Contract pek tawh tih hi

Armed Veng Field ah grass phah tur lung phumnaa kan Chief Minister zahawm tak Pu Zoramthanga thusawi kha chanchinbu lamah kan lo hmu ve a: CM Zoramthanga chuan, nikum lam budget a hmanna tur tihfel vek tawhte chu thil dang atana pawhpên chi a ni lo tih sawiin, "Contract pek tawhte cancel sak an nih chuan court-ah min khing mai ang. Chumi khua/ veng tana lo ruahman tawhte kan tidanglam a nih chuan a veng/ khua an thinrim dawn lutuk, thil tih chi a ni lo. Sorkar kalphung hi hriat a ṭha," a ti, tih kha a ni. 

Kum 2018 MLA Inthlan result a chhuah rual rual khan LAD hnuaia contract kha an cancel nghal char char a, chu mai pawh ni lovin Congress sorkarin contract hna a pek tawh hna la ṭan lo zawng zawng kha hna kalpui lo turin an hrilh nghal a. Contract hna tam tak chân an awm tawh a, chu chu kum hnih kal ta leka thleng kha a ni si a, contract tihtawp leh hi a tam tawh a ni.

MNF hi dem tur an ni bik lo. A chhan chu kum 2008-ah Congress in sorkarna an rawn siam chiah khan eng thil nge thleng kan la hria em aw? MNF in contract hna an lo pek tawh tam tak kha thawh an phal bik lo ve tlat a ni. Chu chu MNF hian an lo la theihnghilh bik lova, 2018 ah sorkarna an chan rual rual, hei phei chu sorkar pawh an la la lut hman lo tihah khan  contract kha cancel turin officer te kha an hrilh nghal ngam a ni. 

Hetiang lutuk hi chu a ṭha lo. Mihring chu arpa chan lai a awm a, chet chhiat hun a awm a, hetiang titute pawh hi a lehlam hian an la chhin­chhiah ve dawn a, zangkhua hi a bungbu ve ṭhin tlat. Hawihawm te, ngilneihte hi a ṭul ve a ni, kan hmalam hun kan hre si lova. 

Kan CM thusawi hi hnial ka tum lova, contract pek tawh pawh pen chu sawi loh chhuh sak a lo awm tawh ṭhin thu hi ka sawi duh chu a ni. 

Pawisa pawh pen theih loh tih hi sawi dawn ta ila. Sorkar hnathawkte hlawh hi "Pawhpen theih a ni a, hei hi chu ṭul bik thilah chuan pawh pen theih a ni," tih inziak hi a awm a, thil dang hi, "Ṭul bik theilah pawh pawh pen theih a ni lo," tih inziak hi a awm reng em aw? tih hi mi mawl zawhna a ni e. 

Hri dona tura pawh pen, kawng chhe siam te, tui in tur lakna siamna, hospital thuam chakna tur pawh pen chu mipui hian an hrethiam tho vang mawle. Kan state population phu lova Congress sorkarin hnianghnar taka an siam grass lem bawk kan atchillh leh hi sorkar hnathawk hlawh bat aia ngaimawh awm chi a ni zawk lo maw?