Corruption do nan technology

Kan ram hmelma lian ber pakhat chu eirukna/ hlemhletna (corruption) hi a ni. Corruption tia sawi hian sap ṭawng mah ni se, a thu awmzia kan hriat tlanglawn tak zinga mi a ni. Corruption hian thil chi hrang hrang a huam thei ang, kan CM ni mek in tunhma lama a interview naa a sawi ang deuhin office paper hawn ruk te, office kal tlai te thleng pawhin a huam vek awm e. Mahse kan ram hmasawnna daltu tak tak hlemhletna erawh sum hlawm lian tak tak lo tihchingpen ṭhin hi a ni. Office paper lo hawn ruk hi a ṭha hauh lo, mahse chung hlemhletna leh sum tam tham tak tihchingpenna te kan hrut rual fo erawh chuan uire deng hlum tur kan awm ka ring meuh lo.

Corruption hi khawvel ram tinah buaipui a ni zel a, ram changkang leh lian tak tak te, organization lian tak tak te pawh an bang bik chuang lo. India pawh Corruption Perception Index (2022) ah ram 180 zingah 86-na daih a la ni. Mizoram pawh kan fihlim bik lohzia chu kan hre tlang vek mai. A zung chawpa pho ro tum pawh kha, an sorkar tirh khan an tum tak tak niin a lang. Hun a kal deuh a, sum tihchingpen erawh a awm zui ve ta tho zel mai. Zo-carbon te, Skywalk leh Ropeway sakna tur nuai sang chuang man contract-te an hnathawh hmuh tur awm mang si loin a bi bo thei a nia. Mipui erawh kan la thinrim pha tawk chuang lo nge, sawi pawh kan sawi tha peih tawh der lo. Mimal thahnemngai deuh ten PIL an han thehlut a, Court thuchhuak thar berah pawh eirukna lian tak a inrawlh a ti ta nghe nghe a nih kha. Hei hi a lian tham zinga mi a ni a, adang sawi tur pawh a la tam ang.

Kan ministry hrawn mek hnuaiah pawh corruption tlukpuia hlauhawm, induhsakna uchuak sawi tur a tam hle. Department tin hian contractor/Firm/company/supplier duhsak bik an nei hrang ṭheuh mai. Chungte chu midang chhan ve theih loh turin Restricted Tender hmangin an invulh ta ṭhin a ni. Heng induhsakna uchuak lutuk kalpuitute hi ram hmelma an ni. NABARD sum kan puk, school thuam thatna turte pawh an hman dik tawk lohzia chu kan hmu dawt zut a nih kha. Heng sum te hi a nihna turah tha taka hman thin ni se hma kan va sawn pui thin dawn em!

Eirukna lian tham tak kan sawite khi chu thil thleng reng a ni lem lo a. Eirukna tenau, nitina kan tawn reng ṭhinte erawh technology ṭhang zelin a rawn siam ṭha hret hret ṭan a, a ṭangkai belh zel pawh ka ring. Entirna thenkhat chu, Direct Benefit Transfer (DBT) ang te, a dawngtu tur kutah direct-in a thleng zat zat ta. Ration card inhawhsak pawh a buaithlâk tawh, fingerprint a ngai zel tawh tlat. DBT hman a nih tak avang hian, kum 2020 record ah chuan, scheme hrang hrang 351 an kalpui naah cheng vaibelchhe nuai 1.70 an hum nia sawi a ni.

