Thlah chhawn politics inhungna
Kan thupuia ka rawn thur chhuah teh nawlh, 'Thlah chhawn politics inhungna' tih hi sawi chhuak thiam dawn mah suh ila, he thila inhnamhnawih chin chuan nâka chhun ang maiin na an tih dawn avangin tu emaw thu ziakin 'A hua hua chu in ni mai' an tih kha a dik tihna a ni.
Party tinah hian YMA leh MZP, MSU tih ang chi aṭanga politics khel a ṭhen chu minister leh MLA ni ta, a ṭhen chu Party Secretary, a ṭhen chu Block level hotu hi an ther fer fur mai.
Vai ho khu chuan Dynasty Politics khelin pa aṭangin tu leh faah an in rochun chhawng zel a ni. Mizoramah chuan pawl hruaitu hi chu an inhre thiam tawn a, inhaw ve lo hian politics lama eizawng turin an lut khawm diak a ni.
MZP hruaitu nih lai aṭanga hnathawh dang nei miah si loa motor man to chi nei thei ngat te kan politician zingah hian an awm a. A ruka contract leh supply an thawh vang tih chu tlang hriat a ni chung hian in leh lo an han din pup pup theih dan aṭang hian politician atan pawh eirukna kawngah hian an fihlim rin a harsa ṭhin a ni, hei hi kan ramah hian a takin a lang mek a ni.
Heng mi leh sa hi chu smuggling lamah in hnamhnawih te nia rinhlelh te, eiruk leh kawng danga hming chhia pawh hi awm mahse an inthinhrik lo a, an inzawm pet pet a, party awmna a hrang a nih pawhin na takin an in tâwng chiam chiam ve lo tih hi in lo chhut ve ngai em? tiin zawhna dengkhawng tak i inzawt ang le.
Hman deuhah khan kan khua Champhai kuhva smuggling-ah khan zirlai pawl leh zirlai pawl an inkhak thawi tih pawh kan hria a, mahse tumah an mualpho zui leh chuang miah si lo te pawh hi mak lo ti suh ang che.
Smuggler nia rinhlelh ni si, Minister level vel nena inkuah tlat an awm tih te hi mipui hian an hre ru kar a nia. Zirlai hruaitu hlui hausa em em, tun thlenga an eizawnna hriat loh politics lama zuang lut chho tihte an awm a, zirlai hruaitu hausa ve miah lo harsa tak politics lama lut ve tho an awm bawk. Heng mite eizawnna ber hi chu politics tho a ni a, kan ram hruaitu tur hian NGO lama in hman hnua luh chhoh zel a nih si chuan politics hi eizawnna inrochun a ni dawn tihna em ni le? A chhut peih chuan chhut rawh se.
Myanmar lama Zohnahthlak smuggler hausa hi kan political party hrang hrang hruaitute hian hun hrang ṭheuhah an han hmu diat diat tawh hlawm an tihte hi a hre chiangtu chu NGO hruaitu hlui te tho an ni. Ngawih hunah chuan an ngawi tlang zel si a, mipui chuan lo ring kual mai mai ila, kum 2023 inthlan hma hian puak keh tur a awm dawn em ni?
Thlah chhawn politics inhungna tia thiam leh thiam loa ka vuah hian a kawk thui viau a, ka sawi fiah thiam loh chhungril hi a hlauthawng ru a lo ni.
- MS-a Ralte, Champhai