Kohhran & Khawtlang hruaitu MLA kan ngah

Mizorama inthlan dawn apianga kan hriat ve ziah; MLA ṭha atana tehna an tih chu 'Kohhran leh khawtlanga inhmang mi hmingṭha' tih a ni a, chutiang chu MLA ṭha tehna a nih chuan tun ṭum MNF Ministry tluk hian mi hmingṭha an la tam ngai lo ang. MNF MLA-te hi thiamna lamah pawh ni se an duai lo hle a ni.

Kohhran Upa pawh hi keia hriat ve chinah chuan Upa Dr R Lalthangliana, Upa C Lalmuanpuia, Upa Lawmawma Tochhawng, Upa Lalchhandama Ralte, Upa Ramthanmawia, Upa H.Biakzaua, Upa Dr ZR Thiamsanga te an awm aṭ, keia hriat loh pawh hi an awm ka ring. Kum 2018 inthlan dawn khan an chanchin kha ka lo chîk a, kohhran leh kohhran ṭhalai pawl hruaitu ni mek leh ni tawh ṭhin an ni deuh vek a ni.

Zirlai pawl hruaitu hlui hi ram hruaitu atan an ṭhat chuan tuna kan MNF MLA-te hi an chhuanawm khawp asin. MZP President leh General Secretary ni tawh chin hi Pu Lalruatkima, Pu Lalchhandama, Pu L Thangmawia hi keia hriat ve phak chin an ni a, an chhuanawm ṭheh ṭhawh hle a ni. Hei bakah hian thiamna lamah MNF MLA rual hi an entawntlak a, Master degree nei an tam em em bakah hian Doctorate degree nei pawh panga an neiin ka hria a, Engineer pahnih an nei bawk a, Mizote ngaihsan Kohhran hruaitu, Khawtlang hruaitu bakah lehkhathiam awmkhawmna chu tuna MNF sorkar hi a ni.

Chutianga mithiam leh mifel rual awmkhawm kaihhruai hnuaiah chuan Mizoram hi a kal mek a, inthlan pawh lo awm leh se anni anga mi ṭha rual hi thlan tur an awm tawh dawn chuang em ni? MNF MLA-te hi ṭha famkim chu an ni hauh lo vang tih hre chung hian Mizo mipui hian anni aia ṭha thlan tur hi kan hria em? tiin zawhna han inzawt ta ila, kohhran leh khawtlang hruaitu MLA chu kan nei ta a, heng kan MLA zahawm tak takte rorelna hnuaiah hnuaiah hian kan lung a awi em? Mi hmingṭha thlan chhuah MLA te rorel dan hi a ṭha kan ti em? Kum nga dang chu an ni rual hian min ho leh se kan ti em? tiin mipui chhàn tur zawhna kan inzawt ni se, MLA ṭha tehna hi eng chu nge ni ta ang? tih hi lo dawn ve teh le.

- Vanlalliana