Mipuiin smuggler an rin hriat

Pu Zodintluanga khan smuggler rorelna kan nih thu a sawi chhuah hma tawh khan social media lama post hrang hrang en kual hian, Mizo mipui hian a hming sawi lang chiah lo hian smuggler leh a puitu ni ngeia rin hi an nei a ni. An rinhlelh te hi sorkara thiltithei tak tak an ni tih pawh zep rual a ni lo.

Mizoram mipui hian smuggler hi an chhinchhiah chian theih loh pawhin rin dan an neih hi party tana chhiat pui tham a ni tawh si. Smuggling hi kan Assembly Election hmabakah hian issue lian tak a ni dâwn a ni.

History aṭangin entirna sawi ila. Zep thu a cheng lo a, Congress Minister pakhat kha MNF khan Khehpuam, pseudoephedrine hmanga sum­dawn­naah a inhnamhnawih thu an sawi a, kawng an zawh tawh a ni.

Kum 2013 khan MNF-in Pu Lal­rinliana Sailo, khatih laia Congress Health Minister kha Myanmar lam Smuggler Ram­panmawia nen thawk dun tiin an puh a, finfiahna pawh nei ṭha an inti hle.

Pu Rinliana kha Congress khan an chhan tlat a, tunah MNF lamah a lut leh ta si a, chutichuan he thilah hian thudik pawh hre lovin Mizo­ram chu kan hawi kan hawi ta mai a ni.

Khi khi chu entirna mai mai pakhat a ni a. Tunlaia Kuhva smuggling ve thung hi chu mi hrang hrang hi level hrang hrangah an inrawlh kual niin an sawi a. Police Check Gate pawhin rin a hlawh tawh loh chhante pawh hi chhui tham a nih laiin tunge zawhte chu ṭhi awrh tir ta ang le? tih bâk sawi theih a ni ta lova, mahse income dang sawi tur awm si loa hausa chak em em Mizoram sorkara mi thiltithei tak tak politician, politician chiah lo leh officer zinga an awm hi miin an ringhlel a ni.

Chu bakah chuan Minister ṭhenkhat hian Champhai lam an tlawh awl lo an ti a. Rangkachak smuggler ni ngeia mipui rinhlelh leh kan Minister/ MLA zinga mi inkawp tlat te pawh hi miin thil ri ret ret an lo hre leh ṭhin a ni. Kuhva kuhva kan tih lai ngei ngei hian rangkachak zawk hi a lo lian hle an tih chu.

Champhai lamah hian khawtlang pa rawn zingah kuhva smuggling vanga hausa tawntaw an tam avangin party tin, Congress leh ZPM pawh telin smuggling hi politics nen sawi kawp an hläu an ti a. Champhai District boruakah hian issue a awm a, fing taka bo daih thiam politician te an awm a ni.

Tunah tlan chhe ṭhin mahse miin thil an hriat ruk chuan September - October chhoah chuan a puak leh tho tho ang a, MLA aṭanga tlak phah tham a nih a rinawm asin. Mipui hi bum hlen theih an ni tawh lova, mipui zingah hian thil hre tak tak an awm a ni.

- Lalrinfela