Kumthar kan chuang kai!

Kum thar kan chuang kai a, kan vannei hle mai, thleng leh tur chuan ni tam tak kan nghah a ngai. Kan hman zawh tak Krismas leh Kumthar lawmna te, kan hman danah kan lung a awi em, TV-ah te lo lang dawn ta se i zak chem chem dawn nge, i hlim dawn?

Awle, tam tak chuan zu in nan, zah­awmna hlauh phah nan te kan hman ka ring deuh. Pathian chibai buk nan, inhlan thar nan, etc., atana hmang engzat nge awm ang aw?

Kan Kristian pui­ten ram chhung leh foreign-ah te engtin nge an hman ve hlawm aw? Kum hnih lai chu hri leng avangin kan hmang mumal thei lo va, tunah kan lo hmang pangngai ve leh thei ta e.

Nun i uluk ang – Kum bul kan tan, kum tawp thleng leh tur chuan a la rei dawn. Pathian thil siam ropui tak kan nih rual hian, thi thut thei, vanduai thei reng kan ni. Chuvang chuan kan hun leh nun te ṭha taka kan hman a ṭul. Zu leh ruihhlo ngaite pawn sim kumah puang ila, zuk leh hmuam ti mite pawn bansan ila. Hlep ru ṭhin te, thamna la ṭhin pawn sim sela. Mi uangthuang leh dawt sawi chingte pawn sim sela.

Kan politics khelh­naah te pawh fair tak leh phuahchawp tel lo ni thei zel sela. Pathian rawng kan bawlnaah pawh nikum ai khan in lak fir tum ang u.

Inthlan kum – Kumin chu inthlan kum a ni. Kum nga chhung atan MLA kan thlang leh ang. Kan sawrkar kal tawh te han thlir kir ila kan lungawi em, a nih loh chuan kumin hi duhthlanna hun remchang a ni. Policy, manifesto te, ram tana ṭha tur zawng chauhin duang ila, chuti anih loh chuan keimahni leh ram in a tuar dawn,hnam dang ten min la nuihzat mai ang.

Hlim takin – Kum bul kan ṭan dawn a, i hlim phawt mai ang. Zirlai, hna zawng mek, kuthnathawk mite pawh ni ila eng ti mi pawh ni ila i hlim phawt ang u aw. Mihringte hi kum­hlun tur kan ni lo, chutiang bawk in thil siam dangte pawh.

Engpawhnise, lokal lehna thlen hma chu khawvel hi la awm reng turah ngai ila, ṭhangthar duhawm tak takten an la rochun zel dawn. Taima takin hna kan thawk ang a, rorelna hmaa ding mai thei turin kan inbuatsaih bawk dawn nia.

Kum thar 2023, tuma la thlen ngai loh kan thleng a, a hman chhoh dan turah erawh keimahni thu a ni e. Hlim tak leh ṭha taka hmang thei turin duhsakna ka hlan a che. Kumthar chibai.

- Lalchhandama Colney