Tunlai thil awmzia leh Election

Tun hnai hian thil thleng a tam si a, chumi zinga thur chhuah fak tur khawpa langsar chu Minister Dr K Beichhua chu Minister aṭanga bân a nih hi a ni awm e. Kum 2023 kum tawp inthlan a nghawng dan chawngkhum dan tlâng huat loh tiin zeldinin kan sawi chhunzawm dâwn a ni. Thu thiam ni mah suh ila kan sawi tum lam zawk hi en chiang rawh u.

Dr Beichhua hi MNF mi a ni a, Pu Zoramthanga hova MNF an tlak deuh vek kum 2013 khan MLA niin MNF tán Assembly House-ah theihtawp chhuahin a lo au tawh ṭhin a ni. MNF leh MNF lo pawhin Siaha lamah chuan an ngaisang hle a ni. House-ah pawh thu a sawi ṭha ṭhin a Congress an tlak theihna tura House lama a beih dan kha Mizoram hian a la theihnghilh lo a ni.

Dr. Beichhua hian kum 2013 khan MNF chu chhim lamah a chhem alh a, Congress pachal Pu S Hiato a hneh a ni. Congress vanglaia Congress hneh thei tu hi kum 2018-a MNF an lal leh theihna tura mi pawimawh tak a ni a, mahse Minister of State hna pek a ni chauh a ni. MNF tana Dr. Beichhua a thawhrim em em hun lai khan tuna Cabinet Minister Pu R Lalzirliana hi Congress a la nia, Assembly Speaker meuh Pu Lalrinliana Sailo hi Congress a la ni a tuna MNF sorkar a tlatlum tak takte hi MNF pawh la ni phak lo, a ṭhen phei chu Congress hnuaia contract thawk te an la ni daih a ni.

MNF sorkar a lo pian khan Dr Beichhua Department chan, Social Welfare & Tribal Affairs hi contract thawh thiam riau nei leh project thawh thiam chi nei tán chuan Department mawm a ni a. MNF ve ve ni si hna inchuh thawm kan hre ta a, hei hi MNF term tir lam 2019 khan Saiha lama MNF chuan an lo hre ru daih tawh a ni.

Hetih lai hian Saiha lamah MNF MLA candidate nih ve tum ran mai a awm a, chumi leh Social Welfare & Tribal Affairs hnuaia hna thiam tak chu tun hma aṭanga inkawm an ni bawk nen an inhnaih tawlh tawlh a, Dr Beichhua chu a lâng tawlh tawlh niin an sawi ta tlat si a nih chu.

Sawi tur dang han awm leh zui chu Mara Autonomous District Council chuan Siasi to Chakhei Road siamna tur project an nei a, cheng nuai hlir 5000 dâwn man a ni. Chief Minister berin MADC thawh atan a lian lutuk tiin midang a thawh tir a, thawk tur hian Kamrul-a a thlang leh si a. Mara mipui an läwm lo a, Dr Beichhua hian hei hi veiin a sawi chhuak zauh zauh a, MNF pawi sawi angin ṭhenkhatin an lo chhuah bawk niin an sawi leh zel a. Dr K Beichhua hian diklohna tam tak a nei ve bawk dâwn a, MADC sorkara Congress - MNF sorkar a pian khan hnawk a lo ti a, amah aia langsar awm tur ngai ngam loin a tlak theih dan plan a lo neih pui ru a, chu chu an pute a sawi pui a, mahse amah tlak tir duhtu lamin an tlan khalh ta zawk niin an sawi bawk.

Khing te khi rinthu, tlâng kam titi leh zeldin thil a ni a, a nghawng tur lam hi han en leh thung ila. Kum 2023 ah hian MNF-in Bial him pakhat an hloh phawt a ni. Dr Beichhua bawk hi an din tir leh emaw din tir lo emaw Saiha MNF hian ngai a awh tawh lo phawt a, MNF hian bial khat sacrifice in bial 39 an chuh dâwn ang a ni ta. Hetiang boruak hian ruling hi a pawt hniam thei a ni.

MNF vanneihna chu Congress tlachhia hi Central leh Mizoramah hian a rual chiah a, Congress hian tlin an tum ngam pawh a rinawm lo a ni tun dinhmun thlir hian.

ZPM hi teh thiam theih an ni lo a, Congress aia MLA ngah ni chung hian an Party hruaitu hi en ila MLA atana itawm 21 chu sawi loh 10 pawh ziah chhuah a harsa a ni. ZPM hian pawn lam mi mi thiam, mi langsar leh ṭhalai deuh an sawm luh thiam chuan MNF chhungkaw khi leh kum 80 tling tur Chief Minister candidate tuna performance ṭha lo avang hian tlin theihna chance sang tak an nei a ni. Chu tih mêk lai chuan ZPM hian an Party hruaitu lo nih rei ve deuh avanga candidate beisei satliah chin an din tir chuan Saiha pawn lamah MNF hi an la tling leh ṭeuh ve thei tho a ni.

ZPM hian candidate an siam thiam chuan party MLA ngah ber chu an ni ve leh thei tho a, MNF hian kum 5 chhungin PMJVK suma Education leh Health lam thuam chak aia phullem phah vak vak bâk hna thawh sawi tham an nei lo a tih theih.

Divided House a nih avangin MNF hi an inchar phui vat vat a ngai a, Health Minister hian PMJVK pawh hmang ve thei lo chunga MNF a la nih ve hram hram chhan hi future President nih a tum vang a nih loh chuan Party chhung khi chu a ti lang chiang a ni. MNF tán insiam ṭha turin hun a la tam a, mahse Dr Beichhua nghawng hi Pu Zira chhuah hnua Congress an hniam thut ang kha a thleng thei a, chu chu ZPM nge Congress hian hlawk pui ang? tih zawhna a lo awm phah ta a ni.

Lunglei Municipal Council a ding ang a, kan han inthlang anga MNF an tlak palh chuan 2023 MLA Election tlak hmahruai a ni thei si a. MNF hi an tlin chuan MLA Election turah hian ZPM leh Congress hi seat sharing hmangin a ṭan rual tir thei mai zawk lo maw? tih ngaihdan pawh a awm thei bawk.

- Vanlalliana, Lunglei