Term tharah chuan mipui tana awlsamna siam ni tawh teh se
Revenue Department-ah hian LSC dil turin a hmuh chu sawi loh a dil phalna lehkha Minister signature chuang neih hmasak a han ngai hu mai hi keini sipai bâng kan bo hle tawh a, chutih nak alai chuan Transport Department hnuaia permit hrang hrang pawh hi Minister hrilh hriat hnua lam chak ta a awm fur an tih chu.
House Pass dilna lehkha hi Minister aṭanga lâk chhuah zel a ngaih chuan Minister mamawhna a zual sawt a, a permit pek ni lo a dilna lehkha min pek pawhin an chungah kan läwm ngawih ngawih a nih si chuan mipuite chu Minister hmaa bawk khup lo thei lo kan ni.
Contract hna hrang hrang hi a registered contractor pangngai hian Dan angin tender chhangin an dil hmu thei tawh lo a, Minister ziah sak bik tan lo chuan vana rah ang mai a ni tawh. Minister kan mamawhna a säng zual ta viau mai a, chu chuan Minister hmaa bawk khup lo thei loin mipui a dah ta ṭhin a ni.
Aizawl Municipal Corporation din hnu hian mipui hian chhiah an pe säng sawt a mahse mahni in hmuna mahni pawisaa in sâ tur pawhin AMC ah phalna la turin chhawng tam tak pal tlang a ngai tawh a. AMC hmaah kan bawk khup leh a ngai ve leh a, a buaithlak thuah hnih thuah thum ta a ni. Heng zawng zawng hi hun leh sum sen nelh ṭulna sorkar hlawkna mipui hekna a ni.
Sorkar term tharah hian MNF hi an lal leh a nih pawhin ṭul lo tawpa mipui phur rit awm tam lutuk hi chu ti bo tawh se. Party dang an sorkar a nih pawhin chhunzawm tawh lo se, Politician te hian mipui hi hnuaichhiah suh se. Heng an tih retheih mipuite ah bawk hian an vote an zawn a ngai leh dâwn tih an in hriat a ṭul asin le.
- K Lalruatsanga