- MLA bo zawnna

Calling Champhai ṭhalaite, kuhva hâl issue awm laia in MLA bo pahnih kha in zawng hmu tawh em aw? Champhai ṭhalaite zan khaw tairek thlenga in men lai pawha MLA nei lo ang maia reh san tlawk tlawk in nih khan, kum 2023 hi chu in hmu lâwk tho ang ti rawh

u maw?

Calling Lunglei ṭhalaite, RTPCR hi Lunglei lamin in mamawh loh thu sorkarin a sawi hnan piap piap che u khan, in MLA neih zozaite khan tu mahin in thlavang kha an hauh ngam lo va, nangni voter aiin ruling party hruaitu an hlauh zawk avangin an tlawm bosan che u a, High Court lamah ṭhalaite in kal avangin sorkarin Lunglei mipui a hmangaih vang ni loin Court thupekin RTPCR khawl chu bun a lo ni ta a, in MLA zingah in thlavang hauh ngam pawh an awm lo.

Kum nga dana inthlang ṭhin kan ni hi a ṭhatna chu, tu mah hi kan chungah an lal reng lo. Tute emaw hi an inluling a nih pawhin kum nga hnuah bûk an ni leh a, kan thlan duh leh duh loh chu mipui kut a ni tawh. Champhai ṭhalaite hian Champhaia issue lian tak a awm chhung zawnga reh tlawk tlawk mai kan MLA te hi kum nga dang kan la duh leh a nih chuan kan thlang leh thei a ni. Lunglei ṭhalaite pawhin kan MLA te hi kan la duh a nih chuan kumin kum tawpa inthlanah kan thlang nawn leh thei a, thutlukna chu ṭhalaite kutah a awm a ni.

MLA bo kan tihte kha an bo tawh ka ring lo. Mipui vote an duh avangin an rawn inlar leh ṭan dawn a ni. An sual vang a ni lo ang a, party an dah pawimawh lutuk vang a ni zawk a, hei hi Mizoram ṭhan mawh bawk chu niin a lang a, party dah pawimawh avanga mipui tawrhna hi a thleng ṭhin a ni. MLA kan neihte hian mipui aiin party an dah pawimawh ṭhin avang hian mipuiin kan tuar ṭhin a ni.

Kum 2023-ah hian tu party pawh lo thlang tling ila, kan thlan tlinte hian kan mamawh let ve hunah min bik bosan tawh lo se a ṭha ang. Kan thlan tlinte hian mipui hi min phatsan tawh lo se a ṭha a ni.

- Mahruaitea