lah kan rin loh êm êmte'n Pathian hming lamin thû an han sawi vè a; a tak taka an chêt vêlnaah chuan Pathian duh záwnga thil tih áiin Setana duh záwngin an tàl buan buan ang lawi a! Pathian hming lam chung renga sual tih hreh miah lo rawngbáwltu, ram hruaitu hi kan va tam dáwn ve le!

Ka lo ṭawngṭaisak ang che, tia sawi liam puat a, ṭawngṭaisak leh si lo hi kan tam ngawt ang. A lema nung hi kan tam ta êm a ni. Kan ram hi siam ṭhat ngái a va tam êm! Lem chang kan tam ta lutuk e.

- R.Zomawia