INPEIH A NGAI E

Kan hripui léng hi khaw­tlangah a ṭaidarh kan hlau a ni lo va, a ṭaidarh turah kan ngai a. "Eng tikah ngei a darh ang?" tih kha thla hnih kal ta chhunga kan inzawhna a ni. Chu chu Mizoramah chuan August thlaah hian a thleng ṭan dawn niin a lang. 

A hmaa pawn chhuak lo tura kan lo inzirtirna zawng zawng kha, 'enchhinna' ang deuh a ni. August-ah hian a taka kan nunpui a lo hun tak tak ṭan ta niin a lang. 

Kan kaina kan la chhui thei deuh zel hrih a. Reiloteah kan kaina chhui a harsa thuai tawh ang. Chuvangin, veng leh khaw pumpui chhuak lova inkhung kan lo zir kha a taka tih a ngai leh thut ṭhin dawn tih a chiang lehzual ta. Khawi hmun pawh hi zan khat thil thuah, hri darhna hmun ni thut thei reng kan ni vek. 

Hetiang hun leh hmuna kan chen lai hian thuneitute tan thutlukna dik siam a har em em ang tih mipuiten kan hriatthiampui tur a ni. Chuvangin, dem ngawt lovin keimahni lam inthunun ang u. 

Hmai tuam tur an tih avanga tuam kan ni lo. Keimahni leh kan hmangaih kan chhungte tan kan hmai kan tuam zawk a ni. Thupek nghak kher lovin mahni hi thu i inpe ang u. 

Chhuah loh tur tih thupek nghak kher lovin, ṭul tawpkhawkah lo chuan chhuak lo mai ang u. 

Hri hi lo kai ta ila, mipui hian kan kai chhan min chhuisak luai luai dawn. Loh theih loh thil avanga kai kan nih chuan min hrethiam ang. Hawkdak vang te, dan zawm loh avang te, thil pawimawh ni lem lo kan tihna lama kai kan nih chuan dem kan hlawh ang. Mi dem rawn ni chunga hri vei nih chu a hrehawm ngawt ang. 

Chuvangin, a tih tur ti tura sorkar kan finchhuahna chawlhsan lo chungin, khua leh tui ka nihnain a phût anga ka tih tur hlen chhuak chungin, inthunun thar ang u. 

State pachhe tak ni mah ila, mipui kan inthunun theihna leh kan khawtlang hruaitute inpekna avang hian Hmarchhaka hri darh tlemna state kan ni. He nunphung chhuanawm tak hi taima takin i chhunzawm zel ang u. 

Kan hri dái thèu hun tawp lam kan hmang mek a ni lo, kan ṭan dawn chiahah i ngai ngam ang u.