COVID-19 LEH DAMDAWI MANTLAWM

Kan hriat angin kan tunlai khawvel chu COVID-19 hripuiin a tibuai a, India ram pawh nasa takin min run a. Mizoramah pawh a ni telin kian lam pan aiin a kai thar kan awm belh zel a, a pawi takzet a ni. He hripui hian mitin min nghawng a, eizawnna hrang hrang hmanga eizawngtute a nghawng a, a bikin nitin inhlawh ngai te, lo neia eizawng leh sum­dawnna kawng hrang hrang buaipuitute a nghawng nasa leh zual. 

Mizoram pawh March thla tawp lam aṭangin thla thum chuang pawn chhuak thei mumal lovin kan awm a, mi tam tak tan eizawnna leh dam khawchhuah zelna tur atana kan mamawh pawisa thawh chhuah chungchangah mi a nghawng a. Mangang tam tak kan awm a economics lama kan mithiamte pawhin in renchem a pawimawhzia leh hun lo la kal tura harsatna kan tawh theih dante mipui hnenah min zirtir ṭhin a nih hi. Hetiang boruak karah hian mi tam tak harsatna phuhru thei leh sum khawlna tha tak ni thei Damdawi man tlawm chungchang hi sawifiah han tum ila. 

Kan hriat angin Aizawl Civil Hospital-ah i kal chuan a tual sir veilamah Damdawi man tlawm (Generic Drugs) zawrhna bik in te tak te i hmu ang a. Chuta damdawi chu a tlukpui damdawi dang aiin a let eng emaw zatin a man a tlawm bik tih i hria ang. Tin, ZMC leh district capital dangah pawh hian hmuh tur a awm nual tawh mai, hetiang damdawi mantlawm zawrhna hi Government of India-in Department of Pharmaceuticals kaltlanga 'Jan Aushadhi' (Mipui tan Damdawi tihna) tih hming put tira a bul ṭan a ni a, mipui vantlang harsa zawkten damdawi man tlawm thei ang bera an hmuh theihna tura hmalakna a ni. 

Hetiang bakah hian private company nena ṭangho mimal a chahlut a, mipui lei theih tura chhawp chhuak an awm bawk tih kan hre awm e. Generic drugs hrethiam tur chuan branded drugs chanchin sawi phawt a ngai. 

Pharmaceutical Company-in kawng hrang hranga thiamna bik nei mi tam tak ruaiin damlo enkawlna atana ṭha ngei tur damdawi thar hmuh chhuah tumin an bei fo a. An bei reng bawk. A hautak hle. Damdawi chi khat, him ṭha tak hmuchhuak tur ringawt pawhin cheng maktaduai tam tak sen a ngai a, kum 20 chuangte hun khawhral a ngai. Chuti chung chuan hmuhchhuah tak loh chang an ngah em em fo. 

Mihring a hman chhin a nih hma hian kawng hrang hrangin nasa taka zirchian phawt a ni ṭhin a, chumi hnuah chuan stage thumah ṭhenin mihringah enchhin ṭhin a ni a, hemi stage paltlang zo lo hi damdawi tam zawk a ni ṭhin. Hei kan hriat angin tunlai kan COVID-19 vaccine te pawh stage 2/3 clinical trials beih mek a ni tih te chanchin tharah kan hmu ṭhin ang. 

Vanneihthlak takin dam­dawi chu an hmuchhuak ta a. An company chuan Central Drugs Standard Control Orga­nisation (CDSCO of India) emaw Food & Drugs Administration (FDA, USA) hnen aṭangin phalna an la a. Tichuan, mipui hnenah hralh chhuah theihin tam tham takin an siam ta a, chumi hnu a hman phal a nih hnuah pawh a stage 4-na la awm lehin damlo nawlpuiin an hman mek damdawite pawh hi a nghawng chi hrang hrang zirchian reng a ni ṭhin a ni. 

Chutia research beia hah thikula kum tak tak leh sum tam tak senga an beih chu midangin hah ve miah lovin an tihdan copy-in hlawk nan an lo hmang daih thei a, a siamchhuaktu, a hah ber kha an cha der thei a ni. Damdawi thar hmuhchhuah chu a hlawk lo hle thei tlat a ni. 

Chuvangin, a neitu nihna hi kum 20 chhung atan an pe ṭhin a, chu chu 'patented rights and exclusivity' an ti. Hetih chhung hian an damdawi siam ang chu tumah dangin an siam ve phal a ni lo. Tichuan, an company chuan an damdawi hming chu branded name an pe a, branded drugs a lo ni ta a, a man pawh an tisang far zel mai a ni. 

A chhan chu elpui (compe­titor) an nei lova, tin, research an beihnaa an sum sen zawng zawng leh damdawi dang hmuh chhuah tuma an sum sen thlawn zawng zawng kum 20 chhunga hmu let leh ngei tura an inhralh char char a ngaih vang a ni ber. 

Generic Drugschu engnge?

Chu branded drugs chu a siam chhuaktu company-in a neitu nihna an neih hun chhung kum 20 a lo pelh tawh chuan midangin an siam dan copy chungin an siam ve thei ta a, chu chu Generic Drugs an ti. Mahse, dik takin an copy tur a ni a, a intluk ngei em tih test-na 'bioequivalency test' a paltlang thlap tur a ni. 80-125% a a intluk chuan a intluka pawm a ni ṭhin. Hei vang hian Generic drugs te hi lei a him a, a man a tlawm avangin hmuhsit chi a ni lo. Sum save na ṭha lutuk a ni. 

Engvangin nge Generic drugste hi a man a tlawmbik?

Branded dugs nen a ṭhat dan a thuhmun reng tih kan sawi tawh a. A man a tlawm bik chhante chu -

Generic drugs siamtute hian damdawi hmuchhuaktu in enchhinna hrang hrang a neihte kha an tih ve a ngai tawh lova. A hnathawh dan (Pharmacological activity), laboratory, rannung leh mihringa a hmu chhuaktuten sum, hun leh tha tam tak senga an lo enchhin tawh kha an ring ve thei nghal mai a. Branded drugs te patent an nih kum a tawp tawh a ni tih company dang pawhin an hre kar vek a. Company dang tam takin an copy ve tho dawn tih an hria a. An company damdawi siam kha an hralh theih nan company dang, an competitor te damdawi siam aiin tihtlawm an tum ṭheuh a, chu chu mipuiin kan lo hlawkpui ta ṭhin a ni. 

Company ho an intihtlawm siak azarah mipuiten tlawm takin kan lei theih phah ta ṭhin a ni. Tuna kan sawi tak damdawi man tlawm Generic Drug (brand name nei lo) te nen hian tarlan tak angin a damdawi ṭhat dan leh hnathawh chu damdawi awm intlukah (Mg. inang) chuan inang vek tura ngaih leh danin a phut a ni. 

Hei vang hian kan ma­mawh leh a tel loa mi tam tak kan awm theih loh, a bikin reitak damdawi ei ngai tan phei chuan generic damdawi hman hi kan intihhmuh zel a ṭha hle a. Mi tam tak, a bikin lung lam ṭha lo, thisen sang, zunthlum neiten an hmang nasa tawh a, a harsa deuh tan man tlawm zawka damdawi kan neih theihna, a neinung tan pawh sum khawlna ṭha tak ni bawk si a ni. Generic drugs (damdawi mantlawm) hi hnualsuat lo a intihhmuh zel chi a ni. 

Medical Council of India chuan October 2016 khan damdawi chawhtute chu generic drugs hmang uar turin a ti a, chutiangin pharmacy leh pharmacist te pawhin mipui rawngbawlna a nih anga hman tam zel ni se. 

Generic damdawite hi damdawi pangngaiho man aiin 50%-80% velin a tlawm zawk ṭhin a ni. India ram hi khawvel puma generic damdawi 20% vel siam chhuaktua ngaih a ni a, Generic drugs te hi USA ah pawh an lei nasa a. Kum 2002- 2011 chhung khan mipuiten damdawi man tlawm an lei avanga an sum save zat hi US dollar 1.07 trillion lai a tling nia chhut a ni.