PRESBYTERIAN KOHHRAN HIAN CHANCHIN ṬHA HRIL HI HNA PUI BERAH A LA NEIH ZEL EM?

A thupuia kan hman ang deuh te, kan kohhranin tuna kan thawh mek dan hi a ṭha tawkin kan hria em, tih te leh, Direct Mission leh Indirect Mission te khaikhin hian eng nge hlawk zawka kan hriat, tih te chu nikum 2022-a an Nilai thupuiah khan sawi ho tura chhawp chhuah a lo ni tawh a. Heng zawhna chhâng fai vek tur chuan a thu a thui dawn bakah keini ang tan chuan fiah leh kim taka chhan chu thil namen a ni lo va, a tawi thei ang berin, a hre zawkte rawn tui hnih atan 'in ziak hrim hrim teh ang.

Kohhran hna thawh zawng zawng hi chanchin ṭha hril hna chu a ni vek mai; amaherawhchu, kan Lalpa Isuan, khawvel zawng zawnga kal a, thil siam tinreng hnena chanchin ṭha hril tura Kohhranho thu a pek avangin (Mark. 16.16) he Lal Thu pêkah hian kohhran hi a inkhurkhung reng em? Kohhran chuan Chanchin Ṭha hril chu hna puiah a la neih reng em, kual kawi (indirect) lova chanchin ṭha hril (direct mission & evangelism) hi Isua'n a sawi ber niin a lang si a, hei hi hna pui berah a la nei zel em tih chu sawi ho tham a tling reng a ni.

Zirna in nen tehkhin ila. College hna pui ber chu, a tawi zawngin sawi ila, a zirlaite mi puitling ni tura zirna hmanga chher chhuah a ni. Chuvangin, building chu sawi lo ta ila – zirtirtute hlawh leh a kaihhnawih, library leh a kaihhnawih (line function) enkawl nan sum a kal tam berin a rinawm a, college pisaa thawkte hlawh leh a kaihhnawih (staff & auxiliary function)-a sen ai chuan a tam hle zawkin a rinawm.

Hetiang deuh bawk khian Kohhran hna pui ber 'line function' chu Mission a ni. Chutah pawh direct mission & evangelism hi ni deuh bikin leh a staff leh auxiluary function-te chu hemi bak zawnga kan bel chuan kohhran chuan Chanchin Ṭha hril, a bikin direct mission & evangelism chu hna pui berah a nei tawh lo a ni maithei.

Auxiliary function-ah Theological college leh a kaihhnawih, MTC, Bible School leh a dang te, sawrkar chet lak nana rem lo ang chi tihmakmawh ni si-ah hian sum sen pawh ni sela tihawm tak a ni zel ang; mahse, State Sawrkar tih theih ang chi hospital, secular school leh college din nana sum sen vak vak a nih chuan, hetiang leh thil dang tih turapui hi a awm zel maithei a, a tlai hma hian ngaihtuahna sen ho a ngai.

Ka hriatna a sual loh chuan Synod budget pum puia zaa pathum chauh hi direct evangelism atan hman a ni. Hei hi a dik a nih chuan, budget pum pui aṭanga chhûtin Direct Mission-a sum sen pawh chuti lua chu a ni lo maithei. Chuti a nih chuan, Kohhran chuan Chanchin Ṭha hril chu hna pui berah a nei lovin hna pui bera a neih zinga mi tihna a ni thei ang em?

Lehkhabu ṭha zet mai, 'Mizoram Prebyterian Kohhran inrelbawldan tih Rev. B. Sangthanga zah kan en chuan Committee leh Board ṭhahnem tak Synod hian a nei tih kan hmu ang. Board hi 10 emaw vel awmin Committee hi 17 emaw vel awmah ngai ila, mawl taka chhut chuan, Chanchin Ṭha hril hna pui bera neitu Synod Mission Board (SMB)chu Synod peng hrang hrang 27 vel zinga pakhat ang lek a ni a tih theih ang.

Heti chung hian Kohhran chuan Chanchin Ṭha hril chu hna pui berah a la nei zel em? Sawrkarin a tih theih leh tih tur, entir nan, Secular institution ṭha din, adt hi Synod hian a tih zel chuan eng hunah mah Chanchin ṭha hril, a bikin ring lo mite ringtua siam (Direct Mission & evangelism/missionary hna thawh) leh a kaihhnawiha sum sen hi a tam thei ngai lo vang.

Synod Hospital bakah Lunglei-ah John Williams Hospital din a nih avang hian District danga kohhran member-te hian an Distric khawpuia Damdawi in din tur hian Synod chu a beisei leh zel mai ang em tih pawh ngaihtuah tham a tling. Heti zawnga kal palh a nih chuan thil pawi tak a la ni thei ang. Chanchin Ṭha hril pawimawhna ngaihtuah chuan College din tawh sa pawh hi ṭhiah leh ngam a ngai maithei. Amaherawhchu, a tira duan anga zirtirtute hlawh tih hniam a, fee tih san a, kum nga hnua amah leh amah inenkawl thei zawnga a kal zel thei a nih chuan thu hran ni se. A pawimawh ber chu Direct Mission & evangelism atan hian sum tam ber hman ni se a theih ang em, a theih loh pawh ni se, tun aia tam Direct Mission & evangelism atana budget dah chu Kohhranin a tih tur ni awm tak a ni.

Hnam tina mi zirtira siam nan Indirect Mission aiin Direct Mission chu ṭangkai zawka ngaih a nia lan avangin intelbawlna ruhrel (Structural organization) pawh a fel zawk nan, a theih chen chen sawrkar (public administration & bureaucracy) ruhrel anga kal ni zel mai se, a bikin Mission thilah. Board 10 zinga SMB bika hi Department-ah letin (Sawrkar ruhrelah chuan Department chu Board aia lian a nih angin), staff pawh dah belhin budget pawh dah tam bik ni ta se. Home Mission leh ram ram pawna missionary tirh leh a kaihhnawih hna chu tun ai hian a chak zawk ang em? Board dang ai hian lian bik se, Kohhranin Chanchin Ṭha hril chu hna pui bera nei zel angin a lang bik ang em?

Tun anga Kohhran peng pakhat ang chauha Mission Board dah reng a nih chuan, Chanchin Ṭha hril hi kohhranin hna pui berah a nei tawh lo tia ngaih dan siam awm ta se, àwm ti a tam theih viau maithei.

Tichuan, Mizoram Presbyterian Kohhran chuan Chanchin Ṭha hril chu hna pui berah a la nei zel a; ama'rawhchu, Indirect Mission ang chi, a sum hlàwm na si ang chi, eg institution din belh, adt din belhna kawngah te tun aia muang deuh zawka kalin Direct Mission & Evange­lism lamah a hma aia nasa zawka ṭan lak a la mamawh a ni, tiin tlang kan kâwm ang e.

- J.T. Vanlalngheta