Lirthei Ruk!
Ṭhianpa, engtin chiah maw i Royal Enfield Bullet chu a bo kha, thawm a reh vang vang a, insut ri hruih bak hriat tur a awm lo! Ka biak chu ka ṭhianpa a ni a, company hrang hrang hnuaiah hna a thawh fê hnuin a lirthei awh ber ama sum dehchhuah liau liau a leitu a ni.
Hripui khan an chhungkaw khawsak a khawih chingpen hle chungin, a lirthei chu a la vuan zui hram hram a - a hna aṭangin a thlawn hlawl a, an chaw bel a ruak zui lo chauh tawh a. A nupui fanaute muhil thaw ri sung sung chu zanlaiah mittui tla chungin a thlir zan tin ṭhin! An chenna Aizawl dai aṭang chuan khawpui lam hi ring fân iak iakin a thlir tuk tin a, ngaihtuah chhuah a nei - hna!
Cement work khawihin a tlangval laiin a pocket money tur a hlawh chhuak fo. Floor tile mam zaiha phah phei chu thiam tak a ni, chu chuan muanna a pe a - thawh tur zawngin Zawlkhawpuiah a lirthei nen a duk lut ri pup pup a, thawh tur a hmu nghal nual - taima tlat hek.
Hripui boruak pik karah chuan hnathawh theih zeuh hun a awm apiangin a inkhalh chhuak a, zan rei leh reh hnuah a lirthei nen chuan hah deuhin chil lem tur pawh nei tawh mang lovin a haw dut dut ṭhin. Chutiang chuan hun a hmang a, boruak a ṭha chho tial tial a, an dinhmun pawh a kang ve chho det det. Ṭum khat chu pawnah a lirthei dahnaah chuan thlamuang takin a lirthei chu a park khiau a - in chhung lamah a ni chu Mizo pa takin a hna a thawk a, vanduaina in a hmuak tih reng a hre lo.
Thlasik boruak vawt tak karah chuan a hnathawk zo chuan a lirthei dahna lam a pan a, a veivahna leh a hnathawh tur zawnna, a tel lova chet chhuah hleih theih hauh lohna, an chhungkaw ei bel a Royal Enfield Bullet chu hmuh tur a awm ta lo - a thinlungah chuan chiang takin 'ruk bo' tih hian a rawn deng dawt dawt a... A nupui fanaute a mitthlaah an lang nghal iar iar a - an khawvel chu pik tak a ni! CCTV aṭangin an han bih chiang a, damdawi addict satliahin a chhuk zawngin ti nung lova an nawr lirh a rin nen - teuh lo! Kawh putin chak zetin kawng chho-ah a rutu chuan a khalh chu an thlir liam nia!
Ka ṭhianpa te anga an eizawnna leh an lirthei inzawm nghet tlat hi he khawpuiah hian za tel an awm ang. Phone bo ang maia lirthei an han bo zui hmak ṭhin hi chu a mak a ni! State pawn lamah heng lirthei ke pahnih nei hi a pilbo zui a, hmuhchhuah nawlh hriat tur thawm a awm leh zauh ṭhin. Tak tak ni maw - lirthei chinchang hre ve tak, Mizo pawh ni lem lo, workshop lama lo thawk sil ve nel nual tawh hi an rinhlelhawm riau tih te pawh a ri leh ṭhin. Ṭhiante mangang hmel han hmuh chuan rilru a kal thui duh hle. Garrage chhunga ṭha taka dah lai thlengin a bo chu a ni ta - fimkhur a va'n ngai em.
Hripui kiam ta deuh mah se, Mizo tam takin an eizawnna an chân tih hi inhrilh nawn a ṭul. Mizo tih ve theihah hi chuan hriat chian loh hnam dang ruai lovin, Mizo ngei i thlang ngam teh ang u. Lirthei bo chungchangah te hian Mizo kuthlei aiin, hnam dang mi sual rual inthurual chetna a ang riau!
- Tpa Bunghai