Kawng chhiat chhan chu sorkar
Chief minister leh PWD enkawltu minister ni bawk Pu Zoramthanga khan an sorkar tirh lam khan khan Buichali leh Khamrang inkara National Highway chhe laite siamṭhat dan tur a enfiah a; Covid-19 vangin Mizorama kawngpuite chu a ṭhat tur angin a ṭha thei lo tih a lo sawi tawh a.
Covid 19 hian kawng tam takah min tibuai tih kan hria a, sorkar hnathawkten a hunah hlawh an lak theih loh phah fo bawk a. CSS sum a buai phah nuai bawk a nih kha. Mizoram sorkarin CSS sum a lo pawh pen ṭeuh chu Central lamin pechhuak vat turin a rawn hriattir ta hial kha a ni a, khatia vel kha kan sorkar chak takin sum a tih kual vel dan a nih avang khan Mizoram sorkar sum bawm pawh a ruak ta hial a nih hi.
Kawngpui chhia a tam leh tak viau avang khan, CYMA hruaituten hmun hrang hranga Mizoram kawngpui siam an tlawhnaah contractor ni lo kawngpui siam hna lo thawk ve an awm thu an sawi a, kawngpuiin a tlawh tur khaw mite pawhin thuneitute hnenah an thlena awmzia a neih loh thu an sawi bawk a nih kha.
Kan Minister ten an mi duhsak zawngte hnena contract hna an pek fo avang hian kan kawngpui siamtute pawhin min zah lo a, lei vung paih danah te pawh harsatna tam tak kan tawk ta a ni ber mai.
Kawngpui chhiat chhan hi sorkar lam chuan lung chang ṭha kan neih loh vangte leh ruah tui a tlak tam vangte a nih thu an sawi bawk ṭhin a. Hmun ṭhenkhatah chuan motor lian a tlan tam chu kawngpui tlo loh chhuanlamah an hmang fo a, a chhan tam tak a awm thei ang a, a inang vel lo bawk ang.
Thil pawi tak zawk chu chu hnathawktu tura thlan ni loin hna an thawh fo vang a ni. Contract hmututen an hralh chhawng fo a, in lei chhawn a tam em avangin Mizoram kawngpui a tlo lo a, a viltu tur engineer te an fail a, a kaikuang ber erawh chu sorkarin a tih tur a tih loh vang a ni ber zawk tlat a ni.
Kan kawngpui chhiat chhan leh thil dangah pawh hian in sawi fiahna tur zawn hmuh aia thil pawimawh zawk chu sorkar hian a tih tur tak ti ngam ṭhin se, a tih loh tur ti lo ngam bawk se.
Chutianga hma a lak ngam hun hunah kan kalphung a dik ang. Sorkar ber a dik phawt chuan a hnuaia hnathawktu engineer aṭanga tirhkah thleng hian dan an bawhchhe ngam lo ang a, kan kawngpui pawh a ṭha ve nghal mai ang.
- Hmangaih Zuali Fanai Pakhup