Nuai 3 intiam hi tlakpui tham....

Hman ni khan MNF tan Kamrul-a hi tlakpui theih a nih thu kha kan lo chhiar fuh tawh a. Khami zulzui ang khan thu thiam pui ni mah suh ila cheng nuai 3 sem intiamna kha ka rawn tuihnih ve a ṭul hian a ṭul.

Kan dil leh kan phût pawh ni lova cheng nuai 3 min tiamtute hian min pek leh si loh chuan kum 2023 inthlanah hian Mizo mipui vote an hmu tlem pharh dawn a ni.

Tun lai hian thu­sawi lar tak pakhat social media lama kan hmuh chu bial (Constituency) tina sem tur hian Special Assistance to States for Capital Investment hnuaiah central sorkar hian pawisa a pe chhuak a.

Mizoram pawhin cheng nuai hlir 39,000 vel a dawng dawn an ti a ni. Hei hi kan pute cheng nuai 3 tiam kha a la ni hauh lova, hei hi a lo thlen tak tak hunah chuan sorkar hian pawisa hman tur a neih belh dawn a, mahse a hman dan hi a sema sem ni lovin project siam a ngai tlat a. Chutah chuan capital investment atan a ni a, hei pawh hi loan tho a ni.

Inthlan dawnah kawngpui siam te, hall sak te an rawn tiam chur chur dawn tihna a ni.

SEDP hi chu state sorkar intiamna liau liau a ni a, cheng nuai 3 mai ni lovin cheng nuai 3 aia tlem lo hi tuna kan Chief Minister hian Mizo mipui min tiam a ni. Min tiamtu chuan min pe tur a ni.

Min pek theih loh chuan kum 5 dang atan kan ring thei dawn tawh si lova. World Bank, Asian Development Bank, NABARD, Open Market Borrowing etc etc etc aṭanga sum puk hmanga lo sem dur dur theih a nih loh pawhin min sem ngei ngei loh chuan kan vote lovang.

Congress khan cheng nuai 1 an tiam a, an sem ngei a ni. MNF hian nuai 3 min tiam a, Rs 50,000 sem avanga vote hmuh leh huk hi an beisei a nih chuan an tisual chhiava ang.

Mipuite hi social media awm hnu hian thil hria leh thudik hre chat chat an nih ve tawh avangin thingtlang hi kan mawl tawh lo bawk.

Thingtlang ṭhalai lehkhathiam hi khawpuiah pawh kan tam a, thil chinchang hre ve tawk kan ni e. Cheng nuai 3 in pek loh chuan thingtlang chuan kan vote nawn tawh lovang, nuai 3 min tiam avanga vote che u kan ni asin.

- Lalthantluanga, Khawzawl (Camp: Chanmari West, Aizawl)