Sorkar hi eirukna laka kan ven theihna pakhat chu langtlang taka kan dah hian a ni. Mipui ten information kan hriat tam poh leh hmasawnna hna thawktute pawhin thil tha lo tih an hreh phah ve ngei ang. RTI pawh kan hmanna a rei ta, tunah erawh awlsam lehzualin online in kan dil zung zung thei ta mai. Ka hmelhriat pakhatin min hrilh chu, online a dil theih a nih hma khan department pakhat chu RTI hmangin zawhna a zawt a, a chhanna chu office lamah lam turin an lo ti a, a lam pah chuan office a hotu pakhat chuan vauna ṭawngkam deuh a lo hman khum a ni. Hmelma siam belh duh loh avanga RTI hmang ngam ta lem lo kha a lo awm theih viau awm e ka ti. Nikum lamah pawh party pakhat RTI chu a department changtu ten la let turin an ngen bawk a ni. Eng nge a chhan kan tih chuan mipui hriat an hlau tihna a ni mai lawm ni? Hetia RTI online a nih chiah hian application lut pawh hi a tam phah nasa ngei ang. A hma latu, kan CIC neih mek Pu Lalnunmawia Chuaungo pawh fak a phu viauin ka hria. Heti chung hian department thenkhat chu an RTI zawhna an chhan that loh avanga koh ngai an la awm reng zel thung.

Sorkar inrelbawlna kawngah pawh technology hman tangkai a ni chho a. Transport department pawhin Learner license leh thildang dang online a dil theihin an chhawp chhuak ta a, hei hian tha leh sum tam tak a hum ngei ang. Director of school education pawhin document thenkhat chu online a thawn mai turin thuchhuah a siam bawk a, hengte pawh hian tul lova tha leh hun sen a tiziaawm khawp ang. Tunhmaa deuh khan e-file (electronic file) hman te kha sawi a awm deuh a, department pakhatah hman chhin a ni ta nghe nghe khan ka hria. Hei erawh a la harsa rih deuh a ni mahna, hman theih erawh a chakawm fu mai.

Tunlaia veiawm em em pakhat chu hnamdang hnathawk an tam ta lutuk hi a ni. ILP te hi technology hman tangkai belha, khauh zawk leh awmze nei zawka kalpui a harsa hauh lovang. Ramri hnaiha khaw pakhatah chuan sorkar hnathawk ILP siamsak ṭhin chu a hlawk thei viau mai. Hengte hian ram an hmangaih miah lo a, an hlawh bakah felhlel takin, sum siam dan an hmuh phawt chuan Mizoram tana pawi tur an ngaihtuah lo. Check gate-a duty ṭhin te pawh an hausa chak thei viau zel an ti. Kan ram a him kan duh takzet anih chuan, tunlai technology sang tawh takah hian kan check gate neihte mai mai hi chu Aizawl aṭang hian CCTV live feed pawn a vilpui pah thei khawp ang chu le.

Eiruknate hi mihring leh mihring indawrna inkarah chuan a awm deuh reng dawn pawh a ni mai thei. Heng eirukna do tur hian technology hman tangkai theihna a awm apiangah hman chhoh zelte hi tum ve ila, eirukna hi eng emaw chen kan veng thei ngei ang. Chutianga ti thei tur chuan kan internet speed pawh a ziaawm tawh viau bawk. Kan duh leh duh lohah a innghat ta ber mai. Tunlaiah chuan mi tinin smart phone kan hum a, chumi hmang chuan ram leh hnam hmangaih loa hnathawk officer leh ram hruaitu corrupt te kan hual chep thei a ni. Kan mobile phone hmangin RTI kan thehlut thei a, chumi vek hamng chuan mipui hnenah information pe in, lang tlang sorkar siam turin kan thawk thei theuh mai.

Department hrang hranga sorkar hnathawkte pawh, mi ṭha, thil dik tih duh an tam ang. Hengte hian in department a thil fel lo te midang hrilh hreh lo se la. Mahni nihna(identity) thup duh tan pawh fake account te siamin, chumi hmang chuan a hma la ṭheite biak pawh mai theih a ni. Mipui lam pawh hian information kan hriat mai duh tawk lo ila, thil fel lo nia kan hriat chu sawisel ngam ila, mi dik lote dodal ngam ila, hma la ngamte i zui hreh lo bawk ang u.

Eirukna dodal tur hian kan thiamna leh theihna, kan technology te hmang tangkai ila, mi dik loten zalen taka an ei ruk theih lohna turin tha I thawh ve tee ang u. Kan ngawih reng chuan a tuartu tur chu mipui bawk kan ni.

"I ram leh hnam a boral chuan nang leh I chhungte in him bik lovang."

- Robert Lalramhluna