KRISMAS LEH KUMTHAR VUAKVET THLIRLETNA

Zofate leh khawvel puma kristiante hun ropui ber pakhat Krismas pawh tluang taka hmang zovin kumthar 2023 kan lo chuangkai leh ta reng mai. Kum hnih chhung zet Covid-19 hripui lengin min tihbuai hnuah Mizoramah pawh dan pangngaiin khuahkhirhna engmah awm tawh lovin kan hmang leh thei ta a, a lawmawm hle mai. Kum 2022 Krismas leh kumthar lawmna boruak i han thlirlet thuak thuak teh ang.

Kawn chei mawi

Mahni In leh a vel bakah khawlai/ kawn chei kan uar ta hi a fuh ngawt mai. Krismas hmuahna leh lawmna hmahruai a ni a, mi tam tak rilru a chawktho thar bawk. Nikumah pawh Aizawl Municipal Corporation (AMC) bultumin veng tam takin kawn an chei leh ta a, tlawhtu pawh an ṭhahnem ṭhin hle a nih kha. Chutihrualin kawn chei hi hun leh tha bakah sum leh pai a hautak viauin a rinawm. Chuvangin, kan kawn chei tlawhtute aṭang hian pawisa lakluh dan kawng zawn a hun tawh em? Entirnan: Kan kawn chei huam chhungah khan thlalakna hmun (photobooth) nalh tak siam ila, kha hmuna thla la duh apiangte hnen aṭangin mi pakhatah Rs 10/- zel lo la ta ila, kan senso engemawchen chu a phuhru ve thei mai lo maw?

Bazaar a lun...

Krismas dawnah meuh chuan Mizoram hmun tin aṭangin bazaar turin Aizawl khawpui kan pan khawm a, Aizawl khaw chhunga lo awmsa ho nen bazaar a lun ṭhin khawp mai. Building ṭhenkhat sak ṭhat tum lai a lo ni nen tuna kan bazaar hmunpui ber chuan mipui a dawl zo ta lo hle mai. Thawmhnaw lam emaw ei in zawrhna emaw bazaar lian hi a hrangin hmun hran daiha neih kan mamawh tawh hlein a lang. Ram hruaituten thil thui tak thlirin ngaihtuahna nasa zawk seng thei sela a duhawm mang e. Tin, krismas dawn bikah hi chuan zan lama bazaar hi uar deuh deuh ila, chhun lama mipui tawt lutuk hi a ziaawm phah ngei ang.

No Vehicle Zone

December ni 23, 24 leh 31 ah khan Zodin Square leh Chanmari inkar kawngpui chu lirthei tlan phal lohna hmunah puan a ni a, mipuiin kan hmang ṭangkai hle. Mi tam tak, bazaar tur em em pawh ni lo, a ṭhente chuan chhungkuain nau nawi nen chhuah thawven nan an hmang a, khawlai dungah ennawm tam tak hmuh tur a awm bawk. A ṭhenin charity concert an lo buatsaih a, a ṭhenin lu an lo met bawk a, music video shooting neite thlengin he No Vehicle Zone hi an hmang ṭangkai viau mai. Hun lo la kal leh turah pawh tun aia ṭangkai zawka kan hman thiam a pawimawh.

Huau huau lam

Nikum December thla chhung khan Mizoram hmun hrang hrang leh a bikin Aizawl khawpui chhungah intihhlimna hun leh hmun buatsaih a tam a. Veng hrang hrangin Carnival leh Concert-te an buatsaih a, mipuiten an hlutin kan zaithiamte pawhin an hlawkpui hle nia lang hi a lawmawm. Hetiang Carnival leh Concert-te hi Pathian kan biakna daltu ni si lova mihring nun tihlimtu leh ti zangkhai tur atana kan buatsaih uar deuh deuh a ṭul. Chhungkuaa kalna tlak leh him, gospel emaw lengzem/ lenglawng concert-te hi awm fo zawk se la, zai leh lam leh rimawi hmangin nun kan ti hahdam thei ang a, taksa leh rilru hrisel nan a tha viau lo’ng maw?

Halpuah/ Halmawi chungchang

Sawrkarin krismas leh kumthar vuakvetah halpuah leh halmawi lam chi zawrh leh hralh bakah hal thlengin a khap a nih kha. Mahse, khap tamna ramah hian kan khap hlawhtling lo ber awm e. Kum hlui thlah zan khan zan tir aṭangin a puak zeuh zeuh a, zan dar 11 leh zing dar 12:30 inkarah phei chuan puak nasa tak a ni. Sawrkarin a khap hlawhtlin loh chhan ber nia lang chu mipui rilru a hmin hmasak loh vang a ni mai.

Mi ṭhenkhat chuan khap tam lutuk hi an ngaithei lo a, sawrkar run luih tum hrim hrim a hal lui pawh an tam viau. Vai ho hunpui Diwali-ah khap a ni ve ngai lote leh Assam Rifle ram chhung aṭanga hal an awm fo te chu mi tam tak ṭanfung leh inthiamchawpna a ni. Sawrkar Department te pawh an ṭangrual thei lo a nih kha mawle. Home Department-in a khap laiin Tourism Department chuan an official social media page/ account lamah a video leh thlalak nen kumthar chibai buk nan a pho chhuak thung si. Sawrkar hian a khap leh dawn a nih chuan Local Council leh NGO dangte nen khauh taka dan lekkawh chung a, hlawhtling ngei tura a bei a nih loh chuan a hlawhchham nawn fo dawn a ang. Nge ni a, mi tam tak rawtna ang hian halna hmun leh hun bik siamte hi a fuh tawh zawk ang em?

Thlarau lam dinhmun

Hripui leng avangin hun rei tak kan inkhawm mumal thei lova. Khuahkhirhna awm lova inkhawm theih a nih hnu pawhin hripui len hma boruak ang kha inkhawm tam lamah kan pha thei meuh tawh lo tih hi titi tlanglawn mai ni lovin Vanglaini ngeiin a zirchianna aṭanga a hmuhchhuah a nih kha. Tun krismas boruakah pawh Aizawl khawpui bikah chuan Biak In a inkhawm leh zai lenkhawm boruak thlengin hripui len hma kha chu kan pha lo deuh em aw a tih theih. Hei hi hripui lengin a nghawng kal zel nia rin theih a nih bakah hun leh hmun dangah chhungkua leh ṭhianho a intihhlimna a tam tak vangte pawh a ni ang.

Krismas boruak lo thleng tur hi tisa leh thlarau lamah pawh nasa takin kan inbuatsaih ṭhin a, pawisa pawh kan hman nasat ber hunlai a ni. Thlarau lam thil bakah kawng hrang hrangin he hunpui hi tun aia nasa leh uar zawk hian hmang zel thei ila. Kawn chei te, No Vehicle Zone leh Mizorama krismas boruak hrim hrim hi kan State pawn aṭanga khualzin hip luhna remchangah chantir thei ila a va duhawm em. Engpawhnise, kumthar chibai le.

- Lalnunmawia