KRISTIANTE RINNA VAWN HIM: SAWI ZAUNA TAWI

Mizoram Pres­byterian Kohhranin kumin 2023-a Puitling Sunday School Zirlaibu atana a hman 'Kristiante Rinna Vawn Him' bu hi lehkhabu ṭha tak a ni.

Sunday School-ah hian dàn zawh kim naupang tê tê aṭanga pitar/ putar leh, mi thiam leh mi mâwl bertena zirlai bu pakhat inhman ṭawm tur ziah hi chu thil namen a ni lo vang. A ziaktu Rev Rosiamlian Tochhawng Christian Apologetics-a mi thiam a nih avangin nakin zel atan pawh he lehkhabu hi lehkhhabu hi ràwn tling 'book of reference' a ni ngei ang.

Chutih laiin, rinna vawn himna atana pawimawh inneih pawlh ṭhat lohna chungchang hi ziah thlen ni lovin a lang a. Kohhran tana ṭha zawk a nih avanga ziah tel loh ni-ah ngai ila. Heti chung hian, tlem azawng chu i'n thai ve hrim hrim teh ang.

Inneih pawlh chungchang hi Ezra leh Nehemiate pawh khan an lo buaipui nasa hle a ni.

Amon mite, Moab mite nupuia an neih luih tlat avang leh an fate phei chuan Juda ṭawng thiam lo hial khawpa hnam dangte nena an inneih pawlh avangin Nehemia hi a thinrim viau a ni tih kan hmu (Nehemia 13.25). Hnam dang nupui neite chu a khak a, àn chhia a lawh a, a vua a, an sam a pawh ṭilhsak a. An fanu leh an fapate chu hnam dang fanu emaw fapa emaw neihtir lo turin chhia a chhamtir.

Chutiang bawkin Ezra pawhin inneih pawlh chungchang hi a vei hle (Ezra 9-10). Inneih pawlh avang hian hnam nun siam ṭhatna kawngah harsatna lian tak a awm avangin, Ezra hian then thianglim hna a thawk ta a ni.

Israel mite chu hnam dang an neih avanga Mosia thu­thlung an kalsan mai loh nan an nupuite a ṭhentir hial a ni. Ti lutuka ngaitu an tam maithei; mahse, hetiang tak hian Judaho hian a hun lai khan hnam nun siam ṭhatna kawngah hma an lo la a, tun thleng pawh hian an hnam din chhuahnaah kawng ro a su hle ang tih a rin theih.

Hetianga hnam nun siam ṭhat hna an thawh hi an sakhua tan pawh a ṭha a, keini keini Thuthung Thar huna Israel fate hian kan rinna vawn him nan inneih pawlh chungchang kan vei a ngai hle.

Inneih pawlhin a hrin chhuah chu hnam ralna a ni a, hnam ber a ral chuan Chanchin Ṭha hril tur kan awm dawn lo tihna pawh a ni ang chu.

'Rinna' tih hian a huam tel chiah lo nia langin, zirlai buah ziah tel ni lo mah sela, hetiang lam hawi hi Sunday School zirtirtute hian a remchan dan anga an sawi lan tho hi a ṭha ang em tih chu ngaihtuah zui tham tak niin a lang.

- Dr J.T. Vanlalngheta,

Thàipui Rûn