Hnam dang pasal neih

Central YMA in hnamdang nupui pasala neih a duh loh thu a chhuah tawh a, hetiang a nih chuan hnam dang lakah Mizote kan him lo tih a lang.

Hman deuh khan Aizawl ngeiah vai pa leh Mizo nu in pawm chungin scooty an lo khalh a, traffic police in a lo hau, mahse an duh anga awm turin zalen­na an nei. I hnam chhan rawh, khawvelin a dem lo ang che ti pawl pawh an awm, mahse hnam chhanna ṭha ber hi eng nge ni le?

Mizo Hmeichhia, "Mizo mipa pasal tlak an awm lo" ti thin te hi Mizo tlang­val fel tak nupui tlak, veng khat nula fel an vang khawp tia sawi an awm ve fo mai. Mahni hnampuitena an neih duh loh nih hi kan in en letna ve tur a ni e. Hmel leh pian phunga rualban loh vanga vanduaina chu sawi theih a ni lo e, amaherawhchu, nun uluk loh vanga mahni hnampuitena an neih duh loh nih hi chu thil pawi a ni.

Mizo ngei pasal neih dawna duhtui viau si, Mizo tlangval felin an iai tawh si te hi an awm fo, an phu tawk Mizo tlangval iai si ho hian Vai/ hnam dang bak pasal tur hmu tawh lote an ni ve tlat mai.

Chutiang chiah chuan Mizo mipa lam pawh kan ni - Mizo hmeichhiatena an neih ngam loh hi kan tam viau.

Mizoin an neih duh si loh, Mizo hmei­chhiate hi hnam dangin an hmangaih a nih chuan nei sela. Mahse, Mizo society-ah beisei nei lo ngam ve thung sela, social media velah an chauhthubarawh Mizo, tlangval tlin lohna hi sawi ve fo tawh lo rawh se.

Hnam dang an neih ngam chuan an pasal te hnamah in tulut se, an fate tan pawh Mizo quota beisei ve lo rawh se.

Hnam dang hi Vai chauh a ni lo, sap pawh hnam dang an ni. Hnam thilah chuan thikthu tih chhiat a hun viau e. Chumi atana mipate tih tur pawimawh chu hmeichhia chawm loh chhungkua kan din theih ve a ngai.

Vai ramah vai hmeichhia han chhaih ngawt teh, vai mipaho chu an ri ṭhak mai ang. Mizo hmeichhiate pawh kan fimkhur a ngai, mi hmuh loh chuan lo khawsa pawh nise, Mizo hnam leh khaw eng pawh zah ve tur a ni. Hnam dang mipate huangtau tur pawh mipate hian kan ti tim ve tur a ni, thiktu kan tihchhiat ve ṭhin a ngai.

MHIP pawh hian nihna ringawt puai­pui loin an hmeichhe puite hnam dang laka an khawsa danah beng chhi se. Mizo hmeichhiate humhalh kawngah a hmei a paa kan ṭhanharh a hun.

- Pekhlua Fanai