Mahni Airport neih chhun chima ngawi ral thei Mizo mipui leh Mizoram Political Party hi kan zavaiin kan nêp

March 10, 2022 khan Mizoram history-ah thil pawi tak a thleng a, Lengpui Airport siam ṭhat mek chu a chim. Lirnghing, thlipui, tuilian, ruahsur nasa leh misual kutthlakna vang ni loin a sak a chhiat em avangin a chim a ni. Hei hi Mizorama Political Party opposition Congress, ZPM leh BJP chuan Press release hmangin an dem a, a zo der a ni. Mipui aiawh Central YMA, MZP, MSU chu an ngawi tluan ta a ni awm e, an ngawi lo a nih pawhin sorkar tana ngaimawh thamin an che eih lo, eng hnam nge maw kan nih le? tiin zawhna ka inzawt nawn fo ṭhin.

Mizoram First Movement (MFM) chiah a takin an che chhuak ngam. Lengpui Airport tihchangtlun hna inpek chungchangah dan bawh­chhiatna a awma hriain a mawhphurtu Chief Minister chu chhui turin Lokayukta-ah an zualko a, hei hi chu Airport chim lam aiin a hna inpek danah an rawn au chhuak a ni a. Hei pawh hi kan Central YMA-te hi chuan an ngaimawh lo a nih loh pawhin an sawi chhuak reng reng lo a, ruihhlo do lam aiin hetiang do ngam Central YMA hi kan mamawh hian ka hre ṭhin a chang hi chuan.

Mizoram First Movement te chuan Chief Minister chu thuneihna hmang sual leh chhungkhat laina nasa taka duhsakah an puh a ni. Covid hri len laia hna inpek Airport chei ṭhat hi KR Construction (Kamrula) bakah Zoramchhana ten an thawk a. A chim hi chu Kamrula sak lai a ni a, hna pangngaia inpek ni loin midang chhan ve theih lohin restricted tender hmangin an inpe a, an hna inpek dan hi Mizoram First Movement chuan dan bawhchhiatna awm ngeiin an hria a Chief Minister Pu Zoramthanga chu Lokayukta-ah an hek ta a ni.

All Mizoram Cement & Iron Rod Dealer's Association (AMCIRDA) chuan Airport chim hi a hmun ngeiah kal chilhin an en chiang a. Mizoram Sawrkar hnuaia Quality Control of Cement and Iron Rod Committee in Mizorama lakluh a khap, BIS Standard ni lo, Rod size (diameter) tling lo, company brand pathum; SMS Durgapur, Trishakti Durgapur, Zeecon Durgapur-te an hmang niin thuchhuah siamin an tarlang a, hei hi criminal case awrha tham a ni em? Kan ukil rual pawhin heng thil hi FIR te thehlut se, a theih phei chuan PIL te thehlut se state danga tih angin, kan dan hre mite ber pawh an ngawi si a, hengte hi 'I vengte hêk suh' tih nen kan ngaih pawlh kual a nih ngawt loh chua ukil chetna tham a tling a ni.

AMCIRDA sawi dan chuan BIS Standard ni lo, rod size tling lo hman avang hian concrete structure chak zawng 30% dawn laia a tlak hniam theih thu leh, building structure lianah phei chuan hman a him lo lehzual nia an hriat thu tarlangin, chhiatrupna lian zawk thlen thei, "Mangkhawng Lianpui" kan siam anga an ngaih thu an thuchhuahah an ziak. AMCIRDA hmuhchhuah chu hetiang hi a ni:

20mm turah 17.8mm - 18mm an hmang,

16mm turah 14.8mm an hmang 10mm turah 8.8mm hman a ni

8mm turah 7.8mm, te an hmang a ni.

Mizoram Mistiri Assn. Gen. Hqrs pawhina hmunah ngei an kal chilh a, an thil hmuh chu thuchhuah hmangin hetiang hian an sawi a, 'He hnathawh danah hian Mistiri chu thawktu pawimawh tak nimahse, Contractor emaw supervisor emawin mawh an phur hle in kan hria a. Rod zawm dan leh cement proportion a dik tawk lova, tui a mamawh ang an pe lovin kan hria a, chu chuan concrete chakna tam tak a tichhia a. Tin a ban leh beam, slab tlo dan tur angin a tlo dawn lo tih a chiangin kan hria a ni. Tin, Terminal Building kawta kawng chhawng tur an siam mek pawh a structure a dik tawk lo hle in kan hria. Mizoram chhunga construction hnathawh reng rengah contrac­tor emaw a hna viltu, supervisor ten hlep nasat tumna avanga hmanraw hman chhiat leh hna uluk lo tak mistiri hna an thawhtir ṭhin hi pawi kan ti a, hetiang hi thleng tawh lo se kan ti," an ti a ni.

He thil thleng zahthlak takah hian March 11, 2022 khan sorkar lam chuan thuchhuah an siam ve leh a, 'Baggage Make-Up area hi a vaiin 520.02sq.m a ni a. Heta ṭang hian 238.50sq.m hi slab chhun zawh tawh a ni a. A bang 281.50 sq.m hi chhun lai mekin a chim ta a ni. He slab chhun lai chim chhan ber nia lang chu lei aṭanga slab san zawng hi 6.00mtrs laia sang a ni a, chu chu form work/shuttering chhawng thuma mau leh thing hmanga do a ni a. Slab chhun lai a tihmuk nana vibrator an hmanlaiin a dona mau ṭhenkhat hi a pelh palh a, chu chuan a slab chhunlai 281.50sq.m hi a tlakpui ta a ni. Dt. 11.3.2022 zing dar 8:30 khan a hmunah Contractor leh Engineer-ten an enho nghal a, ṭha taka siamṭha leh tura hmalak nghal niin Contract Agreement ang ngeiin Contractor hi sum sen belh awm lova siam ṭha leh tura hriattir nghal a ni,' tih a ni.

Kan Airport neih chhun chu uluk lo satliah mai ni lo chim khawpin contractor Kamrul-a chuan a sa a. NGO an ngawi a, Political Party te chuan thuchhuah siam an duhtawk a, kum 2023 inthlanah pawh a duh duh tling mai mai teh se.

- Lalthanpuia