INSIAM ṬHATNA PINDAN

Biak In ropui leh nuam tak takah lawi lutin, TV leh social media lamah sermon leh infuihna thu ṭha pui puite ngaithla chung leh, gospel camping-ah piantharna nun danglam hmuh tumin bei thin mah ila. A tawpah chuan rimawi ri leh mipui zai thawm awm lohna khawharna ruam, keimahni thinlung chhungril ngeiah hian piantharna leh insiamthatna pindan chu a lo awm a. Chu pindan khawhar chu rehin ruak hle mah se, hringnun khawhmuh hi a lo fiah em em zawk a. Nun danglam nei tura mahni bawk kan lo pawimawh zia chu a lang chiang leh ṭhin.

Mahni ṭhatna hmu lian tak, tling inti em em an awm a. Sual inti tak, mi zinga inkiltawih, tling lo inti em em an awm bawk. Tu bula awm hi nge hahdamthlak zawk ang le? Sual ni-a inhria, that tum dêr lo, nun hlui thlah liam tum lo mi an awm a. Mahni tawka ṭhat tum tlat, suala tlu lo tura inveng ngar ngar, thil tha tih zel tum mi an awm bawk. Tu hi nge hrawn nuam zawk ve thung ang le? Mumang leh suangtuahna khawvela thil ropui ti, mang hausa leh nuam neia lungawi kumhlun a awm theih a. Suangtuahna tihpuitlin tum, thlen chin zela rahbi khat tê têa hmasawn tum tlat, a tak rama che chhuak ngam an awm bawk. Heng mi chi hrang hrangte hian khawvel kan luah mek chu a ni si a. Eng ang mi hi nge tam ber ang le?

Mi hausa, thinlunga rethei an awm a. Mi rethei, thinlunga hausa tlat an awm ve bawk. He hringnun hian sum ngah, hmingthan, finna leh chungchuan bikna nei tur ngawtin min zirtir a tum lo. Lemchanna telloa tlawm taka nun leh mahni inphata midang tana inpekna thinlung neih tlatna theihna hi zir thiam turin min duh a ni. Ka tana thil ṭangkai lo pawh a tan chuan thil hlu tak a ni thei a. Ka hluihlawn hnu pawh a tan chuan hlutna tam tak pai rohlu a ni thei. A kalsan tak kha ka tana ro thar a ni thei angin, a hlutna a man phak loh kha ka tana lunghlu ang maia manto a ni thei. Kan ngaihhlut leh mamawh a inang lo a, kan mizia leh ngaihdan pawh a hrang thei. He khawvel lei daia thamral vek tur ni chung si hian, engah nge thlei bik, ngei bik leh khei bik kan neih fo thin..?

Mi zawng zawng i tilawm thei lo tih hria la, i nun dan pawh an pawm vek kher lo ang. Chung zawng aia pawimawh ber zawk chu, nangmah leh nangmah inpawm thlap turin i nun a ngai thung.

Na tuara rum chang i ngah ang. Nimahse, indawm kun mai ngai suh ang che. Natna hi hringnun peng pakhat a ni. Natna tin hian zirlai min pe vek a. Chu zirlai chuan mihring nun hi a thlak danglam ṭhin.

Hnah hluite chu hnah tharin a thlak a. Hnah hmasate chu hnahthel tla ro, lei daia thli leh ruahin a chhem lên hnua a nan zawp mai tur an lo ni ta ang hian, kumhlui chu kum tharin a thlak a. Kum kaltaa kan thil tih zawng zawngte chu nunhlui, kan hmanhun atana tangkai tawh ngai lo turin a herliam ve ta. Chutiang zelin kan thil tihsual tam takte kha hunin a liampui tawh a. Siamthat theih loh zawng chu kawlah a herliam tawh. Danglamna thlen turin tun hun leh hmahun kan la nei a. Mahni tan chauh ni lo, min Siamtu leh he khawvel thim zinga arsi êng tak pakhat ni ve turin i han bei tak tak teh ang u.

- Jeremy M. Pudaite

7640939065