MAMIT KAN VANGLAI LEH C.D BLOCK-V

MUMAL TAKA C.D BLOCK KALPUI THEIH A NI TA LO

Mizoram chu sawrkarin sawi­khawm programme a kalpui tak avangin Mamit pawh Grouping Centre lian tak a lo ni ta a. Tuna Mamit Bazar hmunah hian hruaikhawmho awmna tur Bukte sak khah tlat a ni a, a thlanglam Pu Ralhnaia te awmna thlanglam mual zawl vel thlangah Luangpawl lam aṭanga khawmho te an awm nual. Mi ṭhenkhat chhungte bel bak hmun remchanga in bengbel ta mai an awm bawk a. Vaisam leh Sabual lamten tuna Vengthar Biakin hmun phei lam hi an bawh thung.

Block Staff te pawh Aizawl lamah leh Grouping Centre dangah te an insawn chhuak ta nual a. Insawn chhuak ve lo la awm ṭhenkhat chu anmahni Parent Department-ah an kir nual. Mamit Grouping Centre pawh chu Administrative Officer-in a rawn awp ta a. Capt. D.Pathaka chu A.O hmasa ber niin Mamit-ah a rawn zawm a, staff la awm te chu min rawn awp khawm ta a ni.

MAMIT KAN BUAI

Hetih hunlai hi Mizoram hmun tin kan buai vanglai a ni awm e. Hruaikhawm a ni a, mumal taka thlawhhma lak theih a ni lo. Mahni khaw hlui/ khawram tlawh leh huan thlai chul ram fang tura han chhuah tak ngial pawh a theih meuh loh. Han zin chhuah hlek dawn leh Movement Permit nen lo chuan chhuah chi pawh a ni lo. Khaw tinah Duty Post paltlang tur awmin, sipai duty ten an lo check zel, buaithlak tak a ni.

Dampui khua chu an In leh lo sawiṭhiat miah loin Mamit-ah an sawikhawm thut a. Mutbu leh eirawng bawlna hmanrua bak keng thei hek lo, an thingrem ken theih loh te chu kawng sirah a let rem rum mai. Hun a thawl deuh hnuin Pu Pangliana, Dampui pasalṭha leh khaw hotu chuan an khaw ram ava tlawh chu, a lung a leng ngang a ni ang, an In an lut chu tapchhak zawlah a dan pangngai te in a ṭhu a, an kawt laia hmarchate ṭiak rah pawh alo hmin tawh. Chungte chu va loin an rawtthlengah an rawt tau salh salh a, a lungleng chuan tumah hlauh leh mitmei ven tur pawh nei loin zan khat an khumpuiah a riak. Lungleng thinrim in seh ruh ṭeuh chungin, khaw khawm hla Pu Suakliana phuah “Kan hun tawng zingah khaw khawm a pawi ber mai” tih hla aw ṭial ruaia sa chungin Mamit lam a pan a. Anni chhungkua, an tu leh fate hi an khawlam a kir leh hmasa ber pawlah an ṭang nghe nghe a ni.

ṬAM KAN TAWK ṬAN :

Khaw khawm hmaa kan buh thar te kan ei zo thawkhat a. Khaw khawm lah chu kan han ngeih lo laileng khawp a, naupang kawṭhalo te a leng a, nitin mitthi kan nei a, 2/3 te neih chang te pawh a awm. Tunhma Tut dunga vai maji kal vel ṭhin awm ta lo nen, motor lah Sairang bak thleng hek suh, hmun ṭhenkhatah Ambush tih leh khaw hal thawm hriat tur awm zut a, sipai kal vel puakphurh lo ni chhen bawk nen. Sawrkar hnathawk chenin khawsak a buaithlak tlang em em a ni.

Kan ei chhiatzia lah chu, chawei lai in hmuhpui chi pawh a ni lo. Curfew a ni deuh reng a, zan inkhawm theih loh leh khawhar ina zanlam lenkhawm leh zai theih bawk hek suh. Curfew vin lutuk tur erawh Asst. Commissioner, Central Inteligent S.I.B te leh Civil Police Out Post te a awm avangin a ziaawm deuh.

ṬAM A ZIAWM DEUH :

Administrative Officer office pawh mumal takin a kal ṭan a, Civil Supply lam pawh thlawhtheihna in a rawn thlak ṭan. A chang phei chuan ni khatah vawi thum vawi li te a rawn thlak a, a rawn thlak tlai deuh ṭum chuan, chharkhawm zawh hmanloh hlau a losul haw te hi chelh din a, phungbawm a sawm chang a awm fo.

Godown lian tak, tuna High School hmun sir C.R.P Camp hnaihah sak a ni a. Item chi hrang hrang- Buhfai, Atta, Chini leh Dailuah thlengin supply a rawn thlak a. A chang phei chuan khawnvartui thlengin parachute in a rawn thlak a. Heng hunlai kum 1967-1973 chhung vel hian Mamit Administrative Centre-ah hian heng Officers te - Capt. D.Pathak, Capt. J.N. Kalita, MC Goswami ACS te leh A.C Das ACS te hi Asst. Deputy Commi­ssioner-in an rawn awm a, Civil Supply lam pawh kan hnianghnar ta viau. Development hna lam erawh thawh mumal a la awm lo, staff te chuan Movement Permit leh Supply lam kan buaipui deuh ber a ni.

Asst. Deputy Commissioner hote an insawn chhuah hnu hian Pu Lalphunga Sailo chu A/O, BDO-in an rawn dah a. Ani hunlai hian Lokicherra (Zawlnuam) ah Community Dev Block hawn thar a ni a, Mamit Dev Block pawh chu W.Phaileng ah sawn phei a ni. Block hnuaia hnathawk Staff te pawh mahni remchan ang angin a ṭhen W.Phaileng Block ah, a ṭhen Zawlnuam Block-ah inṭhen darhin, Mamit A.O Office a thawkzui ta zel zawk te pawh an awm nawk a ni.

Mizoram chu Union Teritory (U.T) ah hlankaiin, Legislative member te pawh inthlangin Mizo Union leh Congress ṭangdunin sawrkar an siam a. Pu Ch. Chhunga chu Chief Minister niin, Mamit erawh Grouping Centre niin Administrative Officer (A.O) in a la awp zel a ni.

SUB DIVISION  KAN CHANG LO TEP

Mipui nawlpui chuan Mamit hmalam awmdan tur hi kan ngaihtuah lem lo. Ṭhenkhat erawh chuan hetia Zawlnuam lama Block thar te an hawn a. Kan Mamit Block thlenga W.Phaileng a an sawn tak hi chuan Sub-Division hi chu sawi vak ngai loin Champhai leh Kolasib te nen hian min hlangkai chho mai turah kan lo inngai a, a teuh lo mai. Cabinet-in W.Phaileng a dah turin an ti fel tawh tih thawm kan hre ta. He thu kan hriat chuan tumah dang rawn loin Pu Lalphunga Sailo hoin Pu Lalhnuna VCP, Pu Saitawna, Pu H. Zaikhuma, Tv. Z.Lalhmingliana, Tv. Lalrinawma, Pu Lalropuia, Pu Lalhmangaiha Sailo leh Pu Thangngaia te ho inhmukhawm in hmalak dan tur kan rel ta chuk chuk a.

A thawh khat nan Pu Lalhnuna VCP hoin Saitawna, Zaikhuma leh Tv. Lalrinawma te Aizawlah kan tir chho a. Anni hian Pu C.Chawngkunga, Bialtu MLA han hmu hmasain anin hotu pawimawh hmuh turte a lo ruahmanpui a. Pu Ch. Chhunga C.M, Pu Ch. Saprawnga Party President leh Cabinet Minister-te hmuin, khawthlang lam tan Sub-Division hmunpui atana Cabinet-in W.Phaileng an lo ruat tawh chu sut leha Mamit a dah zawk turin theihtawpin an han bei a ni.

A thawh hnihna chu Pu Lalphunga Sailo hoin an thawk chho a, hemi ṭum hian Pu C.Chawngkunga ho bawkin MLA dang hmelhriat leh ngamtlak deuh deuh te Pu Joe Ngurdawla, Pu C.Lalruata, Pu Vaivenga leh Pu R.Thangliana te sawm khawmin inkawmhona hun ṭha tak an han hmang a. W.Phaileng aia Mamit chu Sub-Division Headquarter atan a ṭhat zawk leh a remchan zawk thu sawina hun remchang tak neiin, session hmasa berah Cabinet thu lo tih tluk tawh chu sut leh tura theihtawp lo chhuah turin an han sawm (thutiam) a ni ber.

A thawh thumna chu Pu C. Chawngkunga’n Chief Minister leh Cabinet Minister te hmuin, heti hian Sub-Division pathum hawn turah hian ka ṭhiante Pu Lalhlira Bial Champhai leh Kolasib ah te in dah a, ka bial Mamit a indah dawn lo a nih chuan ka bang dawn tiin a ṭawng chhuak a. Cabinet chuan an thu lo tih tluk tawh chu sut lehin Mamit-ah an sawn ta a, Mamit Sub-Division chu alo piang ta a ni. State kan ni chho zui a, Mamit pawh District Headquarter ni ta zelin, kan khaw mi ngei Z.Lalhmingliana MCS chu S.D.O leh Mamit D.C hmasa ber a ni ta a ni.

Mamit kan vanglai chanchin tlangpui kan han tarlan ṭhin te hi, hmanni lawk emaw kan tih laiin kum 50 dawn a lo ni der mai. Heng hunlaia kan lungrualpui ṭhinten mual min liamsan a, mi pahnih thum bak dam pawh kan awm tawh awm lo e. Ṭhangthar zelte tan erawh pi leh pute sulhnu tia thlir liam mai loin, eng angin nge khawtlang tan an lo thawh thlir zui zelin, hmasawn zai i rel ang u.

Heng hunlaia Mamit khawpui awm zel dan tur Pu Z.Lalhmingliana MCS thlir lawk leh ruahman dan te, Mamit ram vel chanchin leh thil thleng hriatreng chi te Part-VI lam ah tarlan kan tum dawn nia.

- Lalhmangaiha Sailo, Holy Cross Bakery