Ramri buai reng tifel ngam tur inpuang ru

Mizoram leh Assam ramri buai avang hian hun rei tak ata tawh Mizo mipuite khawsak phung a buai phah fo tawh a. Vawi engemaw zat inbiakna awmze nei lo pawh kal pui a ni tawh tih kan hre vek awm e.

Hetianga ramri buai nei reng chung chuan a chan chhe zawk Mizoram hi kan la buai fo dawn tih a lang reng mai. Assam ho kan laka an lungawi loh chang apiangin kan ei leh bar lak luhna kawng khu an dang ping leh mai dawn tih a lang reng a, chu chu hman ata tawh an duh anga kan awm loh chang apianga min hrem ṭhin dan a ni tih kan hmu chiang tawh bawk.

Kuminah MLA kan inthlan leh dawn ta a nia, inthlan manifesto-ah ramri chin fel inhuam party an awm em tih hi mipui tam zawk chuan kan lo en khiau dawn a ni. Thu ṭha pui pui inziak siak ringawt chin party pawh in awm tih kan hria a, tunah hian simna rilru kan pu mek a ni, mipui vote nei thei chin a tam zawk chu.

Tun hnai khan Vairengte Aitlanga hmunphiah huan neitute chu an hmunphiah la tura an kal Assam Police-in tidingin kumin chhunga hmun­phiah lak an phal loh tur thu an lo hrilh leh bawk a, hetiang taka mahni thlai pawh la thei loa Mizote Assam lamin min nek chep fo mai hi a tlawm thlak ve viau a ni.

Vairengte chheh­vel ramri buaina hi a rei tawh viau mai a, vawiin thlengin ala tawp hleithei lo a, tuna kan buaipui dan thlir hi chuan a tawp mai dawn pawhin a lang lo reng a ni. Ramri buaina chinfel tumin state hotu lu ber ber an indawr tawh a, chutihlaiin a ramri chhehvela mi chengte berin harsatna an la tawk chhunzawm zel tho si a, kan hotupa hmalakna hian hmasawnna engmah a awm lo tih a lang chiang viau a ni.

Chuvangin kumin MLA inthlan lo awm turah hian ramri chin fel ngam chu rawn inlar ula, mipui tam zawk chuan kan lo vote ngei ang che u tih hi ring bawk ruh u, a chhan chu vai ho lung awi loh chang apianga an duh duha kan chak lakna kawng min dan sak ziah hi kan ning tawh.

- Vohbika Pu