Ei huaina hi dawihzep hna

Hmanni chu kan ṭhianpa hian chaw eiah min sawm a, mak ti angreng tak chungin an ina chaw ei tur chuan kan chhungin kan kal a. Ka rin loh dan takin chaw ei huaina a lo mamawh ta miah lo mai a, an chhungkaw nun hlim tak dante ka hmu a, ka lawmpui rual rualin khati taka zu laka a lo fihlim thei kha mak ka ti angreng.

Ṭum dangah chuan chaw ei khawm ni khua hian chaw ei mai thei lo zinga mi hi a ni a. Chaw ei tlai ber pawl leh motor khalh haw sak ngaia a awm chang pawh a tam khawp mai. Mahse hun engemaw chen kan in hmuh loh hnuah chaw ei tuina a lo mamawh ta miah lo mai a, a fate pawh an lo puitling chho ve ta a, huaisen takin zu tel loin chaw alo ei ve ngam ta a ni!

Mizote hian zu hi kan dah sang viauin ka hria. Mi nawlpui chung lam nia ka ngaihte pawh hi phaia han zin nikhua hian sap zu kan tih mai, a sen chi hawn thei chu an inchhuang a, zu an hawn theih vanga hmai uang taka ṭawng ching te pawh ka hre nual mai.

Zu ṭha kan tih hi Ethanol, C2H5OH or C2H6O a nih deuh mai hmel a, hei hi kan hmu phak lo viau niin a lang. Tuna Mizo zu in regular tena an hmuh phak zu tam ber chu, zu hlauhawm tak, Methanol (CH3OH) hi ni berin a lang a. Hengtiang zu chhe tak tak hi kum tam tak Mizoram chawmtu a ni tawh a, mihring tan a hlauhawm em em chungin kan tlan luih luih reng mai a nih hmel.

Mizo mipate hi kan lo dawih deuh nge ni dawn ni, hetiang taka zu chhia leh hlauhawm in lo chuan thil kan ti hleithei lo a. Ei huaina, rim huaina, zai huaina etc kan mamawh tlat zel mai hi a mak viau a ni.

Mizo dik tak chu a duh hunah zu tel lo pawhin a lam ngam tur a ni a, a rilṭam hunah ei huaina tel loin chaw leh sa pawh a ei mai tur a ni. Ei huaina, lam huaina tih angreng vel mamawh tlat zel mai hi mi dawihzep hna a ni zawk.

Mizo mipa dik tak chu zu tel loin eng pawh a ti ngamin a ti thei tur a ni a, a ṭul hunah mi pawh a sual ngam tur a ni. Thil tihhuaina zu mamawh tlat zel hi a Mizo lo viau a ni.

A nihna takah chuan zu hi chhuan­lam lian ber pakhat a ni. Thil ṭha lo eng emaw kan han ti a, a tawpah ka lo ruih em vang a ni, engmah ka hre lo etc, kan ti leh pur mai ṭhin a. Mahni thil tihah pawh mawh la ngam lovin zu kan puh fai leh vek mai zel te hi ngaihtuah chian chuan a zahthlak zawk viau lo maw? Patling ṭhankin zet tawhten zu kan buaipui dan em em leh zu in min tihchhiat dan hi chu zahthlak tak a ni.

Tin, zu in ṭhinte bawk hi hmeichhe kuthlak leh vau khur khur ching an ni zel. Zu tel loa huaisen taka nun hi a Mizo a, a huaisen thlak ber bawk a ni.

- Lal Pekhlua