Minister / MLA te hi hriat zui lem loh kan ngah mai!

Politician – Minister leh MLA hlui te zîngah an hming kan sawi pawha mipuiin kan hriatzui tawh mang loh, ram tana thil ṭha tih sawi zui tur pawh hnutchhiah lo hi kan kawl nual tawh lo maw!?

Minister leh MLA dinhmun hian tih tur leh mawhphurhna a keng lian hlê tih theihnghilh loh a pawimawh a. Lal rei ringawt, sûlhnu ṭha hnutchhiah chuang si lo ai chuan, rei lo deuh zâwk pawh lal mah se, dikna leh felna nen; ram mipui tana thawk an nih phawt chuan mipui thinlungah hmun sâng zawk an chang reng ang tih a chiang a.

Minister leh MLA te hi an inang lo thei khawp a. Fing thiam leh lutuk an awm a, fing vâr vak lo an awm bawk. Heng mite hi an department secretary leh director etc. te bâkah, an party headquarters hotu ṭhenkhat ngei paw'n thlírna tlâng khat aṭangin an thlir a. Engemaw thil tih nikhuaah an inmit-sír a, hnung lam aṭanga an nuih rûk deuh tet tet pawh an nualin an sawi ṭhin!

CM Hawla khan mahni department sum ṭhâm chîng a minister zinga an awm thu huai takin a sawi a. Action a la si lo lai kha a pawi a! Minister zîngah mahni department hnuaia hna lian engemaw hmu taí tlat, sum siam thiam tak leh a tih dan pawh zei takte hi anmahni awmna party ngei pawh hian a mamawh lo vang! Ram tan phei chuan hmêlma an ni. Chu ai chuan Minister fing vak lo dik tlat ang chi te hi kan mamawh.

Kan aia fing leh fel hlirin Assembly House-ah ro an rel a, mipuiin an khawsazia pawh kan chîk thei hle. Mi tak tak hriat an awl a, lemchang thiam lah hriathran an har lo. A ti tak tak chi leh taima deuhte chu chhinchhiah zung zung pawh an awl.

Ngaihtuahnaa awm fo chu Minister leh MLA te hian an duh ber chu tlin leh zel a ni a. Ṭhahnemngai takin hna thawk mai se la, ngaihtuahna dik hmang se, an duh ber tlin leh zel hi chu thil chiang sa a ni mai dawn lo em ni aw, tih hi a ni. Mahni tana hamhai lo takin thawk mai se, a bial mipuite leh an party Unit bakah an party headquarters te khairual thiam bawk se la, uluk takin hêng thil pathum te hi an remkhawm thiam phawt chuan, an duh ber tlin nawn leh te chu a harsa dâwn em ni?

Tin, Minister leh MLA te zîngah chanchinbu chhiar ngai lo an awm palh ang tih a hlauhawm. MLA ṭhenkhat chanchinbu la lo an awm tih sawi te a awm ṭhin a, a zialo hle mai! Hei bakah, engti emaw tala social media nghêng pha, a pangti lum aí pha chin nih an zir a ṭul tawh.

A bikin - Facebook, Whatsapp leh Youtube te ke pen ruala ke pen dan pawh zir ve a hun tawh. Tapchhak zâwl titi aṭang ringawtin thil thleng thar a hriat theih tawh lohva. An duh a nih phawt chuan ram hruaitute hian social media hi an khawih hman khawp! Hna (file) en tur hlirin a hmuak mar bik lo tih pawh kan hria a. A tunlai ṭawng takin an in up-grade nasat a ngai.

Kumin kum tâwpah kan inthlan dawn a. MLA 40 zîngah ding nawn, tla ta pawh an awm leh ngeiin a rinawm a. Tlak chhan chhuanlam te hi han zawng bawk ṭhin mah i la, chhuanlamin a chhandam zo chuang lo. La tling zui zel atana kan awh tak tla tlat si te pawh an awm leh ang, tling tawh lo tura rinkai tla zui ta ngei te, rin loh deuha la tling tlat ang chi te. Tin, mi thar hmêl pawh an lo chhuakin a rinawm bawk.

Engpawh ni se, Minister leh MLA te hi dan siamtu an nih mai bâkah, ram mipui rawngbawltu an nih avangin an hun chhûnga sûlhnu ṭha leh sawizui tlak hnutchhiah tum lamah inel se, chu chu opposition lam aṭang pawhin a tih theih.

MLA term 2/1 chelh ve si, nakin lawka mipuiin kan theihnghilh zui mai tur, an hming kan sawi pawh a kan hriatchhuah zawh tawh mang loh kan kawl ṭeuh ang tih hi a hlauhawm khawp mai.

- Zobiakvela (Masena)