Tute nge Smuggler humtu?

Mizoram Minister hlui Pu Zodintluanga chuan Mizoram sorkar chu smuggler humtu angin a puh ti ila kan sawi sual tam pui lovang.

Pu Zodintluanga thu­chhuahah khan, 'Assam sorkarin 'wanted' a an chhuah hial, Abub Ma­zum­dar chu Mizo­ramah zalen takin a awm,' a tih bakah Mizoram Minister inah chaw a ei tih a sawi hial a. Mizoram Chief Minister leh Assam CM zanriah kilnaah pawh a tel tawh tih a sawi.

Pu Zodintluanga thu leh hla aṭanga kan lo hmuh leh dang chu, smugg­ling lama Abub Mazumdar-a pu an tih, Musa Ahmed Siddiqui chuan Mizoramah vote a nei a, a zalen hle tih a sawi bakah Mizorama hruaitu lawk tak fanu nen an sawi zawm nghe nghe, tih a ni leh bawk.

Heti taka chiang teh fawka a sawi hnu pawha reaction a awm lo hian ngaihtuah a ti thui khawp mai. Pu Zodintluanga hian dawt muhlum a sawi a nih chuan ama lakah hian FIR thehluh hial tham a ni a, Mizoram sorkar a puh dan hi huatah an la ngam lo a nih chuan inthlan kum a nih hi hriat ve reng tur a ni.

Kuhva smuggling hi sawi mawi theih a nih loh chhan chu Hachhek tlang dung mipui eizawnna a tih buai vang hi a ni.

Bilkhawthlir leh Vairengte pawh a nghawng nasa tawh a, mipui thinrim an duty tawh tawp a, Mizoram sorkar tan chuan zahthlak tak a ni asin.

Vairengte leh Bilkhawthlir inkara kudam sak zozai te hi tu sak nge ni le? Kolasib DC khan a kalh sak hman a, kum 2019 khan Kolasib Bawrhsap Pu Zoengsanga chuan Vairengte leh Chhimluang inkar kawngpui NH-54 sira kuhva leh leiṭha kudam hi a kalh tawh a, a inhawn leh na phenah hian tunge awm ni le? Hei hi smuggler te thiltihtheihzia ti chiangtu a ni e.

Champhai DC Pi Maria CT Zuali chet dan leh a hnua thil thleng khan smuggler-te duh dan angin thil a kal hi a ang zui zel a ni.

Smuggler huaisenna ramah kan ram hi a chhuak zo tawh a, Mizoram hi Mizote ta ngei a ni; smuggler te ta a ni lo tih hi kan lantir a hun tawh e.

SEDP intiamna thelep vang mai mai khan i vote kha hralh suh aw, smuggler do tura ṭan rual a ngai dawn a ni.

- RK Lawmsanga, Ralte Rûn