Kut hnathawktute hi sorkarah ni lo, vanneihnaah an innghat

Thlasik chawlh hmangin hmangaih berte lênna Mizoram ka lo chuangkâi ve a. Têt tê aṭanga pate thlahlel ta na na na chu a hnathawhna, Quarry-ah ka zui ve a. Kan kal lam chuan kawng sira ka pute monu chhuanvawr ka pitéi chuan anṭam tharlam zet hi a lo têl mawlh mawlh a. Nui vur vur pah chuan, "I haw hunah kan inah tel khat lo dah ve rawh, zawngṭah nen inthleng ka duh a nia, a tui hmel em mai," ka ti fiam a. Hnathawhna tur hmun panin kan tlan liam zui chu a ni mai a.

Kan haw hnu chuan ka pitei'n anṭam a dah leh dah loh chu ka nu ka zâwt thuai a. Engmah a hriat loh thu min hrilh a. A tukah zinga tui châwi tur ka pitéi nen kan inhmu hlauh mai. Min biak hmain keimah zawkin, "Eng ngati nge, anṭam i lo dah loh va," ka ti thuai a. Inthlahrun hmel deuh hian, "Tel khat 90 (Rs. 90/-) in kan pe thei a, a to lutuk a ka dah ta lo mai," min tih san a. Kei pawhin to ka tih thu leh a dah lo kha ṭha ka tih zawk thu ka hrilh a.

Hemi zánah vêk, ka ṭhiante ina ka léng chu ka ṭhiannu Nu nen chuan an thlâi chungchangte sawiin kan titi luam a. Fiamthu bawk chuan, "Anṭam hi tel khat 90 a nih chuan nakkum ka lo haw leh hunah anṭam ka ching ve ang," ka'n ti fiam a. Hmanmawh deuh tak hian ti hian min chhâng thuai a, "Chutiang a ni reng bik lo a nia, a man san hun leh hniam hun a awm ve a. Ram pawn aṭanga vai chawhmeh lo luh dan azirte hian a rate hi a danglam reng thei, thlai man sân lai nang fu tur chuan VANNEIH a ngai lutuk," min tih khum a. Ka ho hian ka en reng a, a la duhtawk mai lo, sawi zawm zel pahin, "A níte (ama fateho ní a sawina) pawn thirlên huan hawh meuhin Bean an ching ve a. An bean thar hun leh a rate hniam lai a innang fuh a, kg-ah 25 (Rs 25) chauhin an pe a. Hlawhfa rawih loh chuan amah chauhin a phur chhuak thei si lo. A phur man leh hlawhfa rawihnate nen chawi belh êm lo chuan an insem thei hram, an vanduai khawp mai," a ti zui a. Chutia, thlai chîng a, a man sân lai nâng fu tura vanneih a lo ngai lehzel chu, fiamthua anṭam chîn ka tum pawh chu ka ṭhulh chiang kher mai.

Ka zan lêng leh kan titi thukhawchâng chu duhtawk ila. Awmna hmun leh thawhnain a zir loh avangin Mizoram budget-ah chu mi department chuan chuti zah percent point chuti zah chu an chang, Agriculture department-in chuti zah an chang tih vel engmah hriat ka nei ve si se lo va. Hei erawh chiang fek fawkin ka hria, thlai kumhlun (kuhva, serthlum, pahnah huan, teak huan etc.) nei ve lo, Mizorama huan thlai siama ei zawng, VANNEIH thil thua innghat, risk laa a sur a sa hnuaia thlantui luang zawih zawiha kut hna thawk mek, a tam zawkte hian khai chhuaktu, puitu an ngai tih hi.

An tân eng party nge sorkar dawn tih aiin thlai man ṭhat hun hriat a pawimawh zawk. An tan Traffic Jam free tih velin kori a tu em em lo. Khawsak awlsam zawkna leh ei leh bar zawn remchân zawkna hmun khawpuia pemkhawm tup tup a rem ve lohna, thingtlanga ei zawnna nghelnghet nei loten ngaihsaktu an mamawh.

Mi ṭhenkhatin an sawi fo, kut hnathawktute hi thlai chi sem emaw, a thlak hun emaw, a ṭhatna hmun emaw hrilh an ngai lo. A man tur hresain thlai ching rawh se. An taima a, an thawkrim a, man man zâwka an hralh thei a nih chuan an ding chhuak em em ang. Tu party pawh lo sorkar rawh se, NLUP an sem emaw, sem lo emaw, SEDP an sem emaw, sem lo pawh ni rawh sek sek. Thingtlanga kut hnathawktute hian an thlai thar phur chhuahna tur kawngpui ṭha te, a dah ṭhatna tur te, man man zawka an thlai thar lei theitu sorkar chak leh rintlak an mamawh. A hun taka ram pawn aṭanga lakluh tihtlem leh tihtam thlengin a huam thei ang chu.

Kan politician ṭhenkhat, MLA leh Minister ṭhenkhatte pawh tiamin mahni hlawkna tur uma vei vut vutte hian hetiang lam han ngaihven hlawm se. Mi rethei leh chanhai zawkte khai chhuah kawngah hma chak zawkin han la se. A ram leh felna zawng hmasa chungin ro han rel se la. Mipui zawk hian an hlawh sân tur te, Car thar lei tur te hian kan nawr zawk hial ang maw le. Tihtak emah chuan mahni hlawkna tur ngaihtuaha hmanhlel roreltu ṭhenkhatte hian kut hnathawhtute tan an ngaihtuahna han seng ve se. Tun ai hian an hlimin an hausa nêp bik miah lo vang maw le! Hetia mahni ṭânghma hâia kan vei vut vut hian eng ang hmingṭhatna leh ropuina nge maw min hnutchhiah teh lul ni!

- Muandinga, Nausel