KRISTIANNA LEH CHANGKANNA
Kan khawvel hmasawnnain a ken tel pakhat chu changkanna hi a ni, hei hian kan khawvel hi a fang mek zel a ni.
Mi ṭhenkhat sawi fo chu kan ramah hian Kristianna a lo luh aṭangin changkanna kan pan chho a ni ber a, hei hi a dikna chen pawh a awm thei awm e.
Tunlai changkanna hian Kristian nun mawi leh ṭha a ti bo hle niin a lang. Kan khawvel changkang chho zel hian kan Kristianna ti nung chho zel turin Pathian nung betu Kohhran mipui zawng zawng hian ṭan la thar zel ila.
Keinihoin hma kan lak loh chuan vawi tam tak Pathian thu ṭha tak tak kan hriat leh zir mek te hi he kan khawvel changkanna hian a hruai bo ve mai a hlauhawm.
Mizotena kan entawn leh an tih dan kan lak sap ho ten a an sawi fo, simple living high thinking an tih hi kan ramah kan hmeh bel thiam a pawimawh tak zet.
Kan nitin nunah leh kan Kristiannaah pawh keini Kristian in ti te hian kan in enfiah nan leh kan in bihchian nana kan hman fo a ngai. Kan Kristianna ti chhe zawng leh ti bo zawnga changkan hi Pathian duh loh zawng a ni tih i hai lo ang u.
Tunlai khawvel changchang zelah hian hnam ropui leh changkang zawktena an hman inbiak pawhna, media lam hi i han thai lang lawk teh ang.
Media lamah hian kan rama Kohhran ṭhalai pawl hrang hrangte hian nasa taka ṭan an lak thar a ngai. Ram changkang zawkah chuan media hmangin Pathian ram chanchin ṭha puan darh hna thawkin nasa takin ṭan an la mek zel a, keini ramah pawh hian he media hmang ṭangkai hian harsatna chi hrang hrang karah nasa takin Pathian rawngbawl hna leh kan ram rawngbawl hna kan thawh zel hi a pawimawh tak zet a ni.
Changkanna kan tih hrang hrangah hian thil pawimawh tak pakhat awm tel chu, 'thianghlimna' hi a ni. Thianghlimna hian kan ram, kan hnam, leh kan Kristianna te hi a ti hmasawn a, kan thianghlim loh chuan kan ram leh hnam hian hma a sawn lo ang.
Thianghlimna han tih hian chi hrang hrangin a thai lan theih awm e. Mahni in leh a vel a thianghlim taka kan vawn duh ang bawk hian zuk leh hmuam chungchangah pawh hian kan in sum a changkangna lam pan zel a, nitin a bawlhhlawh kan neih ṭhin te kan paih dan thlengin a ni ang chu kan Kristianna leh changkang kan in tih ṭhinna te hi a in mawi em tih hi kan in zawh fo a ṭul.
- George L.Ralte, Member, Mizo Academy of Letters