AMC result Hriatthiam a harsa ṭhin

Mizoram khawpui Aizawl hian thingtlang lam nen danglamna lian tak a neih chu 'pawl pawl ti lo pawl' an tam zawk vang hi a ni. Thingtlang lamah hi chuan, "Vawkpui pawh ni se ka vote ang," ti chi an tam avangin inthlan hma pawhin an vote zat tur hi an hre thei deuh mai ṭhin a, Aizawl hi chu a dan a dang thung. Aizawl Municipal Council a nihlai aṭangin Aizawl Municipal Corporation an tih hnu pawh hian a tling tur a hriat loh a ni. 

Kumin hi Covid-19 thlen kum a nih hi state lama ruling party tan hian chhiatna double a nih palh a hlauhawm chhan chu AMC inthlan lo awm tur hi a ni. Village Council te ang lo takin AMC hi chuan power leh pawisa hi a ken tel hnem avangin AMC lam a chak loh hi chu pawi thui thei deuh a ni. AMC hi vawi hnih an inthlang tawh a, an bial awm dan en hian, "Bial Him" an tih hi zuk awm miah lova mawle. 2010-a Congress leh ZNP inkawp an tlinna kha 2015-ah chuan MNF tlinna te a ni ang nawk nawk a, 2015-a MNF tlinna hi 2018 MLA inthlana an chet ṭhatna pawh chu a zuk ni leh chuang si lova. 

Kum 2010 kha Congress sorkar tawh hnu a ni tih kan hre ṭheuh awm e. Ruling party ve meuh khan mahniin AMC inthlan kha a hmachhawn ngam miah lova, ZNP nen inkawpin seat 19 awmah khan seat 10 kha eng tin tin emaw an la hram hram a, a hma lawka MLA inthlana tla mualpho tawh MNF khan seat 9 lai mai an chang phak a nih chu mawle. 2010 AMC result avangin MNF pawh phur hle mahse 2013 MLA inthlan a lo awm chiah chu MNF chu an tla kim deuh thaw a, AMC leh MLA inthlan hian inzawmna a lo nei miah lo tih a lang leh si. 

2015-ah AMC inthlan a han awm leh chiah chu 2013-a MLA inthlana seat zawng zawng deuh thaw changtu Congress chu an han sorkar zo lo leh mauh mai a. Pu Lal Thanhawla te Chief Minister an nihna hnuaiah khan MNF-in Aizawl an han awp leh daih mai a, seat 19 zinga 11 chu MNF in an chang leh ta a, MLA-a tling Congress chu AMC ah chuan an han mualpho chiang em em khawp leh lawi si a ni. 

2020 ah AMC kan inthlang leh dawn ta a, a boruak thlir chuan ZPM hi an phur ber mai. A chhan chu AMC huam chhungah hian MLA an lo nghah ber vang a ni a, mahse party mipui chhiar dawn se an nei tlem ber thung ang. Aizawl hming pu MLA bial 11 zinga bial ruk hi ZPM in an la a, Pu Lalduhoma khan a bial chhuahsan lo se chu bial sarih an la tihna a ni a, a bak hi MNF in an la. 

Congress hian AMC hi an huphurh ru ber a, a chhan chu 2018 MLA inthlanah an mualpho tawh a, 2020 AMC ah an mualpho leh chuan Central lamah an tlachhe bawk sia an ral tial tial an hlau a ni. 

MNF pawh hian an huphurh em em chhan chu an sorkar performance hi mipuiin an hmu chiang tawh si a, minister tam tak hming langsar ve lova langsar bik awm te, contract hna duh anga pek chhuah harsaa awm avanga party chhung vuivai leh hruaitu lawk in siksawi avanga ri ret ret awmte hi an huphurh chhan a ni a, mahse "ruling nge nge" tha an neih avangin an la sorkar ve leh thei tho bawk a ni.