CHHIAT NIA MOTOR DAHNA

Mizote nun ze mawi nia kan sawi fo ṭhin pakhat chu chhiat nia kan in tuarpui dan leh kan in lenpui ṭhin dan hi a ni. Tunlai khawvel changkang tawh takah pawh hian chhiat ni ṭhat nia kan in lenpui dan hi chu kan la thlau thla mai dawn lo niin a lang. Mitthi awm nikhuaah ngat phei chuan, khaw hla tak tak leh veng hla tak tak aṭang pawhin kan intuarpuina lantir nan kan inlenpui hram hram zel a, kan la in pan vang vang zel chu a nih hi. He Zo nun ze mawi hi vawn nun reng atan pawh a ṭha hle niin a lang a, a kalphung eng emaw lai chu siksawi ngai a lo awm a nih pawhin, hnam lungrual leh ṭhenawm khawvengte inngaihsak hnam kan nihna tilangtu thil pawimawh tak a ni awm e.

Hetianga chhiat tawk kan lo awm hian, a boral hun darkar azirin lu men tur chi leh phum nghal tur chi an awm ṭhin a. Lu men tur chi hi chu zan lam hna deuh te a ni bawk a, hmun hrang aṭanga kal kan tam lutuk thei lo a, chhun lama vui hunah erawh chuan mi kan tam thei hle mai. Mihring khawsak a lo changkang chho zel a, motor ke pahnih nei chi leh ke pali nei chi pawh a pung chak hle a, chhiat ni ṭhat niah pawh motor kan leklam ta hle. Chhiat tawkte chhungkua kha motor hunna remchang takah an lo awm kher lo ṭhin a, hetiang nikhuaah hian motor dahna turah kan buai ta fo mai zawng a nih hi.

Khaw lian deuh, Aizawl, Lunglei leh hmun dangah pawh, mitthi vuinaa kal duhte hian motor hunna turah harsatna an tawk ta fo a, kan la tawk chho zel dawn ni pawhin a lang. Eng tin nge kan tih ang tih hi ngaihtuah a hun ta viau mai.

A hnuaia mi ang hian i han sawi dawn chhin teh ang :

1. Sawrkar mi pawimawh bik an nih si loh chuan, leh, kawngpui hulum lai te a nih si loh chuan, hetiang nikhuaah hian Traffic Police te duty tura beisei ngawt chi an niin a lang lova. Chuvangin mitthi awmna veng YMA te kha tlawmngaiin duty thei ṭhin se, kan harsatna tam tak chu a pumpelh theih awm e. YMA duty-te chuan motor dah theihna tur hmun remchang te lo kawk kual ṭhin ta se, thil ṭangkai tak a ni ang.

2. Kan buai fona chhan pakhat chu, kan kal duhna hmun hnaih thei ang berah motor dah kher kan tum ṭhin hi a ni. Mitthi in aṭanga hla deuh hlekah pawh, motor hunna a awm remchanna laiah chuan motor kha dah ta mai ila. Kein mitthi in pan ta mai ila, parking vela kan buaina chu a ziaawm deuh ngei ang.

3. Mitthi vui hun chhung reilo­teah na na na hi chuan, veng chhunga mite leh a in bul hnaia mite hi chu, loh theih loh thilah tih loh hi chuan, tumah hi kan tlan chhuak ngai meuh lo a. Hna ṭul pawimawh leh thil dang loh theih loh a awm a nih erawh chuan kan in hrethiam tho zel a. Hemi kan han sawina chhan hi chu, mi kawtkai leh hung (compound) chhungah te motor hun nawk nawk a ṭul fo vang a ni. Mi motor in kawt zawn takah te dah er vu mai te a tul fo a, in neitute leh garage neitute khan, mitthi vui chhung na na na chu hriatthiamna zau tak nei thei thin ila a tha hle mai. Mi kawtah leh mi garage zawnah hun reilote chhung motor a lo dah zawk theih hian, parking chungchanga buaina chinfelna pawimawh tak a ni ve ṭhin. In neitute’n an lo phal tlat loh erawh chuan a buaithlak duh viau mai.

Khualkhua aṭang leh veng dang aṭanga lokalte kan ni ṭhin a, hmelhriat loh te hnenah reilote parking han dil pawh hi a nuam viau lo. Chuvangin, veng chhung YMA te bawk khan lo dil fel sa diam ṭhin se, thil ṭha tak niin a lang.

4. Hman aṭangin kan sawi ve fo tawh a, hetiang hmun hma rem lo leh parking lama harsatna awm thei te hi a pumpelhna kawng pakhat chu, mitthi hi Kohhran Hall-ah emaw YMA Hall-ah emaw vui thin ni se. Hetiang hall pawimawh chin hi chuan motor park-na tur hmun awl an nei tlangpui a, nei lo pawh awm bawk mahse veng kilkhawra mi mal in ai chuan motor hunna hmun a tam zawk thin a. Tlang ram awihpangah kan awm a, kan in leh lo dinna hi hmun chep tak tak leh rualrem lo tak tak te a lo ni ve thin a. Hmun awl zau deuh awmna chu Hall bul vel hi a ni duh khawp mai. Mitthi kha mahni in lumah ngei kan zalh hmasa thei a, a vuina hun erawh chu Hall lamah hmang ta ṭhin ila, kan zangkhai phah ve deuh lawng maw kan han ti a ni e.

5. Khaw hrang hrangah leh kohhran hrang hrangah kan in vui dan hi a in ang vek lo maithei a. Kohhran ṭhenkhat chuan, mitthi kha Kohhran Upa leh Pastor te a nih chuan, in lamah a vuina hun an hmang hmasa phawt a, chumi zawhah Biak In lamah vuina hun dang an hmang chhunzawm leh ṭhin a. Hetiang kalphunga kal ṭhin kan nih chuan, social media lama zualkona kan tarlannaah te hian, in lama vui hun leh biak in lama vui hun dar bi hi chiang takin tarlang ṭhin ila. In lamah chuan motor hunna a lo vang deuh a nih pawhin, biak in lamah chuan motor hunna a lo remchang zawk deuh thin a. Mi tam takin biak ina vuina an hmanpui duh ṭhin a, chutiang mite tan chuan parking lamah harsatna a su kiang ve deuh thei ang. Biak in lama vui tur a ni tih hre lova an in lama kan inhnawh vak hian traffic thlengin a jam a, parking-ah kan buai bawk a, a buaithlak kual vel a nih hi.

6. Mitthi vuinaah hian veng chhung leh veng hnai deuh te chuan motor leklam kher lo ta ila, ke pawhin kal hram ta ila, traffic jam leh parking lama buaina a tlem phah deuh thei bawk ang.

7. Vui hun chhun hi rei lutuk lo deuh se, motor parking lama har­satna te hrereng ṭhin ila. Mi pawi­mawh bik leh, loh theih loha vuina hun hman rei ngai deuh te chu awm ve ṭhin bawk mahse a vuitu azir hian a hun chhung hi a reiin a rei lo thei niin a lang. Mi hna ṭul, chhuah vat ngai kha, parking lamah kan in hnawh tawng vangin kan dang bet reng thei a, hun hman thiam pawh hi a pawimawh khawp mai.

- Thuamtea Khawlhring, Lunglei