Ngaihtuahna ti thuitu sorkar thupek kha

January 23, 2023-a Vanglaini chan­chinbuin a tarlan danin, Mizoram sorkar chuan kum 2022 Krismas leh 2023 kum thar lawmnaah vawk saa indaih lohna phuhrûkna turin thla hnih chhung atana Mizoram páwn aṭanga vawk sa (frozen) lak luh phalna December 2, 2022-a a tihchhuah hnuah Mizoramah frozen vawk sa kg. 37,767 lak luh a ni.

Mizoramah hian district 11 a awm a, heng district-ah te hian district enkawltu Deputy Commissioner (DC) an awm vek a, anni hian an district chhunga ṭha tura an ngaih angin ruahmanna siamin thupekte an chhuah ṭhin tih kan hria.

Chanchinbua kan lo hmuh ang khan December 2, 2022 khan Mizoram sorkar chuan Mizoram pawna vawk pul hri (African Swine Fever) lên lohna hmun aṭangin frozen vawk sa lakluh theih a nih thu a puang a, hemi ní vêk hian Aizawla firm pakhat chuan dilna a thehlut leh phalna pek nghal a ni bawk.

Hetihlai hian Mizo­ram sorkar hnen aṭanga Aizawla firm pakhatin frozen vawk sa lakluh phalna permit a neih aṭanga ni 10 liam hnu, December 22, 2022 khan Aizawl DC chuan Mizoram pawn aṭangin Aizawl district-ah frozen vawk sa lakluh phal a nih thu a puang chauh thung a ni.

Aizawl DC in frozen vawk sa lakluh phalna a tihchhuah hma ni 10 liamtaa Aizawl firm pakhat hnena frozen vawk sa lakluh phalna permit lo pek tawh hi thil dangdai tak chu a ni a, sorkar thuneitu sang lamah hmelhriat an nei ṭha bik hle niin a ngaih theih.

Sorkarin hunpui laia vawk sa indaih loh hlauh vanga hma a lakna hi chu thil ṭha tak a ni a, chutihrualin thupek inkalthelh lutuk te, sorkara document kal kual dan ngaihtuahin frozen vawk sa lakluh phal a nih thu puan ní, permit dil ní leh permit pek ní te a inrual vek mai hi ngaihtuahna ti thui tak chu a ni.

Hetiang hian sorkar hian document an khawihte chak takin kalpui vek se chuan sorkar chak tak kan nei dawn a ni.

Vanglaini-ah ngei pawh khan an rawn ziak tawh a. Maharastra State aṭangin Mizoramah vawk lak luh a nih thu hi ka lo chhiar. Khati teh thuta vawksa Mizorama mi tuten emaw an rawn la thei mai kha, induhsakna thil a ang viau bawk a ni.

AH & Vety depert­ment, Mizoram SOP ah chuan vawksa Mizorama lalut tur tan Vairengte vety check gate paltlang turin Mayur Farm, Maharastra invoice kher a ngai tih te pawh kha a inziak niin ka hria a. Khatia a ni chung khan sorkar chu thiam ka la chantir chuang lo.

Kan sorkar chet dan kha entrepreneur te tan vawksa la lut tura ruahmanna an siam danah duhsak bik nei an ang tlat a ni. Sorkar hnathawk zingah duhsak zawng neia thil ti an lo awm a nih pawhin kan Minister-te zawk hian dik takin ro hi rel ngam se ka ti hle.

- Johny Chawngthu_95