Zinkawng titi

Covid hnuah a vawi khat nan Leitlangpui ka va zin ve thei ta hram a. A kawng chu ṭha lai awm màhse a chhe lai a tamin tlan a hrehawm angreng hle mai.

Lungleiah hian MLA bial pali a awm a, MNF-in an la vek a, an zingah Cabinet Minister pakhat a la awm bawk. He World Bank Road hi chhim lam tan a pawimawh hle. An hawn tirh khan ka car-in ka tlan a, darkar 4 velah ka thleng thei. An maintain lo lutuk hi an MLA-te ka dem hle mai.

2017 khan Ngopa ka zin a, Tuivawl chhak aṭanga Dulte inkar chhe turu lutuk kha ka la theihnghilh thei lo. Khatih laia hotupa khan, "Kawng chhia tihte chu Silchar la pel lo," min tih khum a, 2018 inthlanah an tla chiang hle!

Aizawl chauh hi Mizo­ram emaw kan ti ṭhin ni hian ka hre rum rum ṭhin. Aizawlah kan inek beng a, kan khawpui ber pawh mu leh mal a nei hlei thei ta lo chu a nih hi! Hmanah ka sawi tawh; khaw lian deuh deuh (entirnan Saitual, Ngopa, Kawrthah, Tuipang, Kawnpui etc) hi Satellite Town-ah buatsaih ila, facilities ṭha siam ila, education ṭha buatsaih bawk ila. Kawng ṭha tak awm zel se, thingtlang aṭanga khawpuia pêm luh tam lutuk hi kan veng ang a, khawpuia inek beng lo hian thingtlangah kan kir leh thei ang tih hi ka la ring fan.

Kan hotupa hian kawng chhawng leh leihnuai kawng a sawi tui ṭan leh a, a term tawp lam a ni tawh a. A awm sa pawimawh zual kawng hi thuam ṭha zawk se, hma kan sawn pui zawk ang mawle.... te kan ti ve tum hrang a ni.

Aizawl Traffic tih­ziaawm kan duh takzet chuan garage nei lo lirthei zawng zawng hi man vek se, kawng sir hi garage-ah hman phal tawh lo se, kan fel duak mai ang. Keia ngaihdan hian kan khawvel erawh a kal dawn der chuang lo tih hi Luka ziak tlukin ka chiang...chuang lem lo!

- Dr. Chawnglungmuana