Rilru zau tak pua chhiah pe tura mipui beiseina thu khan rilru a luah deuh tlat

Taxation Minister Pu Lalcham­liana chuan January 25, 2023 khan Mamita Taxation Office building a hawnnaah - sorkarin amahin pawisa a nei lo a, mipuite aṭanga chhiah hrang hrang khawn aṭangin sorkarin sum a nei chauh a ni tih hrereng chungin mipuite'n kan rilru put hmang kan tihdanglam a ṭul a, chhiah pek kawngah rilru zau leh puitling tak kan put a ngai a ni, a ti.

Pu Lalchamliana thu­sawi hi a dik a, chutih rualin rilru zau tak put a har ṭhin. Mamita Taxation Office building a hawnnah hian Minister hian kum 2022-23 atana Taxation Department target chu cheng vaibelchhe 730 aṭangin Mizoram sorkarin cheng vaibelchhe 900-ah a tihsan thu a sawi bawk.

Minister sawi ang hian eng sorkar mah hian a mahin pawisa a nei ngawt lo a, mipui chhiah hrang hrang a lakkhawm aṭangin pawisa a nei chauh ṭhin a ni. Mizoram sorkar pawhin sum a thawhchhuah theih dan ṭha ber chu chhiah lak a ni a, heivang hian chhiah lak dan tur hrang hrang a siam thar bakah a tipung nasa hle tih kan hria. Sum a hmuhna pwaimawh tak a nih avangin chhiah lak theihna tur dan thar dang pawh a la siam belh zel a rinawm hle.

Sorkar hi mipui rawng­bawltu tur, mipui hma­sawnna leh samkhaina tura thawktu tur a ni a, Mizo­ramah chuan mipuiin sorkar rawng kan bawl zawk lo chauh a ni. Tunah Taxa­tion Department target chu cheng vaibelchhe 170 laiin tihpun a ni a, hei hi Mizoram tan chuan a tlem lo hle. Tute emaw bill pekna tur leh eirukna mai mai tur a tan tihpun a ni lek ang tih chu a hlauhawm viau mai.

Mipui chhiah tel loa function-na tur pawisa lakluh tur nei mumal lo sorkar hi mipui tan rilru zau leh puitling tak pu chunga chhiah pek zelna tlakin a thawk tur a ni a; sorkar hnathawkte pawh mipui chhiah aṭanga hlawh an lakah hian lungawi se, an hlawh leh hamṭhatna dang an dawn tam taka an duhkhawp lohnate hi state dang nen inkhaikhin fo suh u. Khawvel changkannain a kentel technology hrang hrang hmangin mipui hian state dang sorkar hnathawh dan leh Mizoram sorkar hnathawh dan kan khaikhin ve mek tawh a ni tih hi sorkar hnathawkte'n hria se, an mahni hamṭhatna tur ni loin mipui hamṭhatna tur zawkin thawh tum zawk rawh se.

Khawvel ram hausa zawkte hi chhiah sang tak tak pekna ram an ni tih chu kan hre vek a, chutih rualin an chhiah pek aṭangin mipuiin hmasawnna leh hman­ṭhatna tam tak an dawng a, hmasawnna tur an rua­hman mek zel bawk.

Chhiah pek hi kan tih tur a ni tih mipuiin kan hria; in hnathawh dan leh mipui in dawnsawn dante kan thlir ve reng a, mipuiin rilru zau leh puitling tak pu chunga chhiah an pek theih zawk nan kum 36 chuang state ni tawh Mizoram sorkar hian a thu mai ni lo, a taka hmuh theih leh mipui chhawr tlak hmasawnna siam turin hna a thawk ngei tur a ni.

- Johny Chawngthu_